Tuesday 22 September 2015

Lé Rouai dé la Danse - Lord of the Dance

Né v'chîn l'texte d'aniet d'not' auteu du mais, Joan Tapley:

Here's today's text by our author of the month, Joan Tapley:

Lé Rouai dé la Danse
Lord of the Dance
Jé dansis la matinnée qué lé monde fut fait,
Et j'dansis dans la leune, dans les êtailes et l’solé;
Et pis jé d’scendis du ciel, j'vîns sus la tèrre danser
A Béthléem où'est qué j'fus né.

Dansez, suivez mé tous, i’ dit,
Jé sis lé Rouai dé la Danse, et pis
Jé vos mèn’nai tous, tout drait au Paradis
Et j'vos mèn’nai tous à la danse, i’ dit.

Jé dansis pouor les scribes et pouor les pharisiens,
Mais danser auvec mé? Eh bein, janmais i’ n'voulaient,
Jé dansis pouor les pêtcheurs, pouor Jacques et pouor Jean
I’ mé suivîtent - la danse c'menchant.

Dansez, suivez mé tous, i’ dit,
Jé sis lé Rouai dé la Danse, et pis
Jé vos mèn’nai tous, tout drait au Paradis
Et j'vos mèn’nai tous à la danse, i’ dit.

J'dansis touos les dînmanches - j'dgéthis les malades,
Mais les prêtres et lé monde, bein i’ dîtent qué ch'tait dommage
Et il m’fouettîtent et m'd'sabilyîtent et m’laîssîtent déhors
I’ m'pendîtent sus la crouaix à mort!

Dansez, suivez mé tous, i’ dit,
Jé sis lé Rouai dé la Danse, et pis
Jé vos mèn’nai tous, tout drait au Paradis
Et j'vos mèn’nai tous à la danse, i’ dit.

I’ mé descendîtent et jé dansis deux'trais fais,
Oh, jé sis la vie et jé né mouôrrai janmais.
Jé vis en vous si en mé ou vivez
J'sis lé Rouai dé la Danse - vénez tous danser!

Dansez, suivez mé tous, i’ dit,
Jé sis lé Rouai dé la Danse, et pis
Jé vos mèn’nai tous, tout drait au Paradis
Et j'vos mèn’nai tous à la danse, i’ dit.


Joan Tapley
Vèrsion Jèrriaise dé l’Angliais dé Sydney Carter

No comments: