Eune fabl'ye dé Jean de La Fontaine en Jèrriais:
Lé J'va d'Saint George et l'Freunmion
Lé J'va d'Saint George, ayant joué
tout l'Êté,
s'adonnit hardi au d'sans
quand l'Hivé veint auve ses vents:
sans même un mio d'moûque ou vèr
pouor enduther l'piéthe d'Hivièrs.
I' s'en fut qu'si un crôton
siez san vaîthîn, l'Freunmion,
en d'mandant d'prêter bouonnement
ofûche eune poutchie d'fronment
jusqu'au R'nouvé, qu'i' lî dit.
"Jé vos l'juthe: tout s'sa r'payi
d'vant Août, ou pus tôt qu'chenna:
l'întéthêt et l'prîncipa."
Lé Freunmion n'est pon prêteux;
il est couoyeux. "Tchi dgiâtre qu'ou
faîthêtes dans la caleu d'Août?"
qu'i' r'plyitchit à ch't emprunteux.
"Pouor lé publyi, niet' et jeu
j'tais à chanter s'i' vos pliaît."
"Ou chantêtes? J'en sis bein d'hait.
Eh bein, ch'est d'danser achteu."
Jean de la Fontaine
Vèrsion Jèrriaise dé Geraint Jennings
No comments:
Post a Comment