1935: Mess Simon!

 Eune poésie par Fraînque Le Maistre:

Mess Simon!

Tch'est qu'est ch'tî-la à la Chronique,

Tch'est tréjous en chèrge d'la ''boutique,''

Driéthe lé compteux à êcrithe,

A caltchuler ou à traduithe?

Ch'est Mess Simon!

 

Lé tché qui s'fait bein populaithe,

Tch'est bein d'visant, ah, mais dame véthe,

Et tch'est qui nouos donne au sanmedi

La pus vielle gâzette dé Jèrri?

Ch'est Mess Simon!

 

Tch'est qu'est l'anmîn du Cahouain et d'la Pie,

Tch'est responsablye pour tout lus d'vis!

Est lus anmîn bieau qué acouco

Tchiquefais lus teurtéthait bein l'co?

Ch'est Mess Simon!

 

Tch'est qui fait bouonne minne, assa, dites-mé,

Tch'est compliaisant à un dégré,

Un bieau grand souorri sus la fache -

N'est pon à teurs ni à morgaches?

Ch'est Mess Simon!

 

Et tch'est qu'est l'chein tchi s'fait bein vaie,

Tch'est connu comme un vièr jèrriais,

Un fanmeux gas, s'i' y'en a iun,

Tchi s'dêrang'geait, dame, pour autchun?

Ch'est Mess Simon!

 

Tch'est qu'est dans tout juste et recta,

Tch'a touos ses boutons (et d'extra),

Intelligent et êdutchi

Et auve tout ch'la hardi poli?

Ch'est Mess Simon!

 

Tch'est qui n'est non accouôteumé

A grommachi ou à juther,

A mains qu'nou n'lî pile sus les pids -

'Presti d'mêtchi, j'vos en dgèrnis!?

Ch'est Mess Simon!

 

Tch'est qu'est r'ligieux (quand il y pense!)

Et n'approuve dgéthe d'aubèrge ni d'danse,

N'joue pon ès cartes - l'dgiâtre et l'forteune!

Tchi va à la chapelle châque bliue leune?

Ch'est Mess Simon!

 

Tch'est qui n'va pon au cinema

Ni au theatre ouï chu sabbat,

Mais qui s'promène auve san p'tit tchian

A côte d'li sus l'but d'un lian?

Ch'est Mess Simon!

 

Et tch'est qu'est bouon ès dominnos,

Tch'aime bein mus prendre la vie en r'pos,

Tcho n'mâche ni n'feume, ni n'bouesson'na -

Bein exempliaithe dans tout chenna?

Ch'est Mess Simon!

 

Tch'est qui n'peut s'graie sans du café

Et suppe deux œufs pour dêjeuner,

Tch'est qu'aime lé pâté d'su romethi

Est fo d'g'lée d'preune et d'tchi rôti?

Ch'est Mess Simon!

 

Tch'est qu'est tréjous bein mîns d'habits,

La dgêne à haut, les j'veux brîngis,

Tchi lève san chapé au Recteu, -

Sus touos les sens un vrai moussieu?

Ch'est Mess Simon!

 

Tch'est qu'est l'nom d'l'homme îndispensablye,

Tout pliein d'bonté et bein affablye,

Pis quo s'atchitte dé san travas,

Tch'est qu'est, enfîn, un raide bouon gas?

Ch'est Mess Simon!

 

Et tch'est qu'est bein en peine du d'vis,

D'la bâl'lie d'bec d'Marie La Pie,

Tch'est qui s'fiche bein d'tout man niolîn,

N'sé gêne pon fort dé chu bêtîn?

Ch'est Mess Simon!