La Bouanne 'Jersey Weekly Post'!
San Antonio, Texas. U.S.A.
Lé 3 d'janvyi, 1970.
Moussieu l'Rédacteu,
J'veins d'èrchéver la gâzette du vîngt d'novembre. Comme j'l'ai mentionné d'vant, ch'est tréjous jour dé fête quand oulle arrive. Ch'est des nouvelles dé Jèrri et des Jèrriais pour un Jèrriais exilé! J'attendais chette-chîn împatiemment pour vaie tch'est tch'avait gangni l'êlection pour Sénateu, et tch'est tch'était les gangnants à l'Eisteddfod. Quant à l'êlection, j'tais surprîns d'vaie l'Sieur Shenton à la tête dé tous. V'la tchi montre, à m'n idée, qué l'monde craient tch'i' y'a bésoin d'nouvieaux membres dans L's Êtats. Dans chu cas-'chîn, j'espéthe qué l'Sénateu a dans l'idée d'èrprésenter tout l'monde et qu'san d'si d'êt' dans L's Êtats n'est pon seulement pour s'èrbînfrer contre les cheins tchi n'voulaient pon l'laîssi vendre sa maîson, car ch'est seulement d'pis ch't êvènement-là tch'i' s'est întérêssi dans la politique! Enfîn, j'lî souhaite bouanne chance et eune carriéthe heutheuse dans L's Êtats pour lî-mème et profitabl'ye pour l'Île.
J'ai envie d'vaie tch'est tch'a gagni l's êlections pour Députés, mais i' faudra eune aut' trais s'maines dévant l'arrivée d'la gâzette tchi montrétha chu rêsultat-là.
J'vai qu'St. Sauveux gangnit La Coupe des Enfuntchis à l'Eisteddfod, et j'félicite les joueurs dé bouan tchoeu. Et j'félicite les joueurs dé St. Hélyi pour aver si bein fait tch'i' n'y avait qu'deux mèrques entre ieux et les gangnants. Ch'est danmage tch'i' y'a si p'tit d'pâraisses à prendre part dans chutte compétition-là. Les gens d'châque pâraisse dév'thaient organiser des clobes dramatiques et pratitchi touos l's hivièrs. Nou sait bein tch'i' sont trop embarrassés dans les clios l'êté, mais s'il' avaient l'ambition d'produithe des pièches dé thiâtre dans l'hiver - à la pliaiche d'èrgarde et d'êcouter tout l'niolîn qu'nou vait et ouait à la télévision la grand' partie du temps - i' s'saient, nou peut l'dithe, à passer lus temps à profit. Dé mème, y'éthait assez d'compétitions pour eune sémaine dé Séthées Jèrriaises à l'Eisteddfod, et les clobes dramatiques pouorraient aver des séthées dans lus pâraisses pour lus pèrfectionner et en mème temps faithe tchiques sou pour lus bésoins d'églyises et d'causes charitabl'yes. I' m'sembl'ye qu'nou peut dithe, auve raison, qu'les Séthées Jèrriais sont profitabl'yes pour l'Eisteddfod, et qu'châque fais tch'i' y'en a ieu dans les pâraisses il' ont remplyi les Salles Parouaissiales. Et à part dé ch'la, les jannes y trouvethaient un pliaîsi tch'i' n'ont pon rêalisé d'en par ichîn. J'm'èrsouveins qu'les séthées passées à pratitchi pour les pièches dé thiâtre des "Dickens Players" et du "Green Room Club" quand j'tais janne 'taient des pus pliaîsantes dé ma jannèche!
Y'a des tristes nouvelles dans la gâzette. J'ai souvent r'mèrtchi qué l's anciens lus en vont à grands pas, mais jé n'm'attendais pon d'vaie l'décès du Sieur Henri L'Maistre d'St. Ouën dans sa chînquante-huitième année. Un Jèrriais dans l'âme, fort comme un capeste et tréjous prêt à faithe un pliaîsi. J'eunmes eune longue convèrsâtion auve li, man fréthe Fraînque et mé, l'long d'la muthâle en d'vant du Ménage ès Feuvres, à la fîn d'octobre passé, tchiques jours dévant nouos en r'vénîn en Améthique, et i' pathaîssait robuste et en plieinne santé. V'la tchi m'ramémouaithe les patholes du c'menchement du Sèrvice dé La Communion des Malades dans La Litourgie tchi nouos disent qué: "Les hommes étant à tout moment sujets à des périls, à des maladies et à des infirmités sans nombre, l'heure de leur départ de cette vie est toujours inconnue."
J'èrgrette dé vaie, étout, l'décès d'eune couôsinne (du côté matèrnel), Madanme Alice Le Marchand, née Williams, dé Ste. Mathie. Ch'tait téjous un pliaîsi d'aller la vaie quand j'allais en Jèrri. Oulle 'tait d'bouan tchoeu, et fallait tréjous aver eune tassée d'thée. Ch'est seux qu'sa fanmile s'en va la mantchi.
Un vièr Jèrriais hors pays veint d'passer l'pas étout. Ch'n'est pon dans la gâzette qué j'ai veu san décès mais j'ai r'chu la nouvelle en mème temps comme sén arrivée ichîn. Ernest Mourant, fis d'feu Philippe Le Sueur Mourant, tch'était l'fanmeux êcrivain d'la langue Jèrriais souos l'nom d'Bram Bilo est décédé à Auckland dans La Nouvelle Zélande lé 19 dézembre 1969, dans la huiptante-traisième année. Un charmant moussieu. J'allînmes lé vaie, lé Sieur Edward J. Le Feuvre et mé, quand j'tions à La Nouvelle Zélande y'a siex ans chu mais. J'veins d'èrchéver eune lettre dé sa fille m'annonçant sa mort subite dans l'apotiqu'sie pas bein liain d'siez-li, où'est tch'il avait crié en pâssant, tchiques munnutes auprès qu'ou v'nait d'lî pâler et tchi'i' pathaîssait d'charme! Y'a acouo des Mouothants d'chutte fanmile-là la-bas, car sa fille mé dit dans sa lettre qué ch'tait Herbert Mourant, l'couôsîn à san p'pèe, tchi condisit l'sèrvice à l'entèrrement.
Eh bein, la fîn d'l'année 1969 a 'té la fîn pour un tas d'gens étout. Ch'est la vie. I' faut don êt' èrconnaîssants d'êt' en plieinne vie sé-mème et en bouanne santé, et en jouï quandi qu'nou peut, car nou n'sait janmais l'moment qu'la tropette son'na l'appel à la vei êternelle!
No comments:
Post a Comment