The Owl on the Visite Royale in 1920:
Marie Hibou était à r'garder par la f'nêtre de not'e mansarde l'aut'e matin quand tout-d'un-coup ou criyi "Caouain, vain-t-en vaie chennechin! Y a tchiquechose en allant!"
Je m'en fus don vaie tch'est qu'y pouvait y aver d'extraordinaithe et j'aperchus, en d'vant d'la Cour Royale treis ou quatre vétuthes à deux ch'vaus de stationées dans la route. Sus les d'grets d'la Cour y avait une djaingue de grands messieux dans lus habits du Dimanche, chein qui m'fit penser qu'i' s'en allaient faithe une promenade.
Je d'vallis dans la boutique et d'mandis au Chef si ch'est qu'il y connaissait tchiquechose.
"Mais sans doute, espèce d'imbécile! (Ch'est d'même que l'Chef me pâle tréjous, acheteu), i' s'agit tout simplement de la Visite Royale dans la pâraisse du bouan berger."
"J'peux-t-i' y aller avec ieux, si vos pliaît?" j'li d'mandi.
I' s'mins à rithe et m'raîponni comme chenna, "Va lus d'mander."
Alors je m'en fus immédiatement, mé, et comme je crouaîsais le Vier Marchi il's étaient justement à monter en cârosse.
Mais l'couothage me mantchi car je m'imagini qu'i' n'voulaient pas d'Couains à les sièthe. Mais je n'm'en allais pas être laissi drièthe pour autant, ch'est pourtchi je m'jutchi sus l'êsseu d'la vétuthe dans tchi qu'étaient les deux nouviaux juges, le sien qui fut êlu l'année passée et l'sien d'l'aut'e jour, ch'est-à-dithe "le chouaîsi du peuple." V'là don la procession en route.
Je vos asseuthe que j'trouvi le c'min diversement long. Savous-bain que quand nous est assis sus l'êsseu d'une vétuthe, nous sent une espèce de vibration qu'est bain liain d'être agréable. Eprouvez-y, et pis ou me r'dithez.
Je criyais qu'ils aithaient fait une halte ou deux sus la route, mais nouffait! J'arrivimes au Parish Hall du bouan berger sans aver arrêté à une seule aubèrge.
Les messieux d'cendithent et entrirent dans la Salle pour passer les comptes des Inspecteurs et ainsi d'suite.
Gaffe, le huissier se mins à dêhaller des buts d'vaule de dans une pouque et s'mins à les screwer ensemblye. I'y en avait-là qui criyaient qu'i' s'en allait êprouver à happer d's andjules dans la mathe de la C'mune, mais iun d's anciens explitchi que ch'tait là la "rod" du Vicomte pour mésuther la hauteur des branques dans les routes.
A un moment donné nou fit entrer les "voyeurs" dans la Cour, afin de les faithe lever la main drouaite et juther qu'i' s'en allaient inditchi touos les encombrements qu'i' pouvait y aver dans les routes de la pâraisse.
Le Président lus dit "Si ch'est qu'il y a d'la pathenté entre autchuns d'vous, messieux, i' faut l'dithe, car des pathents ne peuvent pas servi ensemblye!"
Là d'sus les "voyeurs" se minrent à compather lus généalogies respectives, et i' fut dêcouvert que Félix Jontchèt, en prumié neuches, avait mathié la grand'mèhe au couôsîn à Barnbé Snichon, ch'est pourtchi ledit Snichon fut obligi de se r'tither, et pourtant, i' connaissait un lopin d'bannelais de tchique carre dans l'Coin Vathin qu'il aithait donné sa tête pour montrer ès messieux.
Touos les préliminaithes finis, nou s'mins en route.
Les voyeurs allaient l'avant deux à deux. A c'menchi o' prinrent le "pas gymnastique" mais i' furent obligis de molli d'lierre.
La Cour ne marche pas vite, par exemplye!
Nous aithait dit que ch'tait un enterrement. quand vint un temps v'là les voyeurs qui s'arrêtent tout court.
Un bouais projectait en d'sus d'la route à un anglye de quarante-chinq dégrêts et i' y avait deux grandes meurtrisseuthes dans la pé ouest qu'tchique vétuthe avait tamponné.
"Eh bain, tchest qu'ch'est messieux?"
Le pus hardi des voyeurs dit, "Chu bouais-là, est-che qu'i' n'est pas dangereux?"
Le Vicomte fit jouer sa badgette dessus, comme Moïse quand i' frappi l'rotchi, mais i' n'y eut autchun rêsultat.
Un haut fenctionnaithe démandi "Combain qui y a d'temps qu'il est-là?"
Personne ne put raîpondre une tchestion aussi profonde, car che n'est pas la couôtume quand nou pliante un bouais d'inscrithe la date dessus comme quand nou bâtis une maison. Et pis d'ailleurs, nou réalisit la probabilité que y avait bain d's années que l'pâraissien qui l'avait plianté était hors à r'joindre ses anchêtres dans un monde ouest qu'i' n'y a pas d'Procutheurs Généraux.
La préchaine tchestion - "Y a-t-i' ieu des accidents à cause de chu bouais-là?"
Un voyaeur raîponni, "Je n'sais pas Moussieu, mais il a ieu des ouapes tréjous, dans tchique satchèt!"
Et i' pointi avec son dait ès êcorcheuthes sus la gambe du bouais.
Les Messieux furent consultés.
Iun dit "Démolir"
Un autre: "Leave it."
Un traisième "Knock it down."
Un autre: "Ch'est damage, Conserver."
Si bain tréjous que les "Leave it" se trouvithent dans la majorité est l'bouais est oquo là.
Le Caouain espéthe se r'jutchi d'dans oquo bain des fais.
Deustrais chents verges pus liain v'la tchiquechose qui houque dans la badgette officielle!
Nou r'gardi en haut et nou vit une petite branchette d'orme qui n'avait pas 'té êbutée. Chute feis dja, ch'tait une chose qui n'tait pas pardonnablye, et l'vingtenyi fut instruit de haller chinq chelins au propriêtaithe du fossé. V'là tchi li apprendra pour une aut'e fais!
Les voyaeurs aithaient voulu faithe abattre plusieurs bouais qui selon ieux étaient bain dangereux, mais i' n'en r'pathirent pas dans tous les cas. Les uns furent prins et les autres furent laîssis.
Dans une petite route i' y en avait iun qui pendait si bain que Maît'e Tom Rye-Grass voulait à toute forche qu'i' fûsse oté.
Comme i' disait, "je n'peux pas passer avec ma vainne à êclon, sapresti!"
Mais tchiqu'un trouvit que ch'tait une route de huit pids et quand l'arpenteur mésuthi la laize nou trouvi que l'pid du bouais était à neuf pids et d'mi de l'aut'e muthaille ch'est pourtchi tout était en règlye.
Ch'tait un biau bouais et i' y avait longtemps qu'il 'tait là, ch'est en tchi "Leave it" en remporti sus la minorité.
Les fermiers comme Tom Rye-Grass n'ont pas besoin d'aller lus fouorrer dans les p'tites routes avec lus êclons, qu'i' lus tchiennent dans les grandes routes.
Quand vint un temps la Cour fut l'vée.
Nous abandonni la partie.
Duthant la matinée j'avais laissi vaie ès grands messieux que j'assistais à la cérémonie, et comme deustrais d'entre ieux m'avaient châtchi la patte je comptais sus une invitation de monter en cârosse et d'aller dîner avec ieux à St.-Brelade.
Mais pas un seul en fit la suggestion.
Quand j'vis chenna, je m'appréchi du Connaîtable et opprès li avé fait la r'merque qu'i faisait biau temps et ainsi d'suite, je l'i d'mandi si ch'est qu'i' n'trouvait pas qu'des bordees comme ch'la vos affilaient l'appétit.
J'me fiais au mains, qu'i' m'aithait emmené à St.-Jean dîner avec ses voyeurs, mais bah! i' montithent dans lus vétuthes et fichithent le camp, me laissant là sans même me dithes "Pôques-té!"
Sinon que j'trouvi une taupe qu'était morte au pid du fossé dans l's envithons d'la Crouaix-au-Lion, je n'aithais ieu rain à mangi devant que d'être ervenu en ville.
Caouain
Chroniques de Jersey 7/8/1920
No comments:
Post a Comment