Sunday 9 November 2014

1948: San Antonio, Texas

George d'La Forge êcrivit entouor la ville dé San Antonio en 1948:

George F. Le Feuvre wrote about the city of San Antonio in 1948:

Les d'vis du Bouan'homme George
Oprés aver d'meuthé en Jèrri pour un couplye d'années, j'mé trouve dans un aut' monde en Améthique. Dépis que j'sis ervenu, j'ai dêjà viagi sus tèrre quâsi aussi liain comme la Côte est d'Jèrri! S'ou' n'mé criyiz pon, ergardez un Atlas, et m'suthez les distances entre Montreal et Ottawa (Ontario), et de Detroit (Michigan) à San Antonio (Texas), en allant par Fort Wayne, Indinapolis (Indiana), Paducah (Kentucky), Memphis (Tennessee), Jackson (Mississippi), New Orleans (Louisiana), Galveston et Houston (Texas)!

Ichîn à San Antonio dans l'mais d'Novembre, i' fait caud comme en êté, - en êffet, ch'est l'êté toute l'année! Dans les rues, nous s'créthait en Mexique ou en Espagne.Ch'n'est pon drôle quand nou c'menche à considéther qu'y'a ieu au mains siex couleurs tch'ont volé au haut du mât dans la ville, - les couleurs d'Espagne, de France, du Mexique, de la République de Texas, des Etats Confédérés, et des Etats-Unis d'Améthique!

En tchînze chents, et d'avant chu temps-là, la ville 'tait un village des Indiens Cohuiltécans. L'histouaithe nouos dit qu'en seize-chent-nonante-iun, l's'Espagnôs tch'avaient fait la contchête du Mexique avaient des soudarts dans l'village, tch'avait non "La Villita." Quarante ans pus tard, tchînze familles Espagnoles des Iles Canaries y fûtent êtablyies par le Rouai d'Espagne, et pour chent ans la colonie fut gouvernée par des Messieux Espagnieaux, mais oulle eut à s'battre continuellement contre les sauvages app'lés "Les Comanches," et perdit hardi d'hommes. Et pis l'temps vînt qu'l'Espagne c'menchit à en perdre, et quand les Mexitchains lus dêcliathîtent indépendants en dgiex-huit-chent-vîngt-trais, San Antonio d'vînt partie du Mexique.

Ch'tait dans ches temps-là que l's'Améthitchains c'menchîtent à s'en v'nîn s'êtablyi dans la contrée. Les Mexicains n'aimaient pas ch'la, et i' lus mîntent à l's'embêter et en machacrer iun ou deux d'temps en temps. L's'affaithes empliéthaient d'pus en pus jusqu'en dgiex-huit-chent-trente-six, quand l'Président Santa Anna du Mexique env'yit eune armée de quatre milles soudarts pour dêtruithe l's'Améthitchains dans San Antonio, tch'i' s'mîntent à l'abri dans eune Mission Catholique app'lée "Alamo." I' n'taient que chent huiptante-deux soudarts et i' fûtent tous machacrées par les Mexitchains!

Dans l'mais d'avri d'la mème année, le Coronel Sam Houston ramâssit assez d'soudarts Amétchitchains pour battre l'armée Mexitchaine, et i' lus fichit eune slîndgieuse dans eune pliaiche tchi s'appelle San Jacinto, et l'etat de Texas d'vînt iun des Etats-Unis d'Améthique. Ach'teu, quand nou marche dans les rues d'San Antonio nou vait Améthitchains et Mexitchains touos mêlés ensemblye appathemment heutheux et prospéthes souos la couleu' d's'Etats-Unis!

En Jèrri, ch'est c'mode de saver l'Angliais et l'Français. Ichîn, ch'est l'Angliais et l'Espagno, qu'nou ouait partout. Fraînque Le Maistre es'sait un fameux compagnon a aver auve sé, li tchi sait l'Espagno mus qu'la majorité des Jèrriais n'savent le Jèrriais!

Dans la campagne ichîn l'tou, nous vai des vaques Jersiaises. J'vis eune drôle de vaque l'aut' jour, dgia. Oulle 'tait grise, - un gris quâsi blianc. Ou' pâlez d'ouothelles! Oulle en avait eune pathe de longues tchi pendaient quâsi sus san mûsé. Jé d'mandis a un gas tchi sorte d'vaque que ch'tait. I' m'dit que ch'tait eune Brahmîne des Indes, mêlée auve en Jèrriaise et eune vaque de Texas, et qu'nou l's'appellent des "Texas-Brahmînes." I' pathaît qu'ch'est un fichu bouan mêlange, - un tas d'viande et un tas d'lait par vaque!

Enfîn, - tout est mêlange en Améthique, - les races, les flieurs, l'architectuthe, et mème les vaques! Ch'est p't'êt' ieune des raisons pourtchi qu'un peuplye est dev'nu si grand et si fort dans l'couothant d'chent chînquante ans!

George d'La Forge
27/11/1948

No comments: