Monday 25 June 2012

La 4,000e Page Jèrriaise! - The 4,000th Page Jèrriaise!

Nou-s'a ajouôté la 4,000e page ès Pages Jèrriaises. Nou-s'avait chouaîsi pouor l'hounneu iun des dreins textes composés par EJ Luce. Le Procès du Prussien fut publié dans l'Almonnas des Chroniques de Jersey pouor 1919 - ch'est en tchi pouor la fîn d'l'année 1918. Ch'est eune pièche historique et pus à co satirique tchi r'présente les sentiments des cheins tchi bliaûmaient l's Allemands pouor la Preunmié Dgèrre Mondiale et tchi d'sithaient la peunnition des responsabl'yes. Il est en fait d'înmaginner un procès d'crînmes dé dgèrre contre un Prussien caricatuthé.

Pouortchi chouaîsi chutte pièche-chîn? La langue est un mio mêlée et n'est pon consistente - y'a des difféthentes formes et du Français là-d'dans. Mais ch'est ofûche eune èrprésentâtion raisonnabl'ye d'un procès en Jèrri dans tchi les formalités 'taient en Français et l'têmouongnage pouôrrait bein s'adonner en Jèrriais. Ch'est à r'mèrtchi étout la caricatuthe dé John Bull tchi n'est pon content d'faithe sèrvi l'Français en cour. Y'a tout coumme hardi d'întéthêt lîndgistique: un amas d'attestâtions d'mots tchi n'sont pon acouo dans les dictionnaithes (sustout d'la procéduthe légale) et par-dessus la corde y'a eune expression qu'nou n'a pon mênagi d'trouver autchun bord d'aut' et tchi sembl'ye înconnue ès Jèrriais d'achteu.
...de propos délibéthè et d'connivence avec gens d'san mépas, à ses gages et souos sa contrainte...
Ch'est chu mot mépas qu'jé n'connaîssons pon (pouor achteu). J'n'avons pon hardi d'descriptions en Jèrriais d'procès du temps pâssé - et les rapports sus les gâzettes donnaient quâsiment tréjous d's accomptes en Français ou en Angliais sans rapporter chein qu'nou-s'avait dit en Jèrriais. EJ Luce, li, 'tait un rapporteux en membre du jury d's Entchêtes, et j'pouvons nos fier sus ses usages, sans doute.

Autrément, l'annivèrsaithe du c'menchement d'chutte grande dgèrre nos tchèrra bétôt sus l'co, et pouor les cheins tchi sont à graie d's histouaithes dé chu temps-là en Jèrri, i' vaut l'co d'èrpublier des textes à propos.

Ouaithe qué Le Procès du Prussien prévîsse la settléthie d'comptes à la siette d'la dgèrre, l'auteu n'survêtchut pon pouor vaie l'Armistice. I' fut faûchi duthant l'êpidémie tchi couothait en Jèrri au mais d'Octobre 1918

The 4,000th page has been added to Les Pages Jèrriaises. The selected text is one of the last written by Elie (pen-name of EJ Luce). Le Procès du Prussien (The Trial of the Prussian) appeared in the 1919 almanac of the newspaper Les Chroniques de Jersey, and so was actually published at the end of 1918. A fascinating document of its time, it imagines a symbolic war-crimes trial of Prussian militarism, accused of causing WWI and committing atrocities. There's a certain wistful satire about the text which is an unusual mix of moral outrage and playfulness.

Since newspaper reports of trials were usually given in French or English without verbatim accounts of testimony in Jèrriais, we do not have many accounts in the vernacular of court procedure. This text is therefore valuable for the inclusion of legal terminology otherwise hitherto unattested. There is also a mystery word "mépas" in the text of which the general meaning is clear from the context, but seems to be unknown to today's Jèrriais speakers.

With the centenary of the outbreak of WWI approaching, it seems important to transcribe this text and make it more widely available as part of the documentation in Jèrriais of this period of history.

EJ Luce may have looked ahead to the aftermath of the end of the war in this piece, but he didn't live to see the Armistice (nor indeed the failure of the containment of German militarism). The flu pandemic hit Jersey in October 1918 and EJ Luce died at a young age.

No comments: