2012: Lettre Jèrriaise

 Lettre Jerriaise Lundi l'18 de Juin 2012.

 

Chést un pliaisi comme trejous pour mé Clifford Laisney d'vos presenter mes pensées aniet Lundi l'18 de Juin 2012.

 

I'a tchiques semaines inclu comme supplement dans la gazette du sé lavait imprinmé un accounte par la société d'l'héritage de Jérri.

 

Ch'tait une abbrévation d'un rapport décrivant la Bataille de Jérri.

 

J'avons tous tchiques recollections d'nos jours d'école et des leçons d histouaithe dépictant les differentes dguerres, et chu rapport m'intérressi hardi en me r'souv nons des evènements, concernant la Bataille de Jérri en 1781. Plusieurs occasions d'vant chutte invasion l'avait ieu d'escarmuches entre d's'invadeurs et les garrisons d'l'ile mème la raison pour les fortifications des chatés du Mont Orgueil et l'Chaté Elizabe et d'autres batteries l'tou d'l'ile.

 

La Bataille de Jérri ne dûthit que deux jours car l'ile tait bein fortifiée, i'avait des garrisons positionnées en plusieurs coins de l'ile, bein seux la communication n'tait pas au pas du jour d'aniet. nou liet pour instance que le recteu de St Martin entendit un sabat dũthant la niet et donnit l'orde de transporter l'cannon positionner dans l' cimetièthe j'usqua La Rocque en orde d'engagi les navigants ancrées dans la Baie de St Clément.

 

Le Lieut-nant Gouverneu du jour, le Majeur Corbet. ayant tait prins par surprinse, et cause de mènacements d'la part du Baron de Rullecourt et ses officiers cédit l'ile a l'ennmin, De Rullecourt lieu une proclamation a une foule assemblée dans la pliaiche du marchi, lus disant d'ertououné a lus siez ieux, de rester trantchille et que toute orde sethait ertou'née normale, si confidant tat l'baron que l'ile avait capituler tchi prins deux heûthes a survéillyi la ville de St Hélie

 

Dans l entretemps le Majeur Peirson tchi 'tait stationner a La Hougue a St. Pierre ayant entendu les nouvelles de l invasion décidi de d' fendre l'ile et d' payi homage au rouai et d'mème fit contacte auve les garrisons stationnées dans les paraisses et décidi d'faithe une attaque, ils entouothites la ville et pliaichies sus les hauteurs, il attatchites la ville des ramparts et graduellement entououthítes l'ennmi dans les contrées d'la pliaiche du marchi.

 

Quouaiqu' la bataille ne duthi qu'deux jours, le résultat d fatalités fut assez nombreux, les invadeurs souffrant envers cent morts le Baron Rullecourt ińclu. La garrison d Jerri perdites quarante soudarts.

 

Le Majeur Pierson tch'avait gouverner la bataille perdit sa vie étout et est enterré a l'églyise de St Hélie.

 

Chutte bataille est probabliement la pus importante bataille dans l histouaithe de Jérri, et nou se d'mande la position des iles de la manche si l'resûltat d'la victouaithe authait tait au contraithe.

 

L'otchûpation de 1940-45 est un autre examplye comme tchi acquo une fais j'avons survétchi not déstin. ch'est tout possiblye que selon pour not liberation des forces étrange, les iles authaits caler a une autorité aliène et Dgieu seulement sait tch'est q'l'av'nin authait produit.

 

 Mais ch'en tait pas pour etre et i'a tchinze jours passé j't'aimes ordgilleux d'pouver joindre dans les celebrations du jubilé diamond de not reine et duc Elizabé la deuxième, ch'la, fût une occasion suprême et comme citouoyens loyales j ermercions Dgieu pour aver donner a la reine bouonne santé et jugements dûthant ses soixante années sus la trone.

 Achteu une announce concernant L Assembliée d'Jérriais.

Samedi l'30 de juin l'autha une promen nade le tou d l'ile, les carosses sortithonts du priory au Creux du Dgiablye a deux heuthes et d mie, et r'touonnant d vers chinq heûthes, suivit par un r pas. Pour reserver vot pliaiche, prix tchinze louis, vos pliait ti donner un coup d'télephone a'Barbara et Tony Le Geyt sus numero 862861.
 

Mercie pour vot compagnie aniet. J vos souhaite a tous une bouonne semaine.
 

A la prechaine.

Clifford Laisney