1978: Vielles nouvelles

 Vielles nouvelles

 

Fort Lauderdale, Florida,

USA.

 

Lé 14 dé janvyi, 1978.

 

Moussieu l'Rédacteu,

 

Ch'n'est pon eune achie dé “Weekly Posts” tch'est v'nue chutte sémaine. Ch'est eune avèrse! Trais en même temps, les cheinnes du 28 d'octobre et du quatre et onze dé novembre, 1977.

 

La preunmié chose qué j'ai fait 'tait dé r'garder les noms dans la colonne des naîssances pour vaie si la race Jèrriaise continnue à en pèrdre. Dans la gâzette du 28 d'octobre, sus seize naîssances i' n'y'a qu' un seul vrai nom Jèrriais. Dans la cheinne du 4 dé novembre, sus neu naîssances y'en a trais tch'ont des vrais noms Jèrriais, et dans la cheinne du onze, sus quatorze i' y'en a quatre. Sus les 39 naîssances i' n'y'en a qu' huit tch'ont des vièrs noms Jèrriais; ch'est en tchi ou pouvez vouos înmaginner combein longtemps qu' Jèrri s'en va êt' Jèrriais!

 

Ch'est mangnifique dé pouver liéthe entouôrre Jèrri quand même qué ch'est des vielles nouvelles. Ouaithe qué j'sis hardi en r'tard, j'veur féliciter l'Juge Leslie Picot à l'occâsion dé s'n assèrmentâtion comme Juré de la Reine. Ch'est seux tch'i' s'en va êt' utile sus l'Banc d'Justice. Etant expèrt dans les chiffres, dgia, il faut espéther tch'i' né s'sa pon trop “enchifréné” quand veindra l'hivé. Mais j'sis content d'vaie un aut' Jèrriais porter la rouoge robe. J'pense tchi dait y'aver ieu un aut' Juge êlu d'pis Moussieu Picot. J'ai envie d'vaie la ch'est homme ou femme, mais Bouan Dgieu sait quantchi qu' la gâzette tchi m'ditha ch'la arrivetha ichin.

 

I' faut féliciter lé “Water Inquiry Board” pour aver èrquémandé d'sauver la belle vallée mênommée “Queen's Valley” d'înnondâtion par lé Départément des Ieaux. Ch'est un soulagement d'saver tch'i' y'a acouo assez d'pèrsonnes tch'ont l'ambition d'vouler prêsèrver la bieauté încompathabl'ye dé la campangne et d'nos vallées à la pliaiche dé les n'yer pour laver les touristes. I' faut espéther, à ch't heu, qué L's Etats s'en vont adopter les r'quémandâtions du “Inquiry Board” et r'soudre lé problème dg'ieau eune fais pour toutes.

 

En pâlant d'félicitâtions, ch'est acouo l'Député David de la Haye d'St. Ouën tch'en méthite lé pus. San discours dans L's Etats au sujet d'la brûl'lie d'foustra dans Les Landes à St. Ouën 'tait supèrbe et valait la peine dé liéthe dans la gâzette. Les St. Ouënnais daivent êt' ordgilleurs dé lus Député. Ch'n'est cèrtainement pon d'sa faute qué san plaidoyer n'en gangnit pon, car i' dêtaillit touos ses points d'ardgûment à mèrveil'ye. À ch't heu, i' faut qu' les Landîns lus accouôteunment à l'odeu d'brûlîn, et ch'est seux qu' chutte partie-là des Landes s'en va êt' saccagie par les gros camions tch'apportent lé foustra touos les jours, et qu'ou r'sembliétha à un camp d'batâle à la fin d'l'année.

 

Il' ont ieu la chance, les Landîns, d'aver 'té laîssis trantchil'yes dans lus coin d'l'Ile pour longtemps dépis s'n envahissement par les Angliais ouaithe qué chutte trantchilité ait 'té m'nichie maintes fais par les amateurs d'amusement pour les touristes. Mais l'temps est v'nu tch'i' c'menchent à pèrdre lus isolement et souffri du rêsultat touristique comme les aut' parties d'l'Ile.

 

Un aut' St. Ouënnais a drouait à des félicitâtions étout. Ch'est l'Sieur Adolphus England, pour aver si bein organisé lé championnat înternationnal du “Tug of War”. Et i' faut féliciter l'êtchipe Jèrriaise pour aver finni chîntchième en compétition auve touos les pays prannant part.

 

J'sis amusé d'vaie qu' les boeufs Jèrriais sont dêcliathés officiellement par la Cour Rouoyale êt' dangereux. J'criyais qué ch'tait bein connu par tout l'mode en Jèrri, comme jé l'disais dans ma lettre du 24 dé septembre, mais j'sis bein content d'vaie qué la Cour est dé m'n avis étout. Et j'tais bein întérêssi d'liéthe dans la gâzette qué nouos touothés sont appathentés ès fanmeux boeufs d'Espangne tchi font lé “Combat des Tauraux” dans l'Thiâtre des Boeufs. Né v'la d'tchi qué jé n'savais pon. Ch'est vrai qu' nou-s-apprend tchiquechose touos les jours.

 

J'vai tch'i' s'en vont dêpenser trente-chîn mille louis pour êlaîzi lé bieau p'tit mont à La Haule à St. Brélade. J'sis absolûment d'l'avis dé Messire Robert Mathet et d's autorités d'chutte pâraisse-là qu' ch'est un travas tchi s'en va d'sahonter la bieauté dé chutte belle pétite vallée, et eune dêpense tchi n'est pon nécessaithe. Quant au mont, i' n'y'a qu' a êtablyi eune vitesse dé dgiex milles à l'heuthe pour un p'tit but pour sa seûtheté en moto. Mais ch'est trop sîmpl'ye comme solution!

 

George d'La Forge.