2012: Lettre Jèrriaise

 Lettre jerriaise lundi l'17 de septembre 2012.

 

Aniet lundi 17 de septembre 2012 et chés un pliaisi comme trejous pour mé, Clifford Laisney d'vos presenter la Lettre Jerriaise.

 

Quouaiq' j'en prends pas des marches a pid comme j'faisaits l'a tchiques années, j'tache quand-même de marchi l'tou d'es gardins ichin à Oaklands deux fais par jour. Quand nou s'arrive d'une certaine âge, ch'èst hardi important d'garder les jointes émouvantes, la cirtchulation en controle, et la p'tite matchièthe grise du chervé active en orde de rejoui d'une certaine qualité d'santé.

 

Devant l'development de l'établissement eyou que je d'meuthons, 'Oaklands' au Village Victoria, 'tait érconnue comme iune des pus grandes fermes a bêtes de l'ile, dans la propriété du Moussieu John Perree, erconnue pour une des pus fameuses lignes de bêtes en Jerri,  les el'veux b'êtes v'naits de tuous les coins d'l'ile auve lus animaux en orde de prendre avantage, du sang d'la race, et d'introduithe une nouvelle ligne et pédigris dans lus troupé d'animaux.

 

Le développement d'aniet consiste de 32 demeûthes et couvre envithons sept vregis d'terrain.

 

Autrement que rejouithe de l'éxercice i'a etout hardi d'bieauté a surveillyi, les bouaiss'ies consistes de plusieurs examplyes de bonais agis au mins d'chent ans. A chûtte saison d'l'année auve les bouis couverts de feuillage, et l's'herbages si verts cause de la mouoilletuthe ch'été, ch'est vraiment un spectaclye à surveillyi. L'hiver passer, j'avons rempliaichi tuous s'arbustes entououthant la propriété auve des pliantes perenielles, donnant une appathence d'un gardin d'caumièthe. Un gardin d'chutte graneur d'mande hardi d'travas et d'soin, et j'sommes chancceux d'aver un concierge tchi prend hardi d'intêthet d's'otchuper en gardant l's'alentours en orde.

 

Ayant une telle bouai'ssie, les fossées et gardins attracte une variete d's'oiseaux et p'tits animaux. J'sommes entououthées d'faisans, lapins, herissons et d'étchutheus, et tous onts l'air de d'meuther d'une existence amicablye.

 

Les gens pus actives peuvent prendre part d'un jeu d'croquet sus les parterres, pétânque sus l'pavage, et même une ronde ou deux d'mini-golf. Et par dedans i'a une tablye à paume et billiards et differents jeux d'tablye. I'a tchique chose pour tuous les gouts dependant la mobilité.

 

Aujourdaniet, quand nou's arrive a une certaine periode de la vie, nou's a l'inclin de d'cherchi un logement pus apropos des circunstances et a propos d'nos besoins, et ches developements, comme tuous developements de paraisse pour les citoyens de sénorité resoude le grand problème de compagnie et d'assuthance.

 

Comme mé, j'pense que la majorité d'més écouteurs aniet passe pus d'temps assis dans la grande chaise que dans l'clios, et c'ha 'tait l'opportunité ches dernier s'm'naines de nos rejoui des Jeux Olympiques. L'organisation de ches jeux historiques a 'tait superbe, et l'Anglieterre peut etre bein orguillieuse d'avait accomplyi un tel, au sport de lus chouaix, en orde d'accompliyi delus possiblye. Ch'tait bein d'vaie la camarderie entre les competiteurs, lus entre felissitant, l'excitement des audiences pressant lus r'presentants auve lus encououagement ajouter les competiteurs de pousser chu p'tit mio d'extra si important.

 

Oui, les deux evenements olympiques et olympiques pour les d's'avantagis onts 'tait bein erchus, et j'les felissitants pour aver donner quatre semaines de pliaisi.

 

J'vos r'mercie, bouonne gens pour vot attention aniet. J'vos souhaite a tous une bouonne semaine, espethant qu'apres un ete d'ssapointant cause de la fraid et mouoillétuthe, j'allons rejoui d'un p'tit ete d'St Martin.

 

A la prechaine.

 

Clifford Laisney