2008: Lettre Jèrriaise

 Samedi L'5 d'Avri 2008. Lettre Jerriaise.

 

Samedi l'5 d'Avri 2008 et ch'ést Clifford Laisney tchi vos offre le bonjour en vos presentons tchiques pensées au moyen d'la lettre Jerriaise.

 

PAQUE MARCHINNE, PESTE, D'GERRE OU FANMINNES, est un diton bein connu par les gens auve une connaissance de la langue jerriaise. Oui, j'avons celebrer la saison d'Paque hardi heûsi dans l'mais d'Mars c'h't'année, et je setha bein d's'années devant qu'les fêtes lus present'tons aussi heûsi.

 

Au sujet d'Paque, nou M'dit qu'les services en eglyise et chapelles onts 'tait hardi bein supportées, et mème une certaine eglyise fut forchie d'erfuser entrée a d's'adouathateurs cause d'étant compliete. Un malheu pour les gens erfusées entrée, mais un signe et réalisation d'l'importance de la fête de Paque quand je celebrons un nouvieau c'mmenchement, une nouvelle vie.

 

Quouaiq'u ch'n'est qu'un diton, la réalisation de Paque Marchinne, Peste d'gerre ou fanminne, est evident quand j'nos souov'nons des consequences des d'gerres tchi continusses en Iraq, Afganhistan, parties d'l'afrique, et dreinement les troubles tchi s'appathe en partie d'la Chinne. Les resûltats d'fanminne et manque de medicaments en differentes parties du monde sonts des sujets de tchi qu'je sommes bein fanmilyis. Et achteu une plague de troublye dans nôt environment, ichin en Jérri. Je sommes a subithe a d's'evenments inconnus dans l'histouaithe de l'ile. Jerri, une petite ile inconnue dans bein des parties du monde a soudainement fait s'n'appathence sus l'globe, mais malheutheusement pour les mauvaises raisons. L's'evenments soupconneuses des dreins mais onts attither les journalistes nationalle tch'onts peint un portrait d'suspence, et d'méfier parmi l's'habitants. Pour le present i'a un sentiment d'un nuage sombre tch'en'vlope l'ile, mais couomme i dises, 'Chaque nuage a une erdoublieuse d'argent, et j'espethons que quand toute la poussiethe s'authe etablyie, qu'les journalistes, étchippe de télevision et gens tchi condanme l'ile et l's'habitants, erv'en'thons peindre un different portrait d'Jerri, un Jerri pliasant, une pliaiche de bieauté, des gens tch'offre la bein_v'nue. Puis_que Jerri, perle des iles fait s'nnanounce sus un globe d'amièthi, et que je r'gagnons not réspé.

 

Quouaiq'u je condamnons toutes les allégations d'punition et d'injûthes rapportées par les temoins tch'onts souffert cause des malfaiseurs des circonstances des dreins mais, j'en pouvons pas selon penser qu'au jour'daniet, la balanche d'erprimande sustout parmi les jeunes est cause de hardi d'crimes et d'sabotage rapportées sus les gazettes et television.

 

Dans l's'écoles, par exemplye, i faut qu'un maitre es'cait bein ergardant d'la manniethe tch'il administre punition a un élève cause d'la confrontation des pathents. Les 'drouaits humains' sont deux mots d'importance dans lus vocabulaithes. L'indûlgence des cours sonts pas une deterrant es malfaiseyrs. Quouaiq'u j'pouvons pas ram'ner l'foûet comme punition, ch'est seux qu'un délinquent pens'thait deux fais d'vant er'offenser si la louai 'tait en existence. J'sis seux qu'une pit'chinne ou p'tite cliamuse quand j't'aimes mousse nos faisait pus bein qu'd'ma et souvent nos apprenait une leçon. J'viyons etout sus l'télevision des programmes tch'onts l'air de demonstrer la necassité d'porté armes ou coutieaux comme defense. En orde d'etre hors d'embarrassement a lus pathents, les efants sonts enviés a lus chambre éyou tchi passe lus temps collés d'vant la boête a r'garder toutes sortes d'niolin. L'unité d'fanmillye en bein des cas n'existe pas.

 

Cértainement, et Dgieu mercie, ch'n'est qu'une minorité d'la jeunesse tchi cause troublye, et ch'n'est pas juste de peindre tous auve la meme bringe. Les temps onts changi d'pis ma jeunesse et j'ermercie Dgieu que j'nai pas la résponsibilité d'él'vé une jeune fanmilly dans ches temps d'achteu.

 

Mais j'me d'mande, J'tais ti un garçon modele dans m'n'el'vage.

 

Mercie pour avait écouté a mes pensées. J'vos souhaite tous une bouonne semaine remplyie d'jouaie et d'éspethance.

 

A LA PRECHAINE.

 

Clifford Laisney