1964: Félicitations!

 Félicitations!

 

En Améthique,

Lé 3 d'juillet, 1964.

 

Moussieu l'Rédacteu,

 

J'm'en vais r'mett' la siète dé m'n histouaithe du viage en Australie à eune aut' sémaine, viyant qué j'voudrais vouos êcrithe deux mots pour vouos dithe qué j'veins d'êrchéver la gâzette hebdomadaithe “The Jersey Weekly Post” du 30 dé mai, 1964, et qué j'sis êmérveilyi en liésant lé r'cit d'la visite dé Moussieu l'Bailli L'Masuthi et sa charmante dame, et du Connêtabl'ye Ryan, au Nouvieau Jèrri à l'occasion dé san trichent'naithe. Combein d'fais qu'j'ai êprouvé à faithe comprendre es Améthichains l'tou d'mé comment qué l'Nouvieau Jèrri est v'nu à aver chu nom-là! La grand' partie des gens d'ichîn n'savent pon qu'y a des Iles dé La Manche en Europe. Et un tas n'savent même pon qu'y en a l'long d'la côte dé La Califournie! Mais i' connaissent tous la vaque Jèrriaise, et j'finnis tréjous par lus dithe qu'oulle est ma couôsinne gèrmaine!

 

Lé Bailli L'Masuthi fit un si bieau discours dévant la Chambre Législative dé “New Jersey” qué j'l'ai liu chînq ou siex fais. Il est un mangnifique Ambassadeu pour nouot vièr Jèrri! Ch'est seux qu'les grosses têtes du Nouvieau Jèrri n'ouaïent pon un orateur comme li bein souvent. Ch'n'est pon ravissant qué l'rapporteux Lucas nouos dit, en Angliais, tch'i' “Stole the Show!” Ch'est vrainment d'la chance pour Jèrri tch'i' n'restit pon en Angliétèrre auprès la dgèrre. Dans chu cas-là, l's Angliais en éthaient fait un Amitha, ou i' l'éthaient env'yé à l'êtrangi comme Ambassadeu, et l'Ile éthait pèrdu l'bénéfice de ses sèrvices et d'sa grand' capacité comme Bailli et Chef Magistrat!

 

Lé Connêtabl'ye Ryan fut à la hauteu d'sa tâche étout, et la pâraisse dé St. Hélyi peut êt' ordgilleuse dé li. Sa r'mèrque qué d's agents d'la police dé New York ont san nom 'tait bein à propos. Y'a tchiques années, y'avait tant d'Irlandais dans chutte police-là et parmi les politiciens et fonctionnaithes dé New York, que nou ouïyait dithe qué la cité appartenait ès Juis et 'tait gouvèrnée par l's Irlandais! Et ch'est acouo vrai aujour d'aniet qué dans la politique dé chu pays-chîn, autcheune pèrsonne auve un nom Irlandais peut gangni eune êlection. Ch'est-en-tchi, gardez l'Connêtabl'ye Ryan en Jèrri. S'ou' continnuez à l'env'yer par ichin, il' en f'thont un Chef dé Police à New York ou New Jersey!

 

Et pis, étout, i' faut que j'félicite lé Sieur Max Lucas pour lé supèrbe compte-rendu dé la visite. Du tout c'menchement jusqu'à la fîn, san rapport est êcrit d'eune mannièthe chronologique, lucide et întérêssante. Sa description des visites à difféthentes pliaiches et des rencontres et discours entre vièrs et nouvieaux Jèrriais est si bein êcrite qué nou s'créthait quâsi sus les lieux en la liêsant! Et les portraits sont bein arrangis.

 

En pâlant d'portraits: Un tas d'Améthitchains à tchi j'ai montré la gâzette m'ont d'mandé pour tch'est qu'la couleu d'Jèrri (montrée dans la gâzette à côte du “Union Jack” à Batsto) est La Crouaix d'St André. Né v'là eune chose dé tchi jé n'peux pon lus en dithe en bouan français sans aver l's êcrituthes du défunt Majeur Rybot d'vant mé, mais v'la tch'i' m'ramémouaithe qué quand j'tais à Montréal, au Canada y'a un coupl'ye d's'maines, lé gouvèrnément à Ottawa 'tait en trains d'adopter eune couleu partitchulièthe, - trais rouoges fielles d'êrabl'ye sus un blianc fonds, atout deux bliues bârres, ieune début dé chaque côté des fielles, pour intèrpréter lé fait qué l'pays s'êtend d'eune mé à l'autre. V'la tchi m'fait penser qué Jèrri dev'thait adopter eune nouvelle couleu étout, et qu'ou' dev'thait êt' eune copie d'la cheinne tch'est dans la Chambre d's Etats - les trais lions (ou est-che des léopards?) dé Nouormandie!

 

À Montréal, j'allis vaie un fanmeux vièr Jèrriais, lé Sieur Peter James Fiott, oncl'ye d'mes bouans anmins Arthur et Monica Fiott, d'La Mouaie, à St. Brélade. Né v'la un Jèrriais d'la vielle rachinne tchi marche acouo dêliêment à l'églyise au dînmanche sus ses pids d'drièthe sans autcheune aigue, à l'âge dé nénante-siex ans! Il en étha nénante-sept dans l'mais d'dézembre. Jé n'pouvais pon en r'vénîn! J'vouos asseûthe tch'i' n'pathaît pon fort pus vyi qu'mé! Il a acouo toutes ses fatchultés, et a eune belle main d'êcrituthe. I' pâle lé Jèrriais aîsiement et couothamment, et i' liut - en haut - ieune des lettres du bouanhomme George dé d'dans la gâzette hebdomadaithe quandi que j'tais auve li. Il a passé la grand' partie d'sa vie pour les Robîns à La Côte et à Caratchette. À ch't'heu, i' d'meuthe auve sa fille, Madanme Veuve Le Seelleur, à Montréal. J'êprouvis à l'persuader tch'i' dev'thait visiter Jèrri acouo eune fais. J'sis seux tch'il en est bein capabl'ye!

 

Et r'vénant à la gâzette du trente dé mai: V'la tchi m'a fait grand pliaîsi, étout, d'liéthe qué Moussieu l'Douoyen Giles et man vièr anmîn l'Abbé Marcel Lelégard ont fait la prièthe ensembl'yes dans la vielle églyise dé Bréville en Nouormandie. V'la tchi s'en va prouver ès Saints Brélade et Hélyi qué l'Concile Oecuménique n'a pon 'té convotchi pour rein!

 

George d'La Forge.