1973: La dgèrre des Boèrs

 La dgèrre des Boèrs

 

Trenton, Michigan,

U.S.A.

 

Lé preunmyi d'dézembre, 1973.

 

Moussieu l'Rédacteu,

 

“Les Jèrriais n'sont pas Angliais mais, dgia, i' sont pus Britanniques qué l's Angliais ieux-mèmes!”, nouos dît Papa eune séthée quand j'tions à l'entou d'l'âtre et qué j'lî d'mandis si j'tions Angliais. J'n'avais qu' neuf ans dans l'temps et la dgèrre des Boèrs dans l'Sud d'l'Afrique 'tait en allant. Ch'tait un temps hardi întérêssant pour nous mousses. Nou chantait “God Save the Queen” en allant à l'êcole, et nou ouïyait les grand' pèrsonnes tch'avaient des pathents ou d'la fanmile tch'étaient soudards pâler d'chein tch'i' s'pâssait sus l'camp d'batâle. Nou viyait des portraits des régiments tchi s'embèrtchaient pour l'Afrique, et l'portrait des joueurs des p'tits tambours, dans lus rouoges câsaques, tch'étaient partie d'la mûsique à la tête des régiments, n'faîsait vouler êt' soudard mé-mème.

 

“Pourtchi qu' tu mé d'mandes chutte tchestchion-là?”, Papa continnuit.

 

“J'voulais saver s'i' faut êt' Angliais pour s'engagi soudard,” j'lî dis, “car j'pouôrrais p't-êt' m'engagi pour jouer lé p'tit tambour s'i' prannent des Jèrriais.”

 

“Man pouôrre garçon,” i' m'dit, “tu'es bein trop janne pour penser à d'ité. Les garçons qu' tu vai auve les p'tits tambours ont dans les seize ans, ch'est seux. Et i' sont à faithe dé l'êcollage dans lus régiments en mème temps tch'il' apprannent à mannier l's armes et êt' soudards. Lus temps d'sèrvice dans l'armée né c'menche pon à conter d'vant tch'il' aient dgiex-huit ans, et i' faut penser tch'i' n'îthont pon à la dgèrre à mains qu' ou duthe pus d'deux ou trais ans.”

 

“Pourtant,” j'dis à Papa, “j'ai veu un portrait d'la Batâle dé Jèrri, et nou vait un soudard, à côté d'san tambour, tch'a 'té bliessé.”

 

“Eh bein,” i' m'dit, “les temps ont changi d'pis 1781 et la dgèrre né s'condit pon à ch't heu comme ou l'faîsait dans chu temps-là quand les soudards allaient à la rencontre dé l'ennmîn tambours battant et en habits d'parade auve la baïonnette au but du canon. À ch't heu ch'est difféthent. I' s'entre-tithent d'un but l's uns d's autres, et les tambours restent driéthe. Et il' ont abandonné les rouoges câsaques sus l'camp d'batâle viyant qu' nou peut les vaie d'un but et mither d'ssus. I' s'habilyent en manniéthe dé gris-brunâtre, à ch't heu, eune couleu appelée 'kâki', mais jé n'sai pon où'est tch'il' ont 'té dênichi chu drôle dé nom-là. P't-êt' dans les pays cauds. Ch'est à bein près la couleu d'la campangne dans ches pays-là.”

 

“Mais un Jèrriais peut-i' s'engagi dans l'armée Angliaîche?” j'lî d'mandis.

 

“Oui dgia,” i' m'dît, “y'a pas mal dé Jèrriais d'dans à ch't heu, et un moussieu d'nouot' pâraisse dé St. Ouën veint d's'y engagi pour la duthée d'la dgèrre. Ch'est Moussieu Adolphus John Bauche Arthur. Il est dans les soudards à j'va, j'ai ouï. Ch'est admithabl'ye d'vouler êt' soudard et s'battre pour lé bein-être dé la Reine et du Rouoyaume, et les Jèrriais ont tréjous 'té prêts à faithe lus d'vé d'chu côté-là.”

 

“Mais P'pèe et m'n oncl'ye Ouinn'teur et m'n oncl'ye Adolpheusse sont soudards dans des temps,” j'dis à Papa, “et j'aime bein à les vaie dans lus rouoges câsaques. S'en vont-i' y'aller, à la dgèrre?”

 

“Nannîn,” i' m'dît, “tan p'pée et tes oncl'yes sont soudards dans la Milice Rouoyale dé Jèrri, et la Milice fut orgânisée pour la d'fense dé l'Île. Ou n'est pon appelée à aller en dgêrre en d'houors dé Jèrri, mais v'la tchi n'empêche pon un milicien d's'engagi dans l'Armée Angliaîche en temps d'gèrre ou autcheun aut' temps.”

 

“Mais, Papa,” j'lî dis, “si jé n'sommes pon Angliais, tch'est qué j'sommes?”

 

“J'sommes dé la vielle race Nouormande,” i' m'dît, “d'la race dé Dgilleaume lé Contchérant tchi fit la contchête d'Angliétèrre en 1066 et d'vînt Rouai d'Angliétèrre en mème temps tch'il 'tait Duc dé Nouormandie, et j'sommes officiellement 'Anglo-Nouormands' et sujets Britanniques.”

 

J'm'èrsouveins, d'chutte convèrsâtion-là - tch'iut lieu y'a pus d'septante ans - comme si ch'tait aniet, et à la fîn d'la dgèrre des Boèrs j'eus l'occâsion d'vaie Moussieu A. J. B. Arthur, tch'était r'venu sain et sauf, dans s'n habit d'soudard à l'Églyise dé St. George, un habit tchi m'pathut drôle viyant qué ch'tait l'nouvieau kâki et qu' j'avais 'té accouôteunmé à vaie les soudards en rouoges câsaques, mais ch'tait tchiquechose d'èrmèrquabl'ye d'vaie un homme tch'avait 'té à la dgèrre. Jé n'lé r'vis pon pour bein d's années, pon bein longtemps d'vant san décès dans sa huiptantaine, siez Moussieu Fraînque Hâcou, dé mémouaithe respectée, à L'Êta.

 

J'pensais à tout chenne dreinement quand j'tais en Jèrri et qu' j'allais à St. Brélade par La Grand' Route des Mielles et L'Mont à la Brune et qué j'viyais “Spion Kop” en pâssant. Dans l'temps d'la dgèrre des Boèrs nou-s-avait veu l'portrait du vraie Spion Kop en Afrique dans eune gâzette appelée “Police Gazette”, et j'pouvais vaie l'nouôtre, tch'il y r'sembliait, dé la f'nêtre dé ma chambre à La Forge, et m'n înmaginnâtion enfantinne dé chu temps-là m'faîsait penser qué j'viyais un mio du camp d'batâle du Transvaal!

 

George d'La Forge.