Lettre Jerriaise Samedi l'13 Juillet 2002

 Lettre Jerriaise Samedi l'13 Juillet

 

Aniet, l'13 de Juillet 2002, la lettre jerriaise est présentée par Clifford Laisney. J'vos souhaite a tous l'bonjour èspethont qu'ou r 'allez rejoui d'une bouonne semaine en meme temps prennons avantage d'la saison t'chi par d'ichin setha pas èrconnue pour sa chaleu brulante.

I'a tchique semaines le Sieur Percy l'Masuthi écrivi dans la gazette du sé une articlye hardi interessante concernant les couotages d'écoles privées dans l'temps passé. Ch'la m'fit penser que dans m'n'écritouaithe j'avais trais journals de mon grand_pethe datant l's'années 1897, 98, et 99 d'étaillons ses travaux jour par jour.

Papa et Maman Langlois (pathents d'ma methe) d'meuthaits és Varvots dans la Paraisse de St Louaithains. La vie dans lus jeunnesse n'etait pas aisie, et comme la couôteunme de chutte génethathion ils avaits d'nombreux d'enfants. N'oubliez pas tchi y'n'avait pas d'television pour les distracter dans chés temps la!

J'ai bouonne recollections quand j'tais mousse de mes grand!pathents quand i v'naits siez nous a St. Jean pour plusieurs jours duthant les fêtes de noué. J'me rappelle si bien d'lus p'tit tchian tchi s'app'lé Dick. Ch'tait lus compagnon dans lus temps d'veiillisement. Comme tchi comme mousses t'chils avaits appathence anciens trejos habillyis en nier, att'lés j'usqués pids. En comparaison j'panse bein q'nos p'tits enfants nos considethes anciens étout qu'ouaiqu not habillyement est pus moderne et favorablye.

En r'touonnant au sujet des journals de mon grand_pêthe, Papa Langlois était maître tchèrpentchi et au meme temps t'nait la p'tit ferme des Varvots. I travaillaits d'long jours, siez jours la S'n'aine. Le Dinmanche etant l'jour de r'pos, comme bouons chrêtiens la coûteunme 'tait d'aller a La Chappélle Des Siez Rues.

Papa empliyer deux s'hommes de vacation et un apprenti. Accordant ses journals son temps etait chergi a trais ch'lins diex_huit sou par jour, et un ch'lin siez sou pour l'apprenti.

 

Une livre d'cliou authait couoté siez sou, deux livres d'peintuthe, un ch'lin.

Une ozaine pour Missis Surcou _douze sou.

Une neuve chiviethe pour Winter_Pipon_djiex_huit ch'lins.

Une trappe pour barrique a épu_sept ch'lins et d'mi.

Une quarte d'huile de Linnette_douze sou.

Deux livres d'poté_siez sou

Un tro a petri l'pain_trente chinq ch'lins.

Affiler une scie_dgiez sou.

Un tro a couochons_quat'_ch'lins

Un drécheux toup compliet, verni inclu_quat'louis et d'mi.

Une casse de f'nêtre compliete auve sèche_huit ch'lins.

Une porte auve frême_tchinze ch'lins.

Deux hauches a hernais_trais ch'lins et d'mi.

Une 'Rolling Pin' pour Missis Surcou_huit sou. (J'pense que ch'tait p'tete pour a sobri son bouton_homme!.

Au c'mmenchement d'la saison d'patates en 1899, un cabot d'patates lus vendaits deux ch'lis et siez sou. (envers siez louis l'tonné)

Le 28 d'Avri 1898, la recoltre de patates fut exterminée par une glee. Le temps avait l'air pus sevethe dans chés temps.

I'a plusieurs entrées r'cordons la nécéssité et l'couôtage d'acater des bottes et souliers pour les efants. Une pâthe de souliers authait couoté envers quat'a chinq ch'lins la pâthe, une somme tchi r'presente les gages d'un homme pour un jour.

Parmi les feuilles des journals j'ai trouvé etout des comptes d'enterrements datées de 1916 a 1927.

Une enterrement contenant la herse en verre, hallé par deux niers chevaux authait couoté envers douze louis tout compliet.

Detaillyi: Un coffre en orme. quat a chinq louis.

Herse et cocheu! !deux louis et d'mi.

Trais carosses_Deux louis et d'mi.

Le Rècteu_chinq ch'lins. Le Fosslyi_tchinze ch'lins.

L'Announce sus la gazette_trais ch'lins.

Toutes arrangements pour l'enterrement, comprenant, écrithie d'cartes, avêrtissement du décédé etc. Deux louis et d'mi.

Ue grande diffethence de couotage a compathaitre aujourd'aniet. Douze Louis sethait pas suffisant d'announcer d'decés sus la gazette.

Comme tchi qu'la vie a changi les dreins chent ans. Un louis a trente ch'lins la s'm'naine etant les gages du gagne_pain. Pas d'support et d'subventions du gouvernement.

Quouiq'u la vie etait dùthe, y'avait un raport d'amiétchi entre fanmillyes que malheuthesement j'avons perdu.

Quand même, comme bouons jerriais, j'pouvons etre erconnaisants a nos anchêstres pour l'examplye, les sacrifices tch'a 'tait nôt hethitage avau les gènethations. Puis_que j'pouvons passer tchique petits encouothagements et siens tchi nos suives.

Une announce concernant l'Assembliée D'Jerriais. La prechaine réunion autha lieu Samedi tchi vint l'20 d'Juillet.Ch'est un r'pas a la broche dans l'centre d'la Trin'té (driethe la Salle Pariossialle) c'mmenchant a sept heuthes. Le prix £6. et j'espethons d'vos i vaie.

Achteu en finnissant, J'souhaite a tous les gens tchi s'trouve en p'tit mio souos l'temps, un mot d'encouthgement espethont qu'el restant d'l'été setha suffitant d'vos r'mettre sus la route de bouonne santé.

A LA PRECHAINE

 

Clifford Laisney