Lettre Jerriaise Dinmanche le 29 de Novembre 1998

 Lettre Jerriaise Dinmanche le 29 de Novembre 1998

 

Bonjour a tuous l's auditeurs de Radio Jérri tch'écoute la lettre Jerriaise aniet Dinmanche le 29 de Novembre 1998. Chés Clifford Laisney tch'a l'pliaisi d'vos la présenter.

 

Mardi, j'embértchions sus l'dérnier mais d'l'année, et dans p'tit d'temps je sethons a celebrer les fêtes de noué. Chés dans chu cas actuel que'je veurt announcer es membres et anmins de L'Assembliée d'Jerriais que Samedi tchi vint le 5 dé Décembre est l'occasion du Service de Noué.

 

Chu service suivit par souper etha lieu dans l'Eglyise de St André c'mmenchant a sept heuthes et d'mie du Sé., et l'Conmité Dramatique de L'Assembliée vos offre a tous la bein v'nue.

 

La s'm'naine tchi vint d'se passé j'avons rejoui des celebrations d'L'Eisteddfod et j'veurt, offri mes félicitations a tous tch'onts pins part, du pus jeune jusqu'a pus ancien. Ils ont tous fait d'lu possiblye de nos amuser et chés vraiment excitant d'vaie tchi i'a une erprînse dans not ancienne langue, et j'espethe pour sa continnuation.  

 

Ch'n'est pas m'n'intention a matin d'entrer dans une distchussion d'politiques, mais j'en pouvons selon ermertchi les lignes en tête sus la gazette du sé, les nouvelles que j'entendons sus l'radio ou television, concernant l'gaspillage de monnaie dans l'ile sus hardi d'projets que j'considethe inutile et impopulaire. Oui, souvent nos Etats ont l'air d'enbertchi sus des projets grandioses sans avait considether l'réffet, et l'résûltat est qu'el demartement d'caltchule est est compliètment hors de raison. Dreinment sus la gazette du sé, j'avons liu gentiment d'corréspondence écrite a l'Editeur concernant chu grand batisse situé a West Park, CONNU COMME 'Inn on the Park', aut fais app'lé 'West Park Pavillion.

 

Hardi d'gens onts d'jouaiyeuses memouaithes de lus jeunes temps, dansant a l'accompagnement d'un bouon orchestre, et pus tard ch'tait une v'nue d'concerts d'été, expositions etc.

 

Pour plusieurs années le batisse est dév'nu une pliaiche solitaithe et amesuthe que l'temps s'passe, tant pus qu'el batiment devint en d'lacres.

 

Le temps est v'nu qu'el propriétaithe s'est decider d'le vendre. Tch'est q'j'allons en faithe de chutte empliaichement? Y'a ieu suggestion d'l'abbattre et construithe des apartments luxe. Une assez bouonne idée, belle veue, un coup que tuous les travaux d'récliammation sèthons finis. Y'a une possibilité qu'la veue permetterai visage du Chaté Elizabé, dependant la vitesse d'obtenin les permins nécessaithe pour construithe. Mais pus d'maisons, pus d'peuplye, pus d'traffique. Nannin. Pas une bouonne idée. Une suggestion pour le boctchot a papi.

 

Y'a tchinze jours passé 300 personnes se réunites dans l'stationnement d'motos au Parc pour exprînmer lus d'si de conserver l'bâtisse et d'le ram'ner a la glouaithe comme tchi tch'ils l'avaits connu dans lus jeunesse. Une assez bouonne idée, bein sincethe auve tchi que j'ai une certaine sympathie, mais est-che qu'ou pensez pas que j'avons assez d'pliaiches d'amusement. A present j'avons l'Cente d'art, un autre centre d'art est souos construction a la vieille eglyise de St James. Le magnifique théatre de l'Opera House a 'tait preserver et setha ouvert dans l'année 2000. J'avons l'Hôtel de France, l'Hôtel d'La Moye ouverts pour cabarets et danse, sans pasler d'plusieurs Clobes de Niet. Y'a une indication de construithe une hôtel de 200/300 chambres auve salle de Conféthence sus une partie d'la réclîamation. Dans chés temps quand i nos es dit qu'el commerce de Tourisme n'est pas si prospetheux comme j'l'avons connu, est-che ichin l'temps d'bâti pour acc'moder l'touriste tch'est en décadence……….

 

J'crai qu'j'ai mant'chi la vraie raison driethe l'idée d'converti l'Pavillion en pliaiche d'amusement. Le Casino.  J'men vais pas entrer dans l'pouor ou l'contre de chu sujet. J'sis seux qo'ou s'etes bein au couothant d'més pensées.

 

Mais tchi qu'j'allons en faithe de chu bâtisse?

 

J'ai une idée. Faut domînner sus l's'Etats d'l'acater et d'le converti dans une maison d'residence pour anciennes personnes. La population est dev'nue pus ancienne , et chés bein accepter que les gens vive pus longtemps qu'dans l'temps passé.

 

J'avons une écarcité d'maisons résidence pour les anciens. J'avons perdu la résidence a Beauport pour faithe pliaiche pour maisons. Y'm'est dit tchi y'a une liste d'attente pour entrer dans chés maisons d'residence et tous ne sonts pas dans dans la position d'pâyi les prixs pour entrer dans chés maisons privées. Chutte semaine j'ai entendu de trais anciens tch'ont 'tait ren'viées siez ieux a cause de manque de run a l'hôpita. Etant qu'je vivons dans une ile de prosperité, la majorité d'Jerriais ayant payi les taxes et contributions sociales, chés possiblye que l's'Etats pouorraits subventionner les couôtements et les gens rejoui d'lus dernier jours en paix et trantchil'té. La gêne de veillyi et d'arrangi pour l'av'nin est bein desteurbante pour hardi d'gens… Allons donc, Conmité d'La Santé Publique. Action d'vôt part soulangerai tuous ches concernes.

 

A La Prechaine.

 

Clifford Laisney