How Lonore is not yet quite herself

 How Lonore is not yet quite herself

 

En y r'gardant d'près, nou peut s'aperchevé qu'ma Lonore en r'gagne - mais si douochot'ment! Ou s'porte assez bin d'san corps, s'ou voulez, mais ou niolinne oquo pus qu'nou n'voudrait. Jusqu'au Bos a Moussieu Pain qui s'en est apperchu. Pas pus tard qu'hier, en la viyant ritounné en le r'gardant sans dithe mot, y m'dit a l'ouothélle: "Wots matter wif Miss Lonore? She look silly at me."

 

Not' docteu m'disait l'aut' jour, apres l'avé bin examinée et sondée partout: "N'y'a rin d'ma: tout est solide et en bouan estat. Les poumons sont pliens d'vent, l'tcheu d'sang, les boyaux d'provisions, la ratte plienne de fiel: l'corps de vot fille est en bouan t'nanche, mais san chervé est caillyi: Proum'nez la; faites la rithe; et n'la laissis pas toute seule longtemps. Mercie. Ch'est 'seven an' six', et un estchu pour chutte boutelle ichin. Eunne tchullée tres fais par jour, et quand ou s'a viedde (la boutelle) j'la remplietchai pour deux shillings."

 

Eh bin! J'la proumenne touos les jours. Dans la féthe à bêtes, au marchi à paisson, sus l'Mont-ès-pendus; et l'sé j'la condis vaie les passagièrs dèsberchi du steameur. Et pour la faithe rithe, j'la condis vais dèschergi les navithes a tcherbon sus la cauchie.

 

J'l'emni Lundi à St. Aubin vaie les nageurs. V'la tchi lis fit bin pliaisi. J'taimes assises tout près du 'diving stage': et y'avait pliaisi a l'entendre rithe [bouoche] des nageurs; oul en tappit des mains quand ils avaient l'air de s'n'allé èstouffé. "Gas, memmée, qu'ou m'disait; gas ch'tisla! gas la mé entré dans la bouoche! J'cré qui s'en va s'nié. Tchi fonne!" Et quand y s'mintes a sauté a l'ieau d'sus 'stage' - j'voudrais qu'ou l'éthaites veue! "L'as tu ouï tchée, memmée! J'cré qui s'est rompu la héthèque." Et quand y s'mintes à 'divé' du tout haut 'stage,' ou s'mâti sus sa tchaise en criant: "Y s'en va resté cliutté au fond! Y réstétha pitchi dans la vase coumme un manchot; nou n'lé r'verra qu'a mé basse. Tchi bigre de fonne, mémmée!"

 

Bétot - j'm'étais dèstouônnée eunne minute pour pâslé a Madame Bigthé qu'était v'nue là ov un ponnyi, qu'ou m'dit, pour aidji a sa fille a remporté les prix qu'ou s'nallait gagni - quand je m'dèstouônne pour dithe a Lonore qu'il 'tait temps d'prendre eunne tchul'lée d'med'cinne (j'avais la boutelle et eunne tchullyi dans ma pouchette) la fille 'tait horte! Et je n'la trouvi qu'eunne bouonne dem'y'-heuthe après; et, l'créthaites-ous? J'la vit qui sortait d'eunne tente, parmi un fliotchet d'nageuses, et habiyie coumme yeux! Man pèthe bénin! Jé n'fit qu'un saut par dessus tchaises et bancs; j'èstruêulli deus-très membres du Coummité; j'envyi un Juge a l'ieau, et l'Umpire a boun'tchu; man parapyie houtchi l'chappé d'eune grosse angliaiche qui s'mint a rouablié (pour un faillyi chappé hors dé mode, j'vos d'mande!) et en deus engambées j'fut auprès d'ma fille! Veux tu! Veux tu bin vite allé t'muchi souos la tente et n'en sorti qu'habillyie coumme eune chrètchenne! que j'criyi. As tu jommais veu! Eunne Pain; eune démouèzelle Pain; eunne fille a Piteur Pain du Huthé! S'montré sus l'but d'eunne cauchie, habiyie en nageuse; ov un tas d'gens qui n'sont pon d'la famillle a r'gardé not' propriété!

 

Ou fit les chent coups d'vant que d'voulé s'rhabillyi. J'en r'pathimes tout d'mème a la fin; et j'la ramni tout d'suite siez nous par le train. J'ai pensé qu'autant vallait n'pon pàslé a Moussieu Pain d'l'èscappée d'sa fille; il est si embarassé tout chu temps a lus aidji a faithe marchi la gazette, que l'moindre èsnèrvément l'fait roûâblié pour longtemps. J'ithai d'main siez l'docteu cherchi eune autre boutelle - pus forte, si y'a moyen.

 

Madame Laizé Pain

1912