1912: Piteur comments on the new departure

 Piteur comments on the new departure

 

Ch'est coumme nou vos l'dit sus la gazette de Mardi, la p'tite fille a prins sa grand'mèthe souos l'bras; la pus jeunne gazette de l'Ile s'en va porté s'cours a la pus ancienne. Les roeux d'la bouonne vielle Chronique c'menchaient a se roui et a grinchi péniblement. Pensez donc! Pus d'chent ans d'travas: v'la tchi compte! quand vint ch't'âge la, nous a bin drouét de s'senti un mio lassée, et de r'gardé atouore de sé pour tchi' chose a s'appié contre.

 

Ch'est-tant-tchi, nous qui soummes jeunes, et forts, et desliées, et terribliement up-to-date, j'nos n'allons lis ballyi un solide coup d'main, a la bouonne vielle camarade. J'avons ichin un tas d'belles neuves machines qui peuvent imprimé des nouvelles rin qu'en touonant eunne chainolle: j'avons un téléphone qui nos dit tout ch'qui s'passe partout rin qu'en souffliant d'dans. Npt' office se trouve dans la pus belle situation d'la ville, nos compteurs sont en méhogenné ov tout plien d'run d'sous pour met' vos patchets l'Samdi en attendant la bus. J'palons d'avé eunne bouete a sno sus l'conteux, et l'jour vindra p't'ètre que les femmes de nos abonnés pouorront ramonté a haut s'brinji les g'veux et béthe eunne tassée d'tée ov ma Laizé. Et pis, y'a not' moto-car pour porté la Chronique siez vous en mème temps que l'Morning News, sans qui vos en couote un sou d'pus qu'd'amor. J'ne s'sais pas ravi qu'la Chronique vos s'ait portée siez vous l'Sam'di coumme le Mèscredi - ous éthaites le temps d'la liéthe tandi qu'vot valet s'ait a lié l'querre pour v'né apporté l'beurre au marchi.

 

Y n'a pon oquo té décidé tchès qu'nou f'thait d'Samuel: si nou l'gardétha sus l'staff ou si nou l'flianq'tha a la porte. J'ai paslé deux mots pour li (j'soummes un mio pathents, du bord des Bilos) et l'Bos s'ait assez de ch't'avis la - a condition que j'm'otchupe de li et que j'soigne qui rentre le sé a des heuthes respectables. J'pouoraimes au besoin l'prendre en pension avec nous si promettait fiablement de n'rentré pon caud d'béthe pus d'eunne fais la s'maine: y prendrait ses r'pas ov nous après s'étre ben lavé les mains et brinji les g'veux, et nou pouorait lis monté eunne couochette dans la mansarde ou-ès qu'j'mettons l'tcherbon. Y nos paiethait tant par mais: Laizé lis rabil'lai san linge et oul l'enmen'nait ov yi a la Chapelle l'Dinmanche au sé, et tchiq' fais sus la s'maine a la pratique.

 

Tout chenna, ch'est des arrang'ments qu'nou f'thait pus tard: si par chance ch'est un garcon arrangeant et qui voudrait aidji a plé les poum'terres pour diné, nou n'l'escorchethait pon sus l'prix: mème que si ch'tait un raide bouan garcon et pon trop bete, j'lis montrethais a èscrithe en jerriais les séthées d'hivé; et si s'comportait tout a fait bin, nou l'alouothait dans l'parleux l'Dinmanche au sé pour chanté des Cantiques ov Lonore tandi que j'hot'tias dans man fauteuil.

 

Enfin, nou verra! Pour ach'theu j'soummes ben ambarassés a faithe nos arrang'ments ov la Chronique, a passé des comptes, a esvalué l'fond d'coummerce, a desmênagi les machines, et met' tout en bouon allant pour pus tard.

 

Mais tchi travas j'nos n'allons avé a faithe! Ch'est niet et jour qui s'en va fallé s'moustré! Car je voulons tachi qu'touos les siens qui lièsent le 'Morning News' lièsent étou la Chronique. Et pis, en l'heu, ous allez vaie du nouvé - dites que - j'vos l'dit. J'nos n'allons met' du 'steam' dans la Vielle; ou s'en va r'véné deslié coumme dans san jeune temps, et j'espethe qui n'y'etha pon eunne famille Jerriaise sans yeunne ou l'autre (ou mème les deux) d'nos gazettes.

 

Piteur Pain

1912