1999: Lettre Jèrriaise

 Lettre Jersiaise    Dinmanche le 4 Juillet 1999.

 

Aniet Dinmanche le 4 de Juillet, chés un pliaisi pour mé, Clifford Laisney d'vos présenter acquo une fais la Letttre Jerrsiaise. Premièthement, j'ai une announce pour les Membres de L'Assembliée concernant la Visite a St. Malo et l's'alentours, tchi autha lieu Samedi le 7 d'Août. Le prix tout inclu est £50., et si ou voulées reserver vôt passage, vos pliait ti donner un coup d'telephone a Christine Cudlipp nûmètho 863056.

Samedi passé le 26 d'Juin fut une opportunité pour une chentaine de membres de L'Assembliée d'Jerriais d'ertouoner a lus temps d'éfance. Ch'tait une occasion tch'avait 'tait hardi bein organisée par le Conmité Sociale de L'Assembliée et print la forme d'une traversée de l'ouest de l'ile en camions.

 

J'nos entre rencontimes es Caves du Loup a deux heuthes et d'mie, et un coup avait monter abord, les cochers d'vetûthes nos embertchites sus une magnifique prom'nade dans les p'tites ruettes que hardi d'gens n'avaits janmais cirtchuler.

 

Quouaiq' le temps m'n'ichait a l'orage, j'fumes bein chanceux d'écapper autchune mouôillétuthe, même le solé fit s'n'appathence et tuous les gens 'taits en bouon entrain, chantons chansons jerriaises et faithant lus presence bein connues, sustout és touristes tchi r'gardaits, d'mandons d'éyou qu'chés gens avaits ecapper.

 

Assis dans l'driethe d'une vetûthe donne l'opportunité d'vaie et d'rejoui les gardins et ch'nna tchi s'passe driethe les brousses. J'arrivimes au Centre D'Or, sus le Route des Chinq Milles envers quatres heuthes. Auprés avait d's'embertchi i'tait temps d'se rejoui de raffraichements, une chose trejous bein appreciée.  Ch'tait etout une chance d'exèrcier les gambes auprés avait 'tait assis sus des bancs tchi 'taits assez rude sus les tchuisses, sustout les gens comme mé tch'in porte pas trop d'graisse.

 

En route acquo une fais pour La Corbière, la Baie d'st Brelade, tout l'long d'l'Av'nue Victoria, et oui, ou s'avez bein d'vinner, une visite en vetûthes sethait pas compliete sans une traversée dans la tonnelle. Siez vetûthes cornachant pliene volume, des adultes tchi lus comportaits commes des mousses tch'avait grand besoin d'corrigement, ou pouvés vos imaginer le sabat et l'resonnement tchu lieu, et si une fais n'était pas assez, les cochers décidites de'èrtouoner les vetûthes et d'nos convier a une deuxieme dose. Ch'tait bein chanceux qu'la police n'etait pas dans l's'alentours car j'crai qu'j'authaimes tous dejeuner le lendemain matin és frais du Conmité de D'Fense.

 

Pouvous vos imaginer les lignes en tête sus l'journal du sé, 'Cause de fracas, chent Jerriais passe la niet en boête.' Tout allait bein jusqu'a l's'alentours de La Station d'Police quand iun des camions  s'décidi tchi'l en avait ieu assez. I fut print d'une attaque du ma d'cours et c'mmenchi a cannoner des coups d'r'tou. Auprés aver fait d's'adjustments es boudins d'l'engin, la vetûthe continnuit par p'tits efforts et finnalement patchi ses telles au fond d'La Vallée Des Vaux. Chés ichin tchi fût décider d'transferer les passagiers es autres vetûthes et prendre le pouorre victînme en touage.

 

J'aarivimes a not destination tchi 'tait le d'part de not prom'nade de vers sept heuthes.

 

Assis tous a tablye, j't'aimes préts a d'vouother un magnifique r'pas d'patates frittes, poulet, et d'pais ronds, assistées par raffraichements litchides.

 

Madame Perrée Présidente du Conmité responsablye, payi ses érmerciements es cochers pour lus temps et l'usage de lus vetûthes. Ou r'mercyi étout le gérant du restaurant pour un r'pas bein servi. Chaque cocher fut présenter auve une magnifique pannelée d'fruit pour ses efforts.

 

Le restant d'la sethée s'passit dans les mains du Sieur Lester Rondel et Nick Le Miere tchi auve l'aidgue de lus accordion et tambours abuttites une journée riche en memouaithes.

 

Un p'tit ouaisé m'dit que i'a paslement d'organiser une cirtchulation d'l'ile l'année tchi vint en bicyclette. J'vos previns en bouon temps d'prepather pas seulement vôt machinne mais d'huiler bein les muscles. La SELLE EST PUS DUTHE ACHTEU QU'on 'tait i'a quarante ans.

 

 

A LA PRECHAINE.

 

Clifford Laisney