1913: Mrs. Pain Reports Progress

 Mrs. Pain Reports Progress

 

D'pis qu'ma fille a 'té mascotte en Dgérnési, oul est toute chose. Ou n'p[â]le pas, ou r'garde gare, et ses mains ont l'trembliot. Chutte bordée là y'a fait pus d'ma que d'bin - sans compté qui nos a fallu la rèstchippée pour bin dithe des pids à la tête. Tout ch'qu'oul avait rapporté était en d'lacres; et l'auberge de St. Samson, a tchi j'èscrivi d'avé a nos renvié l'chapé qu'Lonore avait laissi là, m'rèspounni que j'n'avons qu'à allé l'cherchi, et en mème temps payi un p'tit compte pour un mitheux d'pichi et des tchulliers en plated q[ui] n'se trouvent pon.

 

J'n'ai jommais yeu grand estime pour les Dgernesiais, et ch'n'est pon mé qui m'en vais rèspondre a ditet, Qui gardent l'chapé!

 

Quand Piteur s'en vint l'aut jour me consulté sus ch'qu'il en 'tait pour le Show ou-ès qu'il 'tait [l'refe]ree, et si j'criais qu'sens faithe t[rop] tors a sa conscienche, y'éthait moyen d's'arrangi pour gagnyi tchi[q] louis j'vos l'rasseuthi bin vite. "Du moment qu'tu promets de m'dounai [la] main[tchi] du profit, que j'lis dit et qu'mé j'en dounne le quart a yeunne de mes bouonnes Causes; n'y'a pon a hésité. Y'a des négres en Afrique qui n'ont jommais oui la bouonne patholle: s'nou peut les empèchi d'tchée dans la géhenne de feu en lus enviant eunne Bibye qu'a 'té acatée avec des sous gagnyis n'ou n'sait coument la fin justifie les moyens! que j'lis dit. Et d'mème, j'ai yeu ma part du profit et me v'la a mème de faithe du bin, et d'en r'chevé la rèscompense pus tard.

 

Mais pour en r'venin a Lonore, et après en avé r'paslé ensembye, Piteur et mé, et avé consulté deus-très des clerques de l'office, j'soumes a bin près d'avis que ch'qui lis manque, a not' èsfant chès [E]unne Ladies Companion! Eunne veuve d'offici, sy y'a chouais! Dans les quarante a chinquante ans, qui n'demandait pon d'hauts gages et qui d'meuth'thait avec nous. Ou n'éthait presque rin a faithe siez nous. Rin que villyi sus Lonore du matin au sé, la proumné au solet quand i' f'thait bé et souos l's'arcades a Gruchy les jours de plyie, et m'aidji a faithe le bernage de maison touos les jours. Nou m'a souvent dit qu'y avait des persounnes prêtes a entreprendre ditelles djobs pour la maintchi d'rin; tchiq' fais seulement pour lus neurtuthe - a condition que ché sait dans eunne famille coumme-y-faut. Pour ch'qué ch'est de coumme y faut - Les Pains sont Djeu merci bin counnus!

 

Quand j'touchi tchiq mots d'not idée a Lonore d'vant que d'se couochi et que j'lis pasli d'avé eunne veuve d'office pour la proumné sus l'Parc et lis liethe des livres èsdifiants, ou n'eut pon l'air d'en tchée en extase. Après avé san dé dans sa bouoche et canté la tète de coté en r'gardant san ponchi ou dit tout d'un coup:-

 

J'aimthais mus un p'tit tchan!

 

Laizé Pain

1913