Merrienne gets a soaking
Was it worthwhile?
Moussieu l'Editeu,
Quand je r'vînmes d'l'êléction mêcredi au sé, dans les onze heuthes, la Merrienne hallit san bonnet, le fliantchit sûs l'plianchais, et, sans dithe une pathole, s'en fut à haut pour se dêchangi. Oulle tait trempée jusqu'â la pé. Mé, j'mint un mio d'chérbon sûs l'feu, et j'appréchit une tchaise pour mettre ma grand'câsaque à s'chi, épis j'massiévit à m'cauffé un mio car j'qu'menchais à frélotté.
Au but d'vingt minutes la v'la tchi d'valle. "Au mains," ou m'dit, "tu'éthais peut mettre le ticlye sûs l'feu. Et fait mé du run que j'cauffe mes pids. A t'vais no dithait que n'y'a qu'té tch'as tait mouollyi."
J'cârrit ma tchaise sans dithe un mot, mais ou n'avait pas fini. Au contraithe ou n'faisait que d'qu'menchi.
"La préchains fais qu'tu m'entraîn'nas à une êlection de niet," ou dit, "tu'en r'ouithas paslé. Dé toutes les imbécilités!"
"Ma ma pouore Merrienne," j'l'y dit, "ch'n'est pas d'ma faute s'il a tchaie une achie ou deux, et, après tout, si tu t'as tait, ch'tait d'ta bouonne volonté. Tu n'peux pas dithe qyue j'tait happée par la pé du co et trainée jusqu'à la salle. Et quand j'tait dit dans les neuf heuthes tch'il tait temps de r'venin, tu m'as dit que n'y'avait pas d'prêsse. Ach'teu tu m'biaûme et j'voudrais savé ourtchi."
Ou n'dit rain pour tchiques minutes, épis, "Eh ben, y'avait p't'être de ma faute," oulle admint, "mais quand no veint à y pensé, faut-y être bête de s'excité d'même, et d'être à patachi pour des heuthes de temps dans l'pité tout simplyement parsque tchitchun veur être Député. J'éthions tait ben mûs ichin assis aupi d'notre feu et deux vouaix d'pûs ou mains n'éthaient fait autchune difféthence."
"Nan, pas agniet," j'm'accordit, "mais y'a ben d's'années une êlection pour Juge fut décidée par une vouaix épis si tout l'monde faisaient somme tu dis n'y'éthait jamais un candidat d'êlu et l's'Etats s'n'îthaient ès tchans."
"Jêrri n'en s'sait pas d'pièthe," ou dit, "mais j'm'en vais t'dithe une chose, Ph'lip, et ch'est que quand j'vivrais à l'Age d'Abraham, Isaac et Jacob, jamais tu n'me r'vèrras à une êlection, nan pas quand tu m'bâil'lais chent louis. Ne v'la man bonnet, que j'avais accaté pour les neuches à ma tate Souky en telle, et man parapluie tchi m'a fait tant d'service est en minchons. Quant à mes cauches et tout l'restant, j'n'aime pas même à y pensé. Ch'est une ruine, et pour rain du tout."
Ou continuit d'mème pour tchique temps mais après qu'j'avions soupé ou qu'menchit à s'ravigotté un mio et oulle admint qu'oulle avait yeu une bordée d'fun malgré l'temps.
"Y'a une chose, man Ph'lip," ou m'dit. "Quand Saint-Ou s'met dans la tête de faithe une chose comme ou dév'thait être faite, n'y'a pas une autre pâraisse à l'y touchi."
"Ah, damme, tu peux l'dithe," je m'fit." N'y'en a pas même yunne tchi peut l'y v'nin au g'nou."
1948
No comments:
Post a Comment