1911: M'n'opinion la d'sus

 M'n'opinion la d'sus

 

Tchi djautre dé cactage nou liet sus les gazettes entouôre du creux a tcherbon qu'les Saint Jennais pâlent dé foncé souôs l'rectorat d'lus paraisse! Y'en a qui sont pour; d'autres contre; et ch'est a tchi ouas'sa l'pus dans ou sus l'côle-hôle.

 

Ou viyis, bouonnes gens, il en s'sa tréjous d'même, chès temps qu'nous ait eunne fais pour toutes, décidé 'what's what' sus la tchèstchon. Nou s'souvint du train qui y'eut y'a tchiq' années autouôre d'un cliochi d'campanne. 'Taiche ès paraissiens a payi les frais sus l'rât: 'taiche au Recteu a trouvé les sous pour r'pathé sa poutre? Y'eut un divers cac'tage! Et mème, si j'me r'souvins bin, y'eut ti pon un procés?

 

Au fond d'mé; j'tais contre. Mais coumme nou m'promint qu'la féthâlle vindrait à ma forge; j'mé mons raide du bord du recteu. Il en fut d'mème pour man bieau-fréthe Amice, lé tchérpentchi. Li qu'est methodiste, y s'n'allait disant partout qué ch'tait honteux d'faithe contribué les mîntins a la r'pathation d'un cliochi qui n'sounnait qu'pour les gens d'Eglyise. Nou lis freummi l'bec, a ch'tis la, en lis dounnant la job dé rabotté les poutres. ch'fut d'même pour peintre, lé macion, et deus-très autres. Quand vint l'temps d'voté la dèspense, a la plieche de voté contre, I'm bidem si n'y'eut pon eune forte majorité pour qué ch'fûs la Paraisse qui payisse!

 

Un vaîsin qu'est diversement èsdutchi m'a tréjous prétendu qué l'temps passé - j'vos pâles des temps tout a fait r'tchullées - les recteurs 'taient oblyigis dé t'né yeux mème lus bâtisses en r'pather, coumme v'la tchi s'fait oquo au jour d'anniét en Angliéterre. Comme s'fait man vaîsin: Mettons qu'tu' ès recteu. Tu' arrive frais pounnu dans eunne paraisse. Tu ès r'chu par les Surveillants. Les serveillants t'mennent a l'Eglyise, et pis au rectorat. Arrivés là, y t'font r'mértchi qu'la bouëssie est fraiche peituthée; qui n'manque pon d'ozennes ès f'nètres; qu'les sétheuses travallent bin; et qu'les armouéthes son cliottiches. Tout cheunna est mèrtchi bas sus du papi qu'tu sinne; et tu t'engage a entrét'né l'affaithe en bouan t'nânche quand tai baille s'sa finie. Si s'adounnait qu'tut t'n'allais mouothi en entre-temps, ta veuve ou t's'héthitiers réstéthaient responsaby. Apré t'avé tout éxplyitchi la d'sus, y't condithai vaie la glébe (les terres dé l'eglyise) en t'disant qu'avec lé r'venu d'la terre, ta djîme, les mathiages, l's enterrements, et eune collecte par les bancs dé temps en temps - tu 'éthais a t'grée ov cheunna.

 

Djântre! Si ch'est d'mème en Anglieterre, y fait boustrement pus bé ètre recteu en Jerri. Si j'tais a r'quémanchi ma vie - nos gens y'avaient quasiment pensé quand j'tais mousse - j'aimthais assez ètre recteu en Jerri! J'ai pus-ou-mains tréjous y'eu un penchant pour chu mèstchi la. Et pis! eune fais pliéchi, n'y'a pon pour dithe rin a faithe.

 

P'tit a p'tit, sans faithe mine de rin, nos recteurs on empiêté d'un bord et d'l'autre; ch'quo fait qu'ach'teu, y sont sus du v'lous! Vèthe d'ja, ma fé! Si ch'tait a r'quemanchi, j'éthais mus fait d'apprendre un mio d'latin (eunne fais qu'nous en sais un mio n'ou n'sen sert jommais pus) que l'mèstchi d'forgeux. Sans conté qu'un recteu èst pus moussieu qu'un forgeux - pourtchi, j'n'en sait ma festre rin! Nous est d'l'assembliée d'principaux d'pâraisse; de touôs les coummités; nous est membre des Estats; et, au bu d'eunne pôse, s'nou dit tréjous oui et amen partout, membre du coumité d'l'Hopita, d'la Prison, d'l'Asile, des grand-routes, des Esgouts, etc., qu'si nou votte du bord du Baillyi, nou va au dîné des Assises. Et pis, coumme m'y fait pensé Lonôre: si j'tais recteu, nou va proumné sa fille endrét l's'officiers ès 'at home' du gouverneux!

 

Djantre! pourtchi qui n'mé montrîtent pon l'latin a la plièche dé m'mettre a soufflié un souffliet d'forge. Et, par dessus tout, la pâraisse m'ethait étout machounné un côle-hôle; et, nou n'sait jammais, p't'etre du tcherbon, sus l'compte des pauvre honteurs.

 

Piteur Pain

1911