Dialogue entre Me. Charles et Me. Edouard, la séraie du jeu qué les Français vinrent, le 8e jour d'Octobre 1850

 Dialogue 

Entre Me. Charles et Me. Edouard,

 

La séraie du jeu qué les Français vinrent,

Le 8e jour d'Octobre 1850.

 

(Me. Charles entre siés Me. Edouard qués assis d'vant l'âtre, ov une trivelaine d'avers autouor de li.)

 

 

Me. Edouard. – An, ch'est vous, Me. Charles; jenne savais pon qués que not tchan avé a ouasser ainchin. Eh! qués qui vos amène ichin du pas qui va? Je vos criyais juqui il y a une pause.

 

Me. Charles. – Ch'est que j'sies comme les cats, j'y vé la niet comme le jeu; mais don, pôur vos dire la véritai, si j'avais peu, j'essais venu pus hoeure, mais j'ai étai en Ville anniai, et je m'sies tenu à fliaouné de bord en aoutre, tant et si bain qu'il'tait pus de Solei couochant quand j'ai sorti du Cocq end Bottel. Oué, ien a ieu don de chu fun en Ville anniai! Ches Messieurs Français sont v'nus à matin de Granville. Ou z'aviez oui qui d'vaient v'nin, aviouz pon, Me. Edouard?

 

Me. Edouard. – Oh! vère, ch'tait anniai qui d'vaient v'nin, j'n'y r'pensais pus, ma fé. Oh, oh, i sont ilo, hein! Eh bain, assiévous, notre amin, et contaiz nous ch'quou z'avaiz veu. Ah! qués qu'ch'est d'être ainchin happé par les guerêts! depies que j'me sies bailli chutte minserable éteurse à la gu'ville du pi, j'n'ai seu quasi bouogi. Si j'avait étai comme le temps passai, quand nou pouvait saouter jusqu'ès rouaits, perdyi, ch'nest pon mé qu'érais d'meurai a rueûqui ichin au pi de m'n âtre! J'erais étout étai vée le fun, mé … Ah que j'sies fi quou siyiz v'nu, va qui s'en va nos d'sennier. (e[r]touonant d'vier les êfans qui mènent du bri). Viyons don, voulouz porter r'pos, maoudits avers! Nou ne serait oui un mot … Allons Me. Charles, bailliz nouos en deux syllabes.

 

Me. Charles. – Ou viyiz, hyi, je n'pensais pas pus d'aller vée chonna que l'cat qu'est ilo dans la cônière, mais vla-t-i pon quel'fils not vêsin Pierre s'en vint siés nous barbelueûter que j'nos en allions avé une suaie de Normands dans lus habits de môtre. Le dessus, madé, la curiositai me print, mé, et j'dis à ma femme, se li fis-je : sais-tu bain, Mallé, je sis en même d'aller les vée aitout. Le Bouan Dyi nos sait Père et ammin, se fit alle, les viers sont acheteu pières que les jeunes! an, ma fé, sous z'êtes ainchin digui de couore la pretentaine, allaiz, qu'ès qui vos r'tient. Eh bain, s'emn'âge oui, j'irai, ah ça don, se fis-je, et en effet à matin il 'tait oquo p'titement jeu quand j'ai dêjuqui, et oprès avé soigni le bestiât et jimolai un couêpé de pain et goudalé viron une quarte de cidre pour me rasseurer un mio le coeu, paque me vla aller du bord de la Ville.

 

Me. Edouard. – Eh! man doux, i n'devait pas y avé fort de monde êmôqui à ch'teure là. Car i n'y a pas de leverie dans chutte Villa là. Ch'est un mouoché de piercheurs. Pour dé mé, si je me tenais ainchin ai liet, j'en d'veindrais mié ch'va.

 

Me. Charles. – Ou criyiz qui n'iavait personne par les qu'mins, arrêtez dia. Ch'tait deja comme une rueûque qui s'en va essemer. Nou z'en viyait qu'iallaient et v'naient comme d'z'êrattaies; d'aoutres êpiaient à lus hus qui temps ès qui faisait; ch'tait d'vise, et suffle, et chante; man pouore êfant, c'h'tait une bourdonnenie a êlouêssi l'chervé. Acheteu, mé, je pensi; je sies v'nu l'couosin George, avaler deux lermes d'bitteurs : i dient qu'va qui n'est pas méchant quand nou z'a êcaouffai.  Si fis-je don, et not couosine v'nait justement d'maidyi quand qués qui s'môtre à l'hus sinon un drôle de p'tit ôti, quou connaissiz bain et qui'a le naiz tout crotyi, comme s'il avait envie de faire la carre à s'n'ouoreille. Il'tait deja un mio bé dé wind, de manière qui faisait d'effriyiables gringnes. Oprès s'être gaubergi une volaie sus l'pas d'l'hus, i s'm'int a dire; se fit-i : ne v'na don ne jour dé gloère qu'est arrivai! n'a qu'à d'mander si ien era qui s'mordront nes dêgts! Nessera assez pour nes faire quès en fix, quand i verront bétôt ne Président dé na Republique. N'est chonna qui ssa bé. Ne veins de d'ssus l'vier Marchi et n'ai oui qui s'en vain pour nos promettre que nes Français ne s'battont jammais contre n'angliais. Ouès que tout ne monde s'en va à na caouchie, car ne v'na ne baté sinané.

 

Me. Edouard. – I n'est pas étonnant que ch'tinna sache toutes les nouvelles, car j'en jure, i s'faoufile partout. Mais cachiz sus votre avant, notre ammin. Qués quou fites quand ou z'ouîtes chonna? Filîtes ous sus la Caouchie?

 

Me. Charles. – Attendeiz don; posons, posons sur nos motions; j'en sommes pas oquo là. Quand j'vins dans l'vier Marchi, v'la-t-i pon que j'avise une belle carrosse, a quatre chevaoux qu'était piquie d'vant la maison du Couosin Philippe Jeune. J'eus bain de la peine à en appréchi, tésous, mais quand je vis que les gens ne voulaient pas me laissi passer et qui gronnaient et me môtraient la couleu de lus chippiaoux de dents, je qu'menche mé, et guérotte et fouote des cos d'ailelon de touos les bords, tant et si bain que dans un fi d'coton, j'eu eparpillyi chutte maoufaite qu'naille là; oué seulement je pensi êmaglyir les ortès à un maoudit antueûle d'avé; mais breyait-i! i n'iavait âne qui le patisse. Comme je li dis : ouimbraiz, ouimbraiz, p'tit laidure quou z'êtes. Avious affaire de vos tenin souos les pis ès gens aussin? i fallait vos haller hors de la vée... Ah! qui belle carrosse, il érait fallu la vée; i y'avait deux qu'valiers jindais sus les ch'vaoux qu'étaient habillis viron tout en v'lous, ov des boutons d'argent, ah! Me. Edouard, sous z'aviez veu comme i paraissaient bain. (Les gens disaient qui sen allaient sus la Caouchie pour cherchi ches Messieurs. Oué les uns faisaient : si traînent ainchin l'allumelle, perdyi, i'ssont trop tard, i devraient être sus la Caouchie du pas qui va. Le Stinmeur y'ssa devant ieux. Les aoutres disaient, se faisaient-i : il est grand temps de filer si j'voulons vée chonna. Et pis la Bant est déja horte il y a une volaie. (Car ou viyiz, Me. Edouard, la Bant d'la Ville et la chenne du Seurvouès étaient toutes les deux là.

 

Me. Edouard. – Nou z'avé voulu dire, n'esche pon don, qué l'Coronel d'la ville ne s'siait d'qué d'sorte des Normands, et qu'il 'tait dans une diverse ire de vée qui s'en allaient v'nin, et pies, il enviait sa Bant au d'vant d'ieux?

 

Me. Charles. – J'en avais aitout oui quique vent, i m'est avis; mais tréjous ils 'taient déjà hors à la caouchie. Quand je seus chonna mé, je pensi, se pensi-je; ch'est acheteu, fistaoux, qui ne faout pas t'nin deux pis dans un saoulé, et paque, me v'la aitout aller du bord de chutte caouchie, oué don ch'tait queurt et queurt et galoppe; touos 'taient happaies d'êvredin. Il allaient touos comme si l'indigne les avait enlevaies. Sem'n'âge, quand ch'erait étai pour le Pape de Romme, ch'erait'tai assez fait. Ch'tait comme qu'érait 'tait à jouer à barri-barrette. Maougré la virepassie et la brouiolle, j'êpinoqui tout d'même oquo moyannement bain man qu'min, mais ch'tait quand j'vins sus la caouchie! ah! les bras m'en quirent! mais d'oués que tout chonna pouvait dêhaller? sou z'aviez veu don! Dammin, tout 'tait couert de monde, i n'iavait moyan ni d'apprechi du but d'la caouchi, nou n'iérait pas coulai une puche!

 

Me. Edouard. – Et étiouz là en temps pour les vée v'nin, les Normands? Tout d'même va qui d'vait être diversement bé, notre ammin! Et la Bant, lyi, oués quoul 'tait? vos baillait-alle des nottes? Oquore une fès, porterouz r'pos, pendeloques de tisons d'avers? Sou m'faites anglyi d'aoutre, j'vos cheindrai. o, o, et commès qué j'disions; le Stinmeur fut i oquo une volaie?

 

Me. Charles. – Nannin, ma fé, mais il'tait temps d'en faire dia, i'n'fut pas long temps. Quand il entri dans la Caouchie, quès qu'lé monde fait? I qu'menchant touos à piaillyir hourrah, hourrah, et pies ch'tait don heurle et heurle et joue a raidé brache. Mais ch'qui me pliaisait le mus, à mé, ch'tait chutte belle Bant; ah! quou jouait nobliément! Tandis que les Messieurs étaient à dêberqui ou nos bailli m'est avis qu'ils appellent chutte notte là : le coeu des Rondins; qu'ch'est d'qui bé, Me. Edouard! acheteu, quand les cheins qu'étaient a bord du baté ouirent les hourrahs et la Bant, i s'minrent aitout à braire hourrah, tant et si bain qué ch'tait un tinné! un boucau! les ouoreilles en cônaient, madé; nou n'savait quasiment sus qui but qu'nou sé n'tait. Mais ch'est quand il urent déberqui qui ieut du fun. Sou z'aviez veu qui ziers ès qu'les gens êcalaient! J'en jure et pon n'en mens, ch'tait comme de moyannes souostasses. Mais aussin, i n'ia pas d'qui s'en ravir. I en avait d'ches soudars quiavaient de mannière de buts d'rouoge fisselle sus l'z'êpaoûles et de p'tites pannaies à lus jergaout, exattement comme des cous de rêté, et pies d'aoûtres quiavaient long comme le maître dé de pé souos l'naiz et de manière de boëtes à querbon sus la hure, quiavaient 'tai écuraies, et qui r'lisaient fin comme du verre. Ah! vraiment, vère dia, i paraissaient diversement drôles. Acheteu …

 

Me. Edouard. – Mais, dites-mé, une fès qu'les Normands ont tai a terre, oués qu'il ont filai. Et ien avait-i hardi?

 

Me. Charles. – Ah! oui dia, ien avait une piessante bodolière!  Une fès qu'il ont 'tai touos rangis sus la couochie comme des pommes sus l'âtre, craque, le v'la la Bant qui nos fouote “Save dé Quin,” et piès la Belle Carrosse ov les Grosses Têtes a fichi san camp la preumière, et nou s'nest touos allés paque a coue souentre bant et toute la pêque jusqu'au vier Marchi. Quand j'avons ieu gangni jusqu'là, sou z'aviez veu les raccachies de monde qui iavait; nou z'était touos pêle mêle gabouoré; madé, fortune n'erait seu y r'connaître sa mère. Ch'est que pour une bouanne volaie i n'ia pas ieu moyan de se haller d'la brouoille. Bêtôt, oprès avé r'happai lus vent, les Messieurs ont r'filai, et mé, j'ai d'meurai empétaoudai là si long temps que perdyi, quand j'ai veu enfin la côte un mio cliaire, j'ai entrai siés l'couosin Philippe Jeune, à mangi une bouochie. Semn'âge je me sentais tout fliat.

 

Me. Edouard. – Dyi m'pardonne, va qui m'met en guédon mé, d'ouir d'itai, et de n'iavé pas étai. Dammin, i semble qui va que fait r'jeunir; pour de mé, je m'en sens tout ravigotai, seulement, là, d'vos our d'viser – ah, qui belle bordaie!

 

Me. Charles. – Mais, ou pouvaiz le r'dire oquo une fès. Le chein d'à matin n'était pas oquo si ch'va, o mains, quand i bredouoillait siés le couosin George, qui ien erait hardi qui s'en mordraient nes dègts. (Il se lève) Mais est-i pon démêsi temps d'aller s'rouoler don? M'est avis qu'il est tard. Creigniz pon que quand je r'veindrai au chaouffaoud, Mallé me lichonnena. (Il appréche de l'hus). Ah ça, notre amin, ch'est à d'main. (Il sort).