1963: PH'LIP VA SUS L'MUS

 PH'LIP VA SUS L'MUS

Vendrédi au sé

Moussieu l'Editeu

J'n'ai pas hardi à vos dithe à ces sé car comme sans doute ou l'savez j'n'ai pas sorti d'ma chambre pour une longue semaine et i' m'semblye que man pouôre chervet ne fonctionne pas ocqou comme i' dév'thait. Mais, sans doute, chonna s'en va pâsser et le bouonhomme Ph'lip pouôrra écrithe comme de couôtume.

J'n'avais pas 'té trop bein pour tchique temps, car mes gambes dév'naient pûs fâillies d'un jour à l'autre, et j'avais une djobbe à marchi autchune distance. Mais quand j'm'en fus au club avec Ernest Le Cornu, tchi veint tréjous m'cherchi et m'apporter touos les dînmanches, je n'me trouvais pas pièthe, et j'm'attendais qu'avec une heuthe ou deux de r'pos dans l'arlévée, j'me r'trouv'thais comme de couôtume. Mais nouffé, Moussieu, car quand vînt l'heuthe du tais, je n'pouvais pas bouogi, et l'préchain matîn, aprés que l'docteu 'tait v'nu m'vaie, ma belle-fille téléphônit à ma femme, tchi vînt tout-d'suite d'Angliétêre et resit pour une longue sémaine. J'ai dans l'idee qu'ou m'sauvit la vie, avec l'aide de la nosse tchi fut engagie sûs l'coup.

Ch'tait une femme mathiée, tchi connaissait san travas, et tchi vos dêmontrait bein vite que si j'n'amendais pas bein vite ou voudrait saver pourtchi. Oulle est une nosse professionale, et ou n'avait autchun respect pour ma personne. À qu'menchi ou m'touônait sûs man ventre et capuchait man driéthe: épis ou m'touônait sûs man driéthe et capuchait man ventre. J'éthais voulu li dithe pûs d'une fais d'aller pûs douochement, mais ch'éthait 'té inutile, car ou n'me donnait pas une chance. Quand ou m'avait boustchulé et capuchit pour une bouonne dém'ieuthe ou m'asseûthait que j'tais mûs, et j'pouvais me r'mettre au liet. Enfîn, oulle est v'nue pour la dérnié fais, mais j'espéthe qu'ou r'veíndra m'vaie, pour que j'li diche que j'si hardi r'connaissant pour chein qu'oulle a fait pour mé.

Mes deux viérs amîns, Ernest Le Cornu et "Bill" Le Brun, sont v'nus m'vaie, et je s'sais bein content d'en vaie d'autres, car nou peut s'ennyier quand nou-s-est trop longtemps tout-seu. J'espéthe, quand-méme, de r'être sûs mes pids d'vant long, et d'aller en Ville p't'étre samedi en huit.

Ch'est tout pour agniet, Moussieu, car il est temps que j'me r'pôse. À votre bouonne santé!

PH'LIP.

1963