1992: l'affaithe dé Vernon Tomes

 

'Tchi qu'tu crai dé l'affaithe dé Vernon Tomes? me' d'mandit l' Ph'lip Desclios l'aut'jour.

 

'Ah, mon garcoun,' je m'fis, 'chest eune affaithe qu'a fait bein du ma au bouan noum d'Jèrri. J'ai r'grèt pour lé Vernon, li et me j'soummes touas les deux d'la même chouque: j'soummes fils d' fèrmiers et j'c'menchîmes not' êducatioun à l'êcole élémentaithe. J'nos pâlouns tréjous qu'en jèrriais.

 

'Mais j'ai grand'sympatie étout pour le Gouverneu et l'Bailli, car la manièthe qu'il' ount' té traités pour aver fait lus d'vé ch'est vraiment dêgouâtant. Quand nou est dans eune positioun d'autorité nou' dait faithe son d'vé, et i'l'ount fait, mais d'faithe son d'vé m'est pas tréjous bein pliaisant.

 

'Je l'sai bein, car mé étout, y'a bein des fais qu'j'ai ieu à faithe mon d'vé quand j'éthais bein voulu n'aver pas a l'faithe'.

 

'A Singapour, quand j'tais là coumme Haut Coummissaithe, ch'tait sus mé qué restait la réspounsabilité pour tout chi s'passait là qu'avait à faithe avec le gouvernément britannique. Dans che temps-là, basée sus Singapour, j'avaîmes eune forche militaithe énorme, navale, armée et aëriénne. Chaque forche avait son Commandant, eun Amiral, eun General et eun Mar'chal de l'Air, mais en d'sus d'ieux, pour co-ordiner les trais forches, y'avait eun Commandant en Chef. I'restait trais ou quatre ans, et si lé sien en poste 'tait d'la Navithe lé sien qu'i'l'suivait 'tait d'l'Armée, et son rempliaichant 'tait du Royal Air Force.'

 

'I' vint l'temps d'changi lé Commandant en Chef, et puisque l'sien qu'i 'tait là 'tait d'l'Armée, ch'tait l'tou' au RAF. Lé candidat favorisé ch'tait eun Mar'chal dé l'Air qui 'tait déjà là à Singapour coumme Commandant d'l'Air, ch'est à dithe qu'i éthait 'té êl'vé sus poste dé Commandant d'l'Air pour de v'ner Commandant en Chef.'

 

Le Foreign Office m'envyit eune lettre privée me d'mandant chein qué j'criais dé ch't arrangement là. Et ch'tait là qu'jeus eune sale décisioun à prendre. Lé candidat 'tait raid buouan gas, ieun d'mes miyeurs amîns, et hardi populaithe dans l'RAF. Mais j'savais bein qué l'arrangement proposé né prouvrait pas, même qué ch's'rait eun vrai désâstre.'

 

'Dabord, d'êlever eun houmme sus pliaiche né réussit presque jamais. Ses collègues, accouâtumés à l'traiter d'égal, n'aiment pas subitement à aver à l'traiter coumme lus supérieur. V'là tch'amène la jalousie et l'mauvais sang. I vaut bein mus importer tchiqu'nouvieau Chef, qui n'a pas servi là d'vant, ou au mains pas pour tchiques années.

 

Mais ch'en 'tait pas la l'tout. Le Candidat proposé 'tait raid buoan offici du RAF, mais i'n-'tait pas buoan diplomate et i'n'savait pas s'arrangi avec les autres Services, la Marine et l'Armée. Eun Commadant en Chef dait pouver s'fier sus la co-operatioun beinvolante des siens qu'i' c'mande, mais ch't einchein n'éthait jamais ieu chute co-opératioun et chu support là. Lé resultat éthait 'tait eune vraie tchéthue à tchians. Et pis, lé candidat avait eune attitude assez hautaine envers les gens d'Singapour, et si i' 'tait dév'nu Commandant en Chef, v'là tch'éthait fait du mauvais sang entre nos militaithes et la populatioun dé Singapour.

 

'Et ch'tait là l'opinioun qué j'dounnis au Foreign Office. Je crai qu'i' taient d'accord, mais l'Ministèthe dé Defense à Loundres, et surtout les membres du RAF là-d'dans, 'taient furieux qué je' m'tais opposé à lus gré, même il' enviyitent ieun d'lus pus haut officiers, eun Mar'chal en Chef dé l'Air (Air Chief Marshal) tachi de m'faithe changi m'n'avis. Mais j'savais bein mus qu'li chein tchi s'passait à Singapour, et j'avais mon d'vé à faithe, et l's'en r'fut à Loundres sans m'aver fait changi m'n opinioun.'

 

'L'avis qu'j'avais dounné au Foreign Office 'tait privé entre ieux et l'Ministêthe dé Défense, mai i'ieu chein nous appelle en anglais eun 'leak', probablyément par lé Ministèthe, et dans rein d'temps i' 'tait par les c'mins à Loundres et à Singapour, que ch'tait mé qu'avait frustré lus plians et qu'j'avais trahi ieun d'mes miyeurs amîns. Li, bein seux, i' vint à l'saver et j'té promèts, mon Ph'lip, qu'i'n'restit pus m'n amîn. Dé chu jour-là jusqu'à son départ siez mais pus tard, i'n'mé souatti même pas l'bounjour. Les rapports du RAF avec mé d'vîntent des pus mauvais. Mais djà qué ch'en 'tait pas dutout pliaisant dé faithe, j'avais fait mon d'vé.'

 

'Et d'même, mon Ph'lip, tu coumprendras bein pourtchi qu'j'ai grand'sympatie pour lé Gouverneu et l'Bailli. J'ai passé par la même route qué ieux. Mais quand nous a son d'vé à faithe n'y'a qu'cheunna qui coumpte.

 

Le vier Trin'tais.

JEP 5 June 1992