Zébédée et Abréhan.
UNN' HISTOUAITHE D'AMOUR.
Y'iavait unn' fais
Deux viers péhons – vaisins dé près,
Yieun s'nommait Abréhan, l'aut' Zébédée.
Zeb 'tait riche, et acatait d'la rente
Quand y'ien avait t'chique soumme en vente –
Mais Abréhan était pauvre comme le rat
Bourse et paûtes vièdes, ch'était la sen mâ …
Et pourtant les deux viers accordaient ben,
Quoiqu'yieun eusse des sous et qué l'aute'n'eusse ren!
Parce qu'ensemble y'l'avaient des idées
Qué les gens d'ach'teu appellent biscâriées –
La vier Zeb était tréjous pour les changements
Ché'tait t'chulbute partout, et pour faire ses plians
Y cherchait Abréhan qu'avait parmi divers dons
La manièthe dé faithe dé drôles d'inventions …
Ent'yieux y taillyiaient,
Dé diverses manièthes dé biaux verts bouais
Les uns en coqs, poules, pirots et paôns,
En tigres, en lions, crocodiles, êsléphants,
Des simagrues 'tchi faisaient peûx ès pâssants! …
Abréhan avait un fils, - un biau garçon,
Mais t'chi n'avait pon apprins dé profession –
Entr'l'y et san pêthe y'l'inventaient miracle
Pus tôt qué d'racc'moder lus pouorre habitacle
T'chi s'n'allait tréjous en d'rive et en d'lacre! …
Et y né gâgnaient pon lé sou à touâs lus projets
Dé lus machinne dé pompes, d'engins ou d'engrais! …
Zébédée avait unn' fille – unn' belle jeune hardelle,
Qu'avait apprins ès ècolles à faithe d'la dentelle
Pûs tôt qué dé laver linge, bolles et vaisselle –
Mais oull' avait lé chervé plyien d'histouaithes d'amour,
Oull' en payait deux sous, les lyiaisait niet et jour –
Et Clièmentinne rêvait … et pensait t'ch'il 'tait temps
Pour l'yi, au mains, d'aver un galant! …
Mais Zeb gardait tréjous s'en'yi d'sus, dé peûx d'minsère,
Et y'l'avait ben raison … ch'tait sen heritchière! …
Mais un jour … hélas … ou vit George, d'Abréhan lé fils,
Et oull' en fut, vi-yous, ben vite prinse d'envie –
Car lé garçon était bé, et ben fait –
La garce né fit qué d'en rêver toute la niet! …
(Car ou né pensait qu'à l'amour, l'innocente,
Pas ès sous, ni ès quartchiers dé rente …)
Et sitôt qué la filliette en eut la chance,
- Ch'était un Dîmanche à l'Eglyise, jé pense –
Ou fit des clyins à George, et … y y'en fît étout,
Et les v'là en amour, ma fingre, sus l'coup!
L'Amour! … Tch'est qué j'gâgne dé vos pâler d'itai,
Ou savez entré vous coumment chounna s'fait …
Y'ià d'la cattinnie … dé l'embrasshie
Et nou s'en't conte dé biaux p'tits d'vis –
Et pis … mais né pensez pon qué j'voudrais en rire,
Ch'est pus aîsi à l'faire qué d'en èscrire!
Lé malheur était, qu'ov vos amouotheux,
Fallait faithe l'amour en cachète;
Car si Zébédée avait t'chais sus yieux,
Hélas! y'ièrait ben vite yieu mêchet! …
Car Zébédée voulait pour san biau-fils
Un vaisin, ben riche, qu'avait les qu'veûx gris …
Yieun qué la hardelle né pouorait pon souffri –
Oull' aimait mus lé jeûnne – chounna pour lé vi! …
Sus lé maînage à Zeb y'avait un racoin,
Bel et ben muchi dé la veue des pâssants –
La barraque à George n'en était pon lyien,
Et ch'était là la niche à nos deux amants : -
Un p'tit coup dé sîfflyet, et not' belle parre
Etaient ben vite là à s'entr' faire la carre! …
Un jour qué Zébédée passait ov' san vaîsin
Lé vier Abréhan, y vit dans un clyin
Lé coin ès amouâtheux … “Ah dame,” sé fit-y,
“V'là justément la plièche qué jé cherchais –
J'ai yieu siez Hunt un banc à bouan marchi,
Et yieun en fé, étout … pas en bouais,
Et si tu veurs, j'allons là lé pliaichi!”
“Unn' bouann' iddaie, vaisin,” sé fît Abréhan –
Nou s'sait ben assis là, à l'abri du vent;
Mais s'y l'est fait dé fé … escoûtez-mé,
Prennez m'en avis et peignis-lé –
J'ai inventai unn' bouanne peinture
T'chi vaut ben mûs qué toute la teinture
Qué nou's'a en ville – dites qué j'vos l'dit,
Oull' êmpêchéra tréjous vot' banc dé roui …
Et s'y vos pliaît – sé fit l'emblième –
Si ou voulez, jé lé peindrai mé même;
Et ch'est unn' peinture tchi sique vite.” – D'un trait
Entre les deux viers l'accord fut fait,
Lé banc fut plaichi et fut peint
Dé sept ou huit couôches au fin mains, -
Les fielles dé bouais d'alentou, manque dé temps,
Furent netties et amouâchellés souas le banc –
Zébédée – en richard – fumait unn' cigarre,
Et y'l'en fliantchi lé but sans y penser
Justément, v'y'ous dans unne carre
Des fielles t'chi v'naient dé ramâsser …
Et Zébédée s'en fut siez li ben content
Convier dé nier gin le vaisin Abréhan!
Un quart d'heure ôprès – et ch'est qu'oull' 'tait finne –
Vint pour trouver san galant la Cliémentinne –
Quand on vit lé banc si bé et ben peint
Ou dansait dé jouaie – et en tappait des mains
Et disait : “Ah, George, s'ra t'y à sen aise ache't'eu
Ben mus qué sus l'herbe, ou dans d'la mûcreû!”
Un p'tit coup dé sûffliet et d'unn' engambée
George sé trouvi ôprès dé sa ben-aîmée,
Et un' aut' quart d'heure ben vite sé pâssi
A s'entr' dire des douâcheurs et à s'embrâchi!
Oprès la jouaie veint souvent le chagrin …
Bétôt y sentirent unn' ôdeu' dé trallin,
Car lé but dé cigarre ov' les fielles mêlé
Avait souas le banc une' fouaie allumé!
Et pis d'un coup, la hardelle fit un horrible brai,
Qué George en trésaûtit – mais y fut effritai
Quand y vit fliambe et fumaie alentou d'Cliémentinne,
Et qué ses cauches brûlaient et sa robe dé mouss'linne! …
L'y maîme sentait dé la chaleu' dans ses braies,
Et ch'tait ses toutes bouannes tchi trallaient! …
Et le drap s'en allait ma fingre, coumme du tondre.
Et pis l'espaisse tracas de peinture sé mins à fondre
Et les t'nait cluttés au banc coumme ov' dé la bra …
Et y fallait rester à rôti coumme chonna!! …
Coumment eskappé à pareil malheur?
Y'eut de la gigottie, des morgaches, des teurs,
Des hûrles, dé grands cris, des plieurs,
Qu'enfin des vaisins t'chi pâssaient par lâ
Vinrent vais t'ch'est t'chi faisait un pareil sabbat. –
Et quand y virent l'affaire, y l'eurent ben raison
Y l'envyirent cherchi de s'cours à la maison …
Don Abréhan et Zébédée, et servantes et valets,
Vinrent chergis dé cannes, toubes et boutchets …
Heureusement y'iavait unn' source d'jiaue d'amain,
Et tous souâsirent not' couple joliment ben –
Les vaisins en firent du “fun” j'en crains,
Et y l'eurent dèspiet quand tout fut dêsteint! …
Mais nos amouôtheux avaient honte … y'l 'taient “very wet.”
Et y n'étaient pus
Qu'à mié vêtus –
Fallut lès emporter (siez yieux) dans des “blanket”!!!
Oprès l'èscalifias, Zébédée, le pèthe,
Eût, jé vos l'asseuthe, ben dé la minsèthe
Pour rèstablyi à sa fille san caractèthe –
Car le riche vaisin, qu'avait lés qu'veux gris,
N'en vouli pus dé la fille – y craignait les d'vis
Dé tuos les chens qu'avaient veu la comédie;
Car tous en riaient à s'en tryilly la gorge,
Et don, ben maûgré l'y
Zébédée fut oblige
Dé dounné sa fille en mariage à George! …
Mais les mauvaises langues … ouèsque y n'y'en a pon? …
Disent qué nos mathiès pour toute lus vie
Porteront tchiqu bord les merques dé lus brûllyie –
Et qué George tréjous un bouan garçon –
Peut passer partout pour un Francmachon!
No comments:
Post a Comment