1883: Nouotre bouanhomme de Pèthe

 Nouotre bouanhomme de Pèthe.

Autefais j'avaimes dans les bouans vièrs temps, chinq bouans régiments de Milice, une artillerie et une g'val'rie. Ach'teuthe dépis qué les Angiais s'en sont mêlèz, j'navons qué trais régiments et une artillerie sans cannons. J'voudrais bein savé si toutefais i montait dans la tête à un aoutre Rullecour dé v'nin tâchi de hapé Jêrri, quesque je f'raimes sans nouos cannons? Ch'nest pas du badinage que chunne-chin, ch'est du sérieux. I'm semblle qué les Angiais s'mêlent trop de nouos soudards. J'ai entendu dithe à nouotre bouanhomme de Pèthe, qu'était li-même corpora dans le bataillon de St.-Louorains, dans le temps de la bataille de Jêrri, que Pierson n'érait janmais battu les Normands si les Saint-Louorenchais n'y'avaient bailli un coup de main. Quant à mé je qu'menche à craithe que les Angiais ont d'envie de foui souos le pi de nouotre constitution, et tout douochement et sans faithe la mine de rein, tranquillement tâchi de nouos culbuter nouotre autonnomanie; chèt qui fait qué j'pâle dé d'même, chèst que dernièthement je m'sis apperchu de quiques-unes de lus rigs. Quand nou vé un Secretèthe d'Etat voulé forchi un Connêtablle à lis bâilli des papièrs quin n'y appartenaient pas, ch'nest fistre pas du gnolin qué ch'là. Mais ch'nest pon la le pièthe. Quand nou vé d'nos officièrs supérieuthes clliuttès à la porte, oprès de longues annaies de service dans nouotre Milice Royale, sans cérémonnie, sans tambours ni trompettes, sus la simplle paye de r'traite : Nothing a day and keep yourself, v'là qui nouos bâille à peu près la m'suthe de la libéralitai du Gouvernement Gladstone. Si la Reine savait tout ch'là je s'rais churieux de savè chein qu'oul en dithait. Je tréjous entendu dithe à notre bouanhomme de pèthe : “Mes êsfans, méfious tout autant des Angiais comme ou le faites des Normands,” et notre bouanhomme de Pèthe, était yun de chès hommes qui savait s'qui disait, j'vouos en rêponds.

 

Pour vouos prouvé que not' bouanhomme de Pèthe avait raison de se défié des Angiais, j'men vais vouos racconter une histouèthe vraie et autentique; parce que ch'est li-même qui nouos la disait quand j't-aimes jannes.

 

Notre bouanhomme de Pèthe, dans chu temps-là, démeuthait a la Ville-au-Veslet, et il avait pour vêsin un Angiais qu'avait yeu dispute avec Mête Jean Arthur, de la Ville-au-Neveu, quand qu'est qu'né v'là, une belle serrée, à onze heures, qué ch't'-Angiais vînt d'mandé à notre bouanhomme de Pèthe d'allé avec li, comme i voulait allé siez Mête Jean Arthur, faithe la paix et bèthe un verre de grog. Notre bouanhomme de Pèthe, qu'était tréjous prêt à faithe pliaisi, s'en va tout bouannement avec ch't-Angiais, jusqu'à la Ville-au-Neveu, siez Mête Jean Arthur, pensant tout naturellement qu'i faisait une bouanne oeuvre. Il était minsnièt, quand nos deux hommes arrivirent siez Mête Jean Arthur. A'ch't'heuthe, i fallut tapper à la porte et flianqui du gravi à la fenêtre, pour rêvilli Mête-Jean. Enfin, le v'là tout bouannement qui se montre à la fênetre et notre bouanhomme de Pèthe lis dit que ch'était le vêsin Angiais qui voulait faithe la paix et bèthe un verre de grog. Oh! alors, Mête-Jean n'était pas content et nouos dit : “Est-qu'ou n'avèz pas pus d'idée de vouos en v'nin à ch't'-heuthe ichin, la niet, rêvilli tout le monde? Est-che que demain n'éthait pon fait si bein? Enfin, flianquant san bonnet d'nièt de côtè, et oprès avé mins ses brais et passé ses gallaces pardessus ses êpaules, dans un clin d'gui, la porte fut ouverte. Ach'theu, n'ev-chin qu'arrive le noeud de la question : Chu pat d'Angiais, au tant faut-i que j'en dise, le blaiguairde qu'il était, se lanchi sus Mête Jean pour li flianqui une morgniflle. Heureusement qu'y trouvi s'n'homme, car le bouanhomme Mête Jean s'ertouoni et vouos lis fiche la pus orrible râcliée qui n'eut janmais gouotai d'sa vie, au point que le scélérat d'Angiais fut oblligi de lis d'mandé grâce. Nouotre bouanhomme de Pèthe, naturellement, en resti tout êsbahi et n'savait que rêpondre à Mête Jean, qu'était furieux comme de raison contre nouotre bouanhomme de Pèthe, d'avé amenè un pat d'Angiais à c'h'teuthe là d'la niet pour l'insulté.

 

Jène raconte chute petite histoithe-là que simpllement pour montrè que nouotre bouanhomme de Pèthe avait raison quand i nouos disait tréjous de nouos défier tout autant des Angiais que des Normands. Le fait est je considèthe que les Jêrriais en ch'qui concerne lus priviléges et lus franchises, comme dans l'agriculture, lus terres et lus mêsnages sont en dangi d'un côté d'être tondus par les Normands, et de l'autre d'être mangis par les loups. Quant à mè, j'né qu'à dithe : Aux armes Jêrriais coumme des hommes et défendèz vouos droits; né v'là l'avis que vouos donne un vier

SAINT-LOUORENCHAIS.