1858: Caroline et sa crinoline!

 Caroline et sa crinoline!

 

 

…………. Et mon doux!

Comme te v'la paquie ma pouore Carolinne,

Ov tes biaux biaux et ta crinollinne,

N'ou dirait pardingue qu'tu revains du sonneux,

Te v'la ben épinguie, regarde dont tes gueveux

Qui fliottent au vent ov tes falballas,

Et di mé ouest donc ouest que tu t'en vas?

 

J'm'en vais vite siez nous, et pour tout de bon,

Ergarde dans qu'il état est man pouore cotillon.

En sortant d'léglise, crac, le v'la qui trille,

Et quand j'r'garde i tenait à une qu'ville,

Pis touos les avers, et jusqu'au Tom D'La Haie,

Qu'iest tréjous si ben paqui dans ses neuves braies,

S'minrent tous à crier, “r'gardez la Carolinne

Qui perd san cotillon atou sa crinollinne!”

Impertinens quou zètes que je m'mins à lu dire,

Et les v'la a s'moqui d'mé et de lus mettre à rire,

A couore souotre mé, et à faire des houras!

A faire déhaller touos les tchans et les cats.

Tais té, tais té ma fille, je l'us f'rai péyi pour

J'en verrai tout sauter, j'en irai à la Cour.

 

N'y va pon, cré mé, car tu te feras moqui

De touos chez villais qui sont pêtris d'orgui.

 

Si ferai, si ferai j'irai, et le biau Tom D'La Haie

Y perdra ses sous ou y laissera ses braies

Le laidure verra, li qui est de la ville

Si chest d'même qu'nou fait la carre ès filles.

Si le John le savait, chest li qui s'rait mâri,

Ecoute ma fille, car je n'tai pon couore tout di.

En couorant pus vite pour mus m'écapper,

V'la tip on un tchan qui queurt oprès mé,

En viyant ma robe qui tout d'un bord pendait,

La baloque en ouassant en fait v'nin trais ou quatre,

Qui sautent d'rière mé et dans la boe m'abatte,

Ma pouore crinolinne i l'ont toute ravagie

R'garde ma hardelle comme oul est toute trillie?

 

Je te l'avais ben dit quand je te vis ov chu fro

J'tais seure ma fille qui t'arriverait quique dro

Tu étais comme une Jougue dans une large pouque

Et comme un Epeûrat jûqui sus une frouque.

Nou t'érait prins pour un barrique viéde,

Touoné sus sa bonde ov des cercles touos raides.

J'ne m'étonnes pus que tchans et garçons

S'moquent de nouos robes et cotillons;

I sont touos d'un avis et pis s'entre disent

Qui gna pus de run pour ïeux à l'église :

Je pâle des garçons, car les tchans et les cats

En nos viyant nos craient d'z'Epeûrrats,

Et n'métonne pus ma pouore Carolinne,

Qui z'aient mins en d'locre ta belle crinollinne.

Cré mé, cré mé, ne va pon à la Cour

Ch'nest pon la qu'nou fait l'mus l'amour.

P't'être ben, mais ……………………………

…………………………….. mais qui? Cré mé, n'y va pas,

Car sit u y vais, seure tu t'en repentiras.

 

1858