1959: Merrienne et sa clioche

 Merrienne et sa clioche.

Ph'lip au péthi d'sa vie.

 

Au Portinfé,

Jeudi au sé.

 

Moussieu l'Editeu,

 

Ch'est avec grand pliaisi que j'peux vos dithe que j'vais bein mûs. Il est vrai que mes vieilles gambes n'ont pas ocquo grand forche et que j'marche, pour la preumié fais dans ma vie avec une chouque, et que j's'y ocquo maigre comme une hache, mais au mains j'peux allé ichin et là sans trop d'peine, et mûs qu'chonna j'ai r'quémenchi à mangi, et si chonna continue j'espèthe de r'vais bétôt un mio d'chai sûs mes viers os.

 

Mais, Moussieu, si tout va assez bein avec mé, je n'peux pas en dithe autant d'ma bouonnefemme. A peine ou m'vit sûs mes pids que la v'là au liet, dîsant qu'oulle ait seuze qu'oulle avait attrapé ma dang'reuse maladie en m'soignant, et qu'ou doutait si jamais ou r'déscendrait les d'grès sinon dans une bouaite. Hier au sé ou voulait même se métre à êcrithe l'inscription sûs san tombé, et quand j'l'y dit d'n'être pas si bête, r'fûsant d'l'y fourni pliume et papi, ou m'dit qu'ou viyait bein que j'voulais la vais dans l'chimtièthe pour que j'pouôrrais me r'mathié à tchique jeune hardélle.

 

Ach'teu, Moussieu, ch'est tout bein bon, mais quand ou décidit qu'oulle tait mouothante ou m'fit l'y donné une p'tite clioche, qu'oulle a aupi d'san liet, et tchi sonne à-bein-près toute les djais minutes, pour autchune pétite chose tchi l'y veint dans la tête. Ou r'fûse de vais un docteu, dîsant qu'ou n'veur pas ajouôté ès frais de s'n'entêrrement, mais j's'y seux que si yun s'montrait et allait l'éxaminé, y l'y dithai qu'ou n'tait pas malade du-tout, et l'y donn'nait en avis d'sé l'vé et d'faithe san travas comme de couôtume. Nou vêrra, mais je n'pouôrrait pas enduthé chonnechin bein longtemps, et si la vieille garce n'est pas à bas dans un jour ou deux, je s'sais même capablye de l'envié à l'hopia, et ou savez Moussieu, tchèsque je crais de ch'institution-là.

 

J'ai dêfoui mes patates, et l'Bram, man fils, l's'a portées en Ville. Y m'faisaient dans les quatre cabots et nou n'peut pas s'pliaindre de chonna à la saison tch'il est. Il est vrai qu'il eut une djobbe à s'dêfaithe du dernié lot, car dans l'store y trouvait que y'avait trop d'moyennes, trop d'vielles patates, et trop d'mottes de têrre dans les bathis. Hélas, que l'monde sont partitchuliers de nos jours!

 

En Ville y pathaissent a avé d'la diffitchulté avec lûs Chantgniers. Le Sieur Knight ayant résigni, ils ont yeu à tchais sûs un homme tch'a dêjà d'l'âge, et tch'a tait en mal santé pour des années. Je n'sais pas, au moment, s'y tcheindra, mais ch'est seux et cértain que si les Chantgniers de Saint-Hélier continuent à produithe des cértificats d'lûs docteurs, certificats tch'y n'sont pûs capablyes de faithe la djobbe, ou bein, d'vant long, y faudra y mettre des femmes, ou abandonné l'systême honorifique tout-à-fait. Il est grand temps que y'aie un change. Dans les pâraisses de campagne nânin, car là quand y s'arrive une vacance pour Chantgni, nou trouve tréjous un homme tch'a dêjà sérvi la pâraisse, et tch'a donné ses preuves, comme nou dit en bouon français, ch'est-à-dithe tch'y s'est bein atchitté. Des fais sans nombre nou a veu un bouon Chantgni faithe un bouon Connêtablye, et même un bouon Juge, mais dites-mé, sous aviez, Moussieu, a chouaisi au jour d'agniet un Juge parmi les Chantgniers de Saint-Hélier, le tchai qu'ou prendrez! Miséricorde!

 

Ach'teu, Moussieu, y y'a une autre chose que j'voudrais vos dithe. Ecoutez si vos pliait. A-matin, ayant yeu plien l'dos de chutte fichue clioche, j'm'en s'y allé dans la route, mais après tchiques minutes, j'ai 'tait bein content de r'venin dans man bel. Trais fais d'siétte, Moussieu, j'ai 'tait forchi de m'fouôrré contre le fôssé, pour sauvé ma vie. Trais fais d'siétte un môteur m'a mantchi par un rain-du-tout. Le traisième (ch'tait une femme tch'y cachait) allait si vite et 'tait si près du fôssé que Ph'lip du Portinfé a êcappé une mort subite par un mithaclye. Et j'vos d'mande, Moussieu, si ch'est juste qu'un piéton, au jour d'agniet, n'peut pas allé dans la route, sinon au péthi d'sa vie. Ch't'arlevée, j'ai caltchulé que si l's'Etats n'font pas tchiquechose pour réduithe le nombre de chais inférnales machines, y'en étha yunne, à compté tout, pour chaque pérsonne ichin en Jêrri et touos les jours y'étha une procéssion d'cadâvres à l'hôpita, et y n'y'étha pas d'run dans les chim'tièthes.

 

Comme ou pouvez l'craithe, Moussieu, le temps agniet m'a empêchi d'allé au Show d'l'île en ville. J'éthais peut être porté là et ram'né, mais à qu'menchi je n'savais pas trop bein tchi faithe d'la Merrienne et sa clioche, épis, ayant 'tait si mal, je n'veur pas attrapé du fraid. Mais d'vant l'tais, le Bram est v'nu m'dithe tchèsqu'y s'est arrivé. Y m'a dit que ch'tait un raide bouon show, et que l'temps, à l'prendre tout travers, n'a pas 'tait trop mauvais, sinon quand il a 'tait tchéstchon d'jugi pour l'championnât des vaques, quand il est v'nu une longue achie. Y criyait que l'Sieur Pallot l'méthitait, mais qu'la vaque au jeune Le Cornu 'tait bein trop bâsse dans la ligne. A prendre yun dans l'autre, y n'crais pas qu'les Juges ont fait pûs d'bêtises que d'couôtume. Pour en fini, y m'a dit que l'Frainque Avri avait yeu un raide bouon jour, mais que l'Jack Rondé, pour la preumié fais dans vingt-trais ans, n'avait rain gagnit au show et s'en est r'allé sans un seul riban. Et, Moussieu, n'en v'là assez pour agniet, car j'entends la clioche tchi sonne à-haut.

 

Ph'lip.

1959