Here's today's text by our author of the month, Henry Luce Manuel:
Une Malédiction
Je n'souait' pas que men en'min meure,
Coumme un' branq' cassée, de bouonn' heure -
Chest trop commun, chounna!
Et tant je l'hais que c'que j'li souaite,
N'est pon d'sous ou d'santé la perte -
Tant souffr' mon dgi! de chla!
Je n'souait' pas qu'les grands l'humilient,
Ou qu'ses amins le mortifient -
Pus loin je veux allé!
Je n'souait' mêm' pas la chose amère,
Qu'il aie ov' des ingrats à faire -
Quoiq' chla sait du' - je cré!
V'chin c'que j'li veux! - Qu'i' se marie,
Et que l'sort li dounne un' grégie
A qui rein n'fait pliaisi;
Qu'i' l'aim' longtemps, et, sans relâche,
Durant bein des trist' années, tâche
En vain d'la fair' changi.
Qu'ou cach' tout l'mond' - qu'ou c'mand' - qu'ou gronne,
Et tout c'qu'i' dit, qu'à ma' ou touône -
Que tout pue à ses yeux!
O v'là la femm' qui f'ra d'sa vie
Qu'un' longue effriyiable agonie -
V'là c'qu'à m'n en'min je veux!
No comments:
Post a Comment