Homme et Chan

Né v'chîn l'texte d'aniet d'not' auteu du mais, Henry Luce Manuel:

Here's today's text by our author of the month, Henry Luce Manuel:

Homme et Chan

Men Ame était bein pus que triste,
Priant de s'envôler;
Car, pas moyen y-avait de vais,
Que Niet, pour l'entuôrer.

“J'ai fait chet que j'pouvais,” disait
Mon queur crévant, gonflié: -
“Tromp'rie partout! - O, mort! arrive!
Ouvre ta buoch', - Tombé!”

“J'ai travailli; le buon Dieu l'sait!
Et pas manqui d'ardeur,
De jour, de niet, ai-je donc piochi!
Pour D'vé rempli, ov queur.”

“J'ai cherchi pliaire, - me faire utile; -
Rein que paff' n'en r'chévant:
Tant, qu'un biau jour je m'sis trouvé
L'Homme et la Vie damnant.”

.........................

Mais v'lo-t-i pas qu'soudain un miot arrive...
Un Chan! et i' s'met à m'aimer!
Pas d'tromp'rie là! Il est vrai coumme Apôtre.
Pour mé, j'sis seure, i' s'frait fair' tuer.

Et mé! qu'étais si ennyé de la vie,
Qui pour la mort tant aspirais; -
Anien; de vrai! ne fuch' que pour “Cora”
Vivre aquôr quiq p'tit d'temps j'aimerais.