A chelle que j'aime

Né v'chîn l'texte d'aniet d'not' auteu du mais, Henry Luce Manuel:

Here's today's text by our author of the month, Henry Luce Manuel:

A chelle que j'aime

Quiq' fais j'pense au PASSÉ, - et M'N AM' se r'plie
Sus des scèn's qu'appartienn't à c'qu'a été:
Et, - las! mon Dgieu! sens-j' donc coumm' chutt' puôr' vie
N'est au p'us et au mus que vanité:
Mais justement coumm' j'sis à m'attrister,
Un moment d'lueur et d'joie je me rappelle,
Qui joyeux, veint tout l'passé racatter -
Chest quand tu m'dis, la premièr' fais, ma belle -
"Je t'aime!"

Quiq' fais j' pense au PRÉSENT. Je r'gard' la vie
En fache, et tuôn' les yeux autou de mé;
Et, - las! que ves-j'? - Biaux-biaux, hain', mensong'rie -
D'auchun' vertu à vo's fair' presq' douté.
Aquôre un moment, - et je desespère...
De grand bounheur, juste alors j'pense en té, -
En té, la foi et vérité, ma chère,
Et M'N AM' se r'lèv' - car dans tes mots ou' cré -
"Je t'aime!"

Quiq' fais j'pense au FUTUR. Et assombrie
Men idée va s'assier' près du tombé:
Et je m'demand' de r'chet, - Qu'ê'ch' que la vie? -
Finit-al' là?..... ou,...... Qu'ê'q' nou' dait dév'né?......
Pis j'pense en té, et M'N AM' n'est pus peureuse -
Car, Dgieu n'a pas, mains qu'queur de femme aimé;
Les dreins mots qu'oulle ouïra l'a f'ront heureuse -
I' s'ront les tiens, ma chèr' - du Ciel la clié -
"Je t'aime!"