Un' Buonn' Nouvelle Année

L'auteu du mais: châque mais en 2015 j'allons bliodgi des textes d'un auteu Jèrriais. Not' auteu du mais d'Févri est Henry Luce Manuel (Henry Luce Manuel 9/6/1818 - 2/12/1875).

Author of the month: each month in 2015, we'll be blogging texts by a Jèrriais author. Our author for the month of February is Henry Luce Manuel (Henry Luce Manuel 9/6/1818 - 2/12/1875).

Un' Buonn' Nouvelle Année

Buonn' nouvelle année buonn's gens,
I'un' millieur' que chell' de d'vant!
Jours sans peine, et niis sans plieurs;
Port' freumée contr' les docteurs;
D'aigrifins être à l'abri;
Rein à faire av le fossi:
V'lo l'heureus' nouvelle année,
Qui par nous vo's est s'u'aitée!

Buonn' nouvell' année, buonn's gens -
I'un' millieur' que chell' de d'vant!
Homm's à vous, o jeun's biautés!
Miots ès coupl's desappointés!
Buon travas et buonn' foison -
Joie et paix dans chaq' maison:
V'lo l'heureus' nouvelle année,
Qui par nous vo's est s'u'aitée.

Buonn' nouvell' année, buonn's gens
I'un' millieur' que chell' de d'vant!
Coeur ligi à caus' du bein
Qu'ou puôrez faire à plien' main;
Tant d'pas vers Dieu avanchi
Que vers fosse allez franchi -
V'lo l'heureus' nouvelle année,
Qui par nous vo's est s'u'aitée!