Here's today's text by our author of the month, Henry Luce Manuel:
Leignes à m'n êfant qui vein d'muori
Tout est fini. La vallée de la mort
Là v'là passée. Le souffrant ach'teur' dort.
Pus d'cris, ni r'gards, ni termes d'agonie!
N'ya pas à souffri' iou n' yia pus la vie.
O, Gieu merci!
Tout est fini.
Tout est fini. Les rêv's que l'amour eut
Sont touos détruits. Mais, qui?.... Chès rêv's euss'nt pu
Condire à ma'... Pein' pour nous et pour li!
Or, tout c'qui est, est bein, le Sage a dit.
Donc, Gieu merci!
Tout est fini.
Tout est fini. A li sont épaignis
Les grands combats, les minsèr's de chutt' vie.
Et, ô surtout! la quiestion: " Mus valu
"N'eut i' pas que je n'euss' jamais vécu?"
Aquôr',-Merci!
Tout est fini.
Tout est fini? - Mais, non! - Chôs' qu'est crée
N'périt jamais. Ou' peut êtr' transformée -
Mais cessi d'êtr'? Jamais! - Mort, donc tu vis!-
O men éfant, - Tu n'nos as qu' dévanchis!
Mon Gieu! - Merci!
Rein n'est fini.
O mill' fais nan: - Rein n'est fini! L'tombé
N'est que le c'min, grand Gieu, qui mène à Té!
S'menchis je somm's ichin, - v'la tout. - Che n'est
Que quand nou' meurt qu'à vie réell' nou' naît!
Seigneur, Seigneur - Merci!
Je vé: TOUT VA Q'MENCHI!
No comments:
Post a Comment