Notre Père

Né v'chîn l'texte d'aniet d'not' auteu du mais, Henry Luce Manuel:

Here's today's text by our author of the month, Henry Luce Manuel:

Notre Père

O Notre Père, le Père de tous,
Qu'ont 'tai, qui sont, ou devront être;
Dans Ten amour immens' fais-nous
Ta Majesté Pouvé counnaître.

Du Trône Eternel dans les Cieux,
Qu'embrach'nt le Temps et l'Infini;
Jette, o jett' sus nous Tes yeux,
Pour no's sauver et no's béni.

Que Ton saint nom sait sanctifié,
Ta grâce éternell'ment chantée,
Le nom n'êtr' jamais blasphêmé,
La grace à tout jamais êtr' louée.

Que Ton Règne, O not' Dieu, not' Rouai,
Veinne! Et, Seigneur, qu'i' n'tarde pas -
Le règne, et d'Paix et de vraie Fouai,
Qu'écras'ra l'ma' même ichin bas.

Seule Infaillible et seul' Parfaite
Est Ta Saint' Volonté Divine; -
Just' coumm' dans les Cieux oulle est faite,
D'vant lié sus Terre O qu'nou s'incline.

Dans Ta grand' bonté donne anien,
Et veuill' jamais ne no's l'ôter,
Chet qui no's faut d'pain quotidien
Pour l'âme ainchin qu'pour corps garder.

Pardonn'-nous comm' nous je l'faisons,
Fai-nous toute offence oublier.
Ch'est Ta mârison que j'd'mandons
Si j'hésitons à pardonner.

Et n'no's laiss' pas êtr' trop tentés -
Je somm's si faibl's que j'puorrions quais;
Contre aguets d'ma' fai-nous ferrés
Et no's en délivre à jamais.

Car, O Ancien des Temps, le règne
Qu'était avant que l'Jour se fit,
Est l'sien que je T'prions qui veinne,
Parmi les homm's être êtabli.

A Té, Esprit sans borne ou fin,
Appartchient l'Pouvé de tout faire :
Exerce-le, O Dieu bénin!
Ecoute et exauc' not' prière.

A Té fut, à Té est, la glouaire,
Qui mêm' devant le c'mench'ment 'tait;
Qui s'ra êternell'ment, O Père!
Amen, amen! ainchin que c'sait!