Ov qui n'avé à faire

Né v'chîn l'texte d'aniet d'not' auteu du mais, Henry Luce Manuel:

Here's today's text by our author of the month, Henry Luce Manuel:

OV QUI N'AVÉ A FAIRE.

Que j'saie pardounné - Dieu bénin!
Mais, d'vrai, je n'héq' pon un enn'min;
Je n'peux qui faire!
Tout-d'mêm' quand chtila qui m'en veut,
En brav' hain' fait tout chet qui peut, -
Drait d'but, - pour niaire, -
J'ai pour li quiq' sort' de respect,
Car ov' li j'sais à qui m'en t'né, -
En gard' je sais qui faire!

J'aim' mains le mal-autru qui dit
Que d'son vivant i' n'a cherchi
Fils d'femme à pliaire;
Et qui tâch' chla de démontrer
Par, tous à la rond', déningrer -
Lang' sale! âm' naire!
Mais même avec dité 'ya r'cord:
N'ya pas d'dangi, - chest boe qui mord;
Et nou sait bein qui faire!

J'aim' mains aquor' le Caud et Fré, -
Le sien qu'est Chan et Lièvr' - qui fait
Tout pour tous pliaire:
'Ya trop de double-fache ilà:
Et si, au fond, - i' n'songe à ma' -
Coumm' j'voudrais l'craire -
Pas mains n'êche Oisé à r'douter.
Mais, - même ichin - 'ya d'bon, qu'nou sait
Ov' qui nou z-a à faire!

Mais c'qui fait buolli tout mon sang,
Qui m'effritt' - qui met tous dédans -
Faisant accraire;
Sus qui, se fiant le moindre miot,
Nou s'perd, - chest un Amin qu'est Mo' -
Qui laiss' tout faire, -
Et n'hall' ni boutt' quand dangi veint...
D'un tel amin, o! défious bein!!
Car i' n'ya rein de pière!