Thursday 26 January 2012

Lé Jour d'l'Australie - Australia Day

CaptainjamescookportraitAcouo un but d'George d'La Forge pouor l'Jour d'l'Australie:
For Australia Day, here's some more from George F. Le Feuvre's account of his trip to Australia in 1963:
En Australie!
J'arrivînmes à Sydney, capitale dé l'Êtat dé la Nouvelle-Galles du Sud, lé quatorze dézembre, 1963, lé viage dé Southampton ayant duthé trais s'maines et trais jours! Sydney est la pus grand' ville dé toute l'Australie.

Ouaithe qu'autcheun rapport entre la colonisation d'Australie et la dgèrre d'îndépendance en Améthique es'sait pûtôt considéthé doutabl'ye, si chutte dgèrre-là avait finni difféthemment, la cité d'Sydney n'éthait p't êt' janmais existé! En 1770 lé Cap'taine James Cook, dans l'navithe Endeavour, dé 370 tonnieaux, navidgit l'long d'l'entrée du havre tch'est l'Sydney d'à ch't heu, sans y'entrer, et li donnit l'nom dé Port Jackson en l'honneu d'un moussieu d'l'Amithauté Britannique. Auve lé Cap'taine Cook, y'avait un moussieu naturaliste nommé Joseph Banks tch'avait êtchipé l'expédition à ses frais. Lé navithe mîns à l'ancre, et i' mîndrent lé pid à tèrre, dans la Baie Botanique, mais n'y restîdrent pon. Lé viage fut continnué lé long d'la côte dé l'Êst. Chtte partie du nouvieau continent fut nommé La Nouvelle-Galles du Sud viyant tch'i' pensaient y vaie eune èrsembliance au comté de Glamorganshire, en Galles.

Onze ans pus tard, la dgèrre d'îndépendance en Améthique vînt à fîn, et l'nouvel Êtat Amétchitchain èrfusit d'accepter l's hommes et les femmes condamnés qué les Juges Angliais continuaient à forbanni. I' fallait don trouver eune aut' colonie, et l'Sieur Banks, èrvénu en Angliétèrre, suggéthit la Baie Botanique au gouvèrnément. Sa suggestion fut adoptée en prîncipe en 1786. Lé Cap'taine Arthur Philip, dé la Marine Rouoyale, fut nommé Gouverneux d'la nouvelle colonie, et en janvyi 1788, onze navithes, auve pus d'mille pèrsonnes à bord - la pus grand' partie d'ieux étant des condamnés forbannis - arrivîdrent et mîndrent à l'ancre dans la baie.

I' s'adonnit qué l'Cap'taine Philip trouvit la côte trop basse et marécageuse pour y'êtablyi eune colonie. I' décidit d'aller vaie l's alentours du Port Jackson, et trouvit j'havre excellent comme lieu d'habitation et d's'embèrtchi tout l'monde là. I' r'nommit l'nouvieau port Sydney d'après l'Vicomte Sydney, ségrétaithe d'Êtat en Angliétèrre dans chu temps-là, tch'avait autorisé l'expédition. La date du d's'embèrtchément, lé 26 d'janvyi, est célébré touos l's ans en Australie comme jour dé fête.

No comments: