Tuesday 20 July 2010

PW Luce (1882-1966)


Totem Pole, Vancouver
Chèrgi preunmiéthement
par twiga_swala
Philippe William Luce, auteu Jèrriais, mouothit à Vancouver au Cannada l'20 d'Juilet 1966.

Les Mâts d'Tôtèmes

Ches drôles de mâts sont d'simagrues
Doeisiaux plieumés et d'bêtes pélus,
D'paissons qui nagent dans l'air et l'yau,
Et des bourdons un p'tit mio gros.
I y'a des r'nards et des héthans,
Des corbins niers et des rats bliancs;
P't'être un ca-ouan, ou une lécarde,
Ov des grands yeux qu'tout l'monde r'garde.
Un lion de mé avec des dents
Assez affreuses pour tuonné l'sang
Des grosses baleines (respé d'honneur)
Qu'écopissent a immense hauteur,
Des biches barbues, et des moutons
Avec des cornes qui tuonne en ronds,
Des ours, des loups et des crapauds
(Qui n'sont pas Jerriais, ben s'en faut)
Et un serpent qu'est l'djiable li-même,
Collé autou du Mât Tôtème!

Nou-s-est oquo mus d'être siez sé

D'pis que j'sortis, dans l'mais d'avri,
J'ai tout l'temps veu la scène changi :
D'abord fallait crouaîsi la mé,
Pis le Canada traverser :
De l'Est au Ouest, du Sud au Nord,
De long en large, j'vais d'touos les bords :
Mais malgré ch'la, pour dithe le vrai,
J'aimthais oquo mus être siez mé.

Tchesque est dev'nu d'mes camarades d'êcole

Y'en a plusieurs au Canada,
Même y'en a qu'ont lus siez-yeux là;
Chest un payi fré, mais bein sain,
Les siens qu'y sont lus y p'yaisent bein
Et né r'vennent pas souvent:- T'chique fais
I restent là, ne r'vennent jamais.

A bétôt, Jerriais

En attendant j'm'envais m'prom'ner,
Et un mio du monde visiter
Par chin par là; vaie du pays,
N'ya rein d'itait comme de viagi:
A bétôt.

No comments: