S'lon les nouvelles, lé nouvieau Gouvèrneux d'Jèrri s'sa appouainté auve l'accord dé Jèrri. Nou-s'a mîns eune annonche pouor attriotchi des candidats. À seule fîn d'aîdgi des d'mandeurs d'empliai, né v'chîn tchiques buts d'chein qu'les auteurs Jèrriais ont êcrit entouor les Gouvèrneurs....
According to the news, the new Lieutenant-Governor will be appointed on the recommendation of a Jersey panel, and an advertisement has been placed to attract candidates. In an effort to give jobseekers an idea of what they'd be letting themselves in for, it's only fair to provide some samples of what Jèrriais authors have written time past about previous holders of the office....
Eune lettre dé 1892
J'ai veu dan vot' gâzette qu'ou yavez dit quë l'ancien Gouverneu était malléable et i paraît que chest un ben mauvais mot. Man vaisin Clem qu'est êcollé, dit que mal veut dire mauvais et léable est un accourchissement de diable. Si chest vrai qu'ou yavez voulu dize mauvais coume le diable chest la Nouvelle Chronique qu'à raison.
Pus fraid que Jamais?
J'allons aver un nouvieau Gouverneux. et nou-s-espéthe tch'i' s'accoutum'tha à notre manièthe de vivre aussi vite que pôssiblye, car les Jèrriais sont de drôles de balloques. J'me r'souveins de hardi de chais Gouverneux. Parmi yeux y'en avait tchi 'taient de vrais méssieux, mais étout, parmi l'nombre y'en avait que nou 'tait contents de s'en défaithe. Y'avait, par exemplye, le Général Abadie, tchi 'tait tréjous en brit avec le Baillyi Vernon, et tch'avait 'té envié pour réconstituer la Milice. Si jamais y'a yeu un Gouverneux tchi 'tait détesté, ch'tait l'Général Abadie, mais le Général Bingham, tch'eut l'malheur dé perdre sa femme, 'tait l'contraithe, car touos les Jèrriais l'aimaient et avaient r'gret de l'vaie s'en aller.
Dans la nièth de Lundi à Mardi
I' y y-a tchique temps j'vos dit que le m'en tais r'venu bein vite de la pâraisse à Dolly ayant ouï des bang! bang! d'unne arme, dans iun des clios qu p'tit Flip de la maison d'ardouaise, le sien qu'a mins de côté le miot d'serque, cause de tant d'histouèthes.
Savous pourtchi qui tithi s'n'arme, bouannes gens.
Eh bein! mé, j'm'en vais vos l'dithe. Le p'tit Flip avait lu la gâzette et quand il apprit qu'i y-avait un nouviau Gouverneux en Jerri, qu'il tait dans sa pâraisse et que nou n'avé pas ieu la civilité de tithé un salut du châté, i' s'fît: Mé, Flip, j'men vais lî tithé un salut avec m'n'arme.
Le Grand Bézaar de Saint Ouen
Nos v'la tous yiallé dans la "van" avec deux chevaux au galop
J'arrivimes au grand Bézaar en temps, j'navaimes pas eunne minute de trop.
Je craigniêmes de n'vais pas le Gouverneux, sa dame, et touos les aristos,
Mais Oh! Malheur; t'chi désappointement, il tet restet es Ecréhos.
La Milice
Un tout-se-mêle de Gouverneux s'imagini que nos Officiers et nos Sergents étaient un tas d'achocres et i' persuadi l'Gouvernement à les rempliaichi par des Irlandais et d's Angliais.
Tchique temps opprès I' nos hallithent nos braies et nos firent en mettre des naithes et à la pliaiche de not'e biau chapé i' nos baillithent une petite "scotch" avec des ribans qui vos cluittaient au co quand i' tchiyait d'la plyie.
Merrienne is insulted
Sans doute y'en étha en ville tch'y nos manq'thont et tch'y trouv'thont chonna drôle et y s'pouorrait même que la Princêsse voudra savé tchèsque chonna veur dithe, car sans doute oulle a ouï pâslé d'nous, mais je n'm'en fiche pas mal. Je n'ithais pas quandmême que l'Gouverneux et l'Baillyi et toute la dgâingue veindraient me cherchi dans une vétuthe avec quatre chévaux et un regiment soudards à ch'va à les siethe.
Le départ du Contingent Jerriais pour le Transvaal
Y avait pus d'vingt mille personnes sus la tête de la cauchie,
Le Gouverneux et ses aides-de-camp, et la band à Mess Mackee,
Qui jouit tout l'jour "God Save the Queen", tandis qu'du Fort Régent,
Le Coronel et ses miliciens saluithent le Contingent.
No comments:
Post a Comment