1918: Man Crime (2)

 (siette)

NOUORRITUTHE RÉGLIÉMENTAITHE

 

Les policemen qu'avaient fait la fouolle fudrent entendus. Y'un d'y'eux produisit le catalogue qui faisait mention d'allumettes à bouan marchi qu'il avait dênichi dans l'imprim'thie, mais l'Bailli dit qu'i' datait de 1900 et n'pouvait dons pas être suspect.

 

L'autre policeman produisit le lunch à Fraink Amin, qu'il avait séquestrè et qu'avait 'té analysé par M. Toms, mais que tout était en conformitè ès régliéments: un quart de grain d'Espagne, un quart de fèves moulues, un quart de flieu d'blié; un quart de bran et un quart de moulèe mêlèe d'pétuthe à faithe le pain; reinqu'la maintchi d'l'allouange ordinaithe de sè dans l'beurre; du jaune chucre et d'la m'lasse à confithe la g'lèe; et d'la gâche sans chucre, beurre, graisse, ni flieu d'bouanne qualité à la faithe.

 

Quand Mr. Toms eut certifié l'exactitude de s'n'analyse, Fraink Amin affirmi que ch'tait bein là le mangi que sa femme lis dounnait et que, pour sa part, i' n'avait pas autchune idèe que l'atchusè avait fait une migaud d'chucre en pain.

 

ENTRE-ACTE

 

Le Président dit que l'audience es'sait suspendue jusqu'à deux heuthes et d'mie et nou' z'entendit Moussieu' Trémel d'valler les d'grais d'la Cour au galop pour aller dréchi la tabl'ye pour le Jury.

 

La gall'rie se viedji tout d'un coup; les témoins s'en allidrent avec un grand air d'importance. Les membres du Jury sortidrent les dernièrs, le nouvieau Vicomte, qui jouait occouo machinalement avec san but d'lachette en noeud coulant, allant l'avant avec Teddy Boielle, qu'avait, chose êtrange, 'tè nommè Chef du Jury.

 

I' s'en allidrent don' tous avair un bouan dîner ès frais d'La Couronne, mais mai - j'en ai occouo l'tchoeu gros quand j'y pense. Hélas, Hélas!

 

L'ERPRINSE

 

Quand la cause fut erprinse, le premié témoin fut l'président du Coumité d'la D'fense de l'Ile, qu'expl'yitchi coumment que le Coumité (Département de l'Alimentâtion) avait constatè l'êcart dans les r'tours du chucre vendu et du sien qu'avait 'tès mangi.

 

En rêponse au Protchuleux, le témoin dit qu'la valeur d'un lopin d'chucre, au moment actuel, était inestimabl'ye et qu'oul' augmentait occouo de jour en jour.

 

Le préchain témoin, un jeune corps, qu'est l'empliyè du Coumité, dêcliathi que l'atchusè n'avait yeu autchune licence pour garder un lopin d'chucre de pus que s'n'allouange sus sa carte.

 

Les autre témoins fudrent entendus rondement les uns après les autres.

 

Moussieu Parpaillon, sans voulair être trop certain, dit qu'il avait vendu du chucre de même, mais pas derniéthement.

 

L'Avocat L'Gros lis d'mandi s'il en avait jamais vendu à l'atchusè et i' rêponni que j'avais tchicfais 'tè dans sa boutique, mais qui n'se r'souv'nait pon de ch'qui m'avait vendu.

 

L'Avocat "Ou' n'pouvez pas dithe qu'ou' l'y'avez jamais vendu chu lopin d'chucre-là?"

 

Quand j'entendi la rêponse: "Nan," j'eu' un mio d'espéthance.

 

Le Protchuleux: "Pouv'ous dithe qu'ou' n'y'avez pas vendu?"

 

"- "Nannin," fit l'témoin - et je r'perdit couothage.

 

MÊFI'OUS D'VOS AMINS!

 

Le dernié témoin 'tait Mess Bisson. Ch'tait nous qui l'avions appelè, le seul témoin à dêchèrge, mais i' nos fit pus d'ma' que d'bein en décliathant qu'il avait grand r'grèt de m'vaie dans chu picq'ye là; qu'il avait téjous pensè que j'tais pous loyal que chonna; qu'il espéthait que chutte triste affaithe ichin ne f'thait pas les autoritès et l'élite de l'île tchitter de souscrithe à la gazette, qu'i' n'tait pas responsabl'ye des opinions d'ses correspondants, exécra, exécra, exécra.

 

LES REPORTERS

 

L'audience fut suspendue chinq minutes. Walter et Frank, les reporters', en profitidrent pour aller vaie si tchic'un les invit'tait à baithe une fais... Quand i' rentridrent ils avaient l'air d'avair yeu pus bouanne chance que d'ordinaithe... Teddy Boielle, enfrumè dans l'banc du Jury, faisait la lippe en les r'gardant...

 

LE RÉQUISTOIRE DE LA PARTIE PUBLIQUE

 

Le Protchuleux se l'vit pour stèrter son réquisitoire. Il avait sus sa tabl'ye une immense pile d'Ordres en Consiel, de Régliément, de Proclamâtions, d'Actes du Coumité d'la D'fense de l'Ile. et d'Ordonnances du Lieut'nant-Gouverneux. Y'avait, ètou, au bu' d'chutte pile de dotchuments-là, un tas de vièrs livres erliès en brun et jusque des livres en angliais. A m'suthe qu'i' les arrangeait dans l'ordre qu'i' les voulait nou l'ouïait les nommer entre haut et bas: "Russell on Crime," "Code Civil," "Loi Salique," "Hawkins on Hanging," "Pillsbury on Post-Mortems"... J'en frémissais.

 

Le Protchuleux fut bein un p'tit quart d'heuthe devant c'menchi, mais à la fin i' s'y mins, faisant d'abord ermèrtchi au Jury que dans toute s'n'expérience, i' n'avait jamais yeu l'pliaisi d'adréchi une 'scouade d'hommes qu'avaient l'air aussi intelligents et dignes du respect du public.

 

I' r'gardait Teddy Boielle drait dans l's'yièrs en disant chonna et Teddy - comédien qu'il est, ètout - s'en r'dréchait au point qu'il avait pus l'air d'une statue en pliâtre enfuntchi que d'un Chef de Jury.

 

LE PLAIDOYER POUR LA D'FENSE

 

Men Avocat se l'vit. Il avait les principaux points d'ma d'fense êcrits sus l'dos d'une vielle enveloppe. Touos les hoummes d'entchête, qu'avaient 'tè à r'garder à droëte, du bord du Protchuleux, touonidrent lus yièrs à gauche, de notr' côtè - tous sinon deux, qui continuidrent à r'garder les portrait d'la Bataille de Jerry et à s'l'entre expl'yitchi.

 

***

 

Le bieau complîment que m'n'Avocat fit à ches vingt-quatre hoummes-là! I' les louangi et les vanti au point que George Couoillard, qu'était le vingt-traizième, en rouogit de pliaisi. Et pis, le v'la qu'i' s'met à me d'fendre. Y'avait deux points, qu'i' dit, qu'il avait idèe de lus prouver: 1º Que san client n'était pas coupabl'ye et 2º Qu'i' y'avait des circonstances atténuantes qu'i' plièdgi tout d'abord... Y'avait des choses qui mitigeaient les faits: san client 'tait janne; i' n'avait pas insultè la police, ni résistè au Chantgn'yi; i' n'tait pas un criminel enduèrchi; i' n'avait pas une bouanne mémoëthe et n'avait pas réussi - bein que ch'fusse pas manque d'êprouver - à se r'souv'nir du contenu de touos les Ordres en Conseil, Proclamâtions, Régliéments, Ordonnances, actes de Coumités et Annonces Officielles, qu'avaient forche de loé dans l'île depis la dgherre; i' n'savait pas du tout chein qu'était permins, ni chein qu'était d'fendu; enfin, i' n'avait pas spétchulè sur les tomates ni mins des vertes et des moyennes dans les patates pour le Gouvernement...

 

I' lus dit tout chonna et lus expl'yitchi chaque point en dounnant une bouanne ouappe sus l'haut du banc. Dans l'entretemps, le Chef du Jury avait tâtè dans sa pouchette pour vaie s'il avait un mouochet, mais je n'pu' pas vaie si ch'tait pour essuyer ses yeux, coumme je l'espéthais, ou si ch'tait qu'il avait du fraid dans la tête.

 

[AUTRE INCIDENT. - Tandis qu'l'Avocat fut arrêtè une minute à consulter les dos d'enveloppe, qu'il avait pus ou mains achifounnè sans s'en aperchever, Mister Hunt, qu'était le deuxième des hoummes d'entchête, et Laïesse Bilo, qu'était l'onzième, s'entre-dounnidrent une pinchie de s'no, sans faithe mine de rein, par dessus l'haut du banc.]

 

Et ne v'là le plaidoyer qui r'prend bouan train.

 

J'oubliais de dithe que tandis que l'Protchuleux avait pâlè, j'avais restè coumme un corps sans âme, assoummè, êgliami. Mais je r'prenais un mio couothage en entendant men Avocat mettre les choses si au cliai.

 

I' prétendait, carrêment, qu'i' dit, que ch'tait pas mai qu'avais mins l'chucre-là; que l'fait qu'il avait 'tè trouvè n'prouvait rein; qu'un houme aussi simpl'ye coumme mai, s'il avait seu qu'i' y'avait une migaud d'chucre souos san nez, n'éthait jamais peu continuer à êcrithe dans une pétite office jour oprès jour, s'maine oprès s'maine, sans mettre la main d'sus longtemps d'vant, car que man chucri d'vait bein être aussi vièdde que l'sien du Jury; que si j'avais voulu faithe une migaud de chucre, j'éthais peu la mettre ailleurs que souos une pacotille de vièr papi ponceleux et parmi des fils d'aithagnie: que la loé n'tiat pas rétroactive et que la police n'avait pas prouvè, n'avait pas êprouvè à prouver, et n'tait pas capabl'ye de prouver que chu chucre-là n'était pas là dépis longtemps, p't'être des annèes devant la passation des Ordres en conseil Aà Z, Numéthos 1 à 987,654,321, et que dans chu cas-là n'y'avait rein, absolument rein, contre mai et qu'il attithait l'attention du Jury à chu point-là.

 

I' r'gardi sus s'n'enveloppe occouo une fais. J'ouï un Juge s'êbaillyi.

 

Men Avocat continui: Que chu chucre-là éthait peut tchaie là tchic Samedi, du pann'yi à tchicque femme qu'était à payi un compte de vendue au Sieur Le Feuvre; que la dépôsition de Mess Parpaillon était bein importantes car, en rêponse à sa tchestchon, chu témoin-là, que tout l'monde estime et respecte, avait rêponnu catégoriquement qu'i' n'pouvait pas dithe qu'i' m'avait jamais vendu chu chucre-là...

 

La d'sus, le Protchuleux se l'vit et c'menchi: "En en rêponse..." mais m'n'Avocat protesti qu'i' n'avait pas l'droèt d'l'inerrompre, que s'n'intervention montrait qu'i' viyait la valeur de notr' défence...

 

La d'sus, le Baill'yi dit à l'Avocat qu'i' n'avait pas qu'faithe de s'mettre à chicagni la Partie Publique, qu'il avait à d'fendre l'atchusè et v'là tout.

 

La plaidoirie continui coumme devant et l'Avocat insisti fortement sus l'fait capital que j'n'aimais pas l'chucre, que jamais j'n'en mangeais; (à chein qu'i' dit). I' r'passi touos ses points, affirmi qu'il bein êtabl'yi que j'tais innocent, r'vint une minute ès circonstances atténuantes et pis de rassiévi à bu d'vent.

 

(à siéthe)