Êpitre à mén anmîn A.A.L.G.

Né v'chîn l'texte d'aniet d'not' auteu du mais, Ph'lippe Langliais:

Here's today's text by our author of the month, Philippe Langlois:

Êpitre à mén anmîn A.A.L.G.

Il est bein vrai que chaque chose
Ne peut durer qu'une saison;
Je n'êcris pus que de la prose
Et je pense que j'ai raison.

A qui bon se badrer la tête
A rimer un tas de gnolin?
I' faut quasiment être bête
Ou pour le mains pas fort malin.

Mais la nature est la nature,
Et si nous est nè pour rimer,
I' faut tant que le respir dure
Bouan grè, mal grè, s'y conformer.

Sus qui sujét peut-nou êcrire
Qui offre de la nouviautè?
Comment faire plleurer ou rire,
Tout en vers me parait traitè.

Je ne connais que l'anmin Phlipe
Pour dênichir un frais sujét;
L'engni tout d'un coup i' dissipe
Ov le sno d'mousieur Simonet.

Ou bein en Jerriais patriote
I' change de mine et de ton,
Et d'la pitqi chantant la note
De charitè fait un sermon.

Depis quiqu' temps not' savant maitre
En fait d'rimer, l'anmin Laelius,
Aucuns vers ne laisse paraitre,
Et garde sa muse en blocus.

J'conte qu'il a aut' chose à faire;
Pus que jamais embarrassè,
Le travas li perd la mémouaire
Et il oublie un biau passè.

N'oublions pas la vieille fille,
I' n'en est vraiment pas d'mêtqi,
Qu'est si maline et si habille,
Si bouanne et si remplie d'esprit.

Ch'est une savante hardelle,
Ou s'appelle Néné Caton;
Ch'est une brave demouaiselle
Qui peut chanter sus aucun ton.

Si par un manque de mémouaire
J'ai oubliè quique rimeux,
Pour se dêdomagir, nouos pllaire
Qu'i' nouos rime de qui fameux.

Te qui connais si bein la gamme,
A qui les vers ne couotent rein;
Qu'encourage une aimablle femme
Rêville te; tout sera bein.