Here's today's text by our author of the month, Philippe Langlois:
Eune longue arimée d'noms
De viers Jerriais nou trouve ocouo la race,
Mais i' n'y'en a pus en tout du nom d'Wace:
Il y'a ocouo des d'scendants des Mallet
A tchi nou peut joindre le nom de Cart'ret:
I' reste dans l'Île tchiques Lemprière,
Les d'St. Martin dorment tous au chim'tchière.
Depis longtemps nou n'pâle pus des Varin,
Mais nou-s-entend l'nom d'Gaudin et Vaudin.
Les Messervy ont acouo de l'haleine,
Et les Le Gros, les Néel et les Balleine.
Dans le vouest d'l'Île i' ne manque pas d'Arthur,
Mais nou n'y peut rencontrer un Estur.
Les cheins d'Hamptonne sont devenus assez rares,
Mais les Hamon sont à toutes les carres.
Des de la Rocque i' ne reste pus rein
Ni des Brasdefer, des Vinchelez, des Hastain.
I' y'a ocouo tchique ergot de Quetteville
Mais pas un seul du vièr nom de la Ville.
Dans pus d'un coin nou trouve des Gibaut,
Nou chercherait en vain les viers Mahaut.
A St. Louorains il y'a tout pllein d'Louorains,
Allez ailleurs pour trouver des Baudains;
Nou peut ocouo dêcouvri tchique Dénize,
Impossiblle de trouver un Jutize.
Nou rencontre des Luce et des Langlleys,
Des Le Cornu, Maret et Le Gallays:
Les Souslemont sont à ch't heu souos la terre,
Les Richardson, qui sont v'nus d'Anglleterre,
Tchiennent ocouo mais n'sont pas bein êpais,
Pas pus qu' les Scelle, les Tourgis, les Millais.
De Boutilliers il y'a eune racachie
Et des Aubin, Alexandre et Gallie;
Nou rencontre des Lefeubvre et Bisson,
Depis longtemps i' n'y'a pus de Mabon;
Des de Ste. Croix le nombre n'est pas grand,
Ni des Hardy, des Payn et des Le Grand;
I' n'manque pas d'la race des Poingdestre
Et nou-s-en peut dire autant des Le Maistre;
Nou peut étout y joindre les Gruchy
Et les Bertram et de Rue et Trachy.
Nou trouve assez de Nicolle et d'Maugiers,
De Gallichans, de Pigneaux, de Vautchiers,
Mais des Fêlard et Cambrais la lignie
D'pis des chents ans est êteinte et finie.
I' n'y'a pas un grand nombre de Perchard,
De Chevalier, de Pipon, de Bichard,
Ni de Le Geyt; mais les Falle et Breton
Et les Godfray et Le Sueur tchiennent bon.
Des Dumaresq la race deveint rare
Et des de Veulle et Le Cerf et d'la Mare.
Pour dêcouvri des d'Auvergne et Hascou
I' faut tréjous aller jusqu'à St. Ou.
A pus d'un bord nou trouve des Norman,
Des Le Gresley, des Amy, des Horman;
Dé-même ocouo nou rencontre des Braye
Et des Anley, des Ahier et d'la Haye.
I' y'a étout des Renaud et des R'nouf,
Des Lescaudey, des Le Brocq et Esnouf;
Nou peut même dêcouvri eune famille
Ieune seulement de l'ancien nom de Guille.
I' n'y'a pas mal de Mourant et d'Collas,
Et des Romeril, des Le Neveu, des Le Bas;
Et des Syvret, Grandin et Le Cousteur.
Mais nou n'entend pus le nom de Vavasseur;
Pourtant il y'a des Durel et des Nouel,
Et des du Bois aussi bein qu' des Dolbel.
Si l'nom d'Bertaut, et Dupont châque au manche,
Il n'en est pas ainchin du nom d'Coutanche.
Nou trouve étout Monamy et Vibert,
Binet, Le Quesne, et Fleury et Hubert,
Le Brun, Le Blancq, Le Rossignol, Perrée,
Benest, Gavey et Carrel et Quérée,
Et Le Mottée et Le Cras et Cabot,
Pallot, Huëlin, mais i' n'y'a pas d'Bagot.
Des d'la Perrelle il y'a tchique héritchier,
Nou-s-en peut dire autant du nom d'Ogier,
Et de Picot, de Badier et Gasnier.
I' n'y'a pas fort de Le Caulf, de Guillaume,
Ni de Sauvage ou Morel ou du Heaume;
Les Laffoley, Touzel, Labey, Remon
Durent tréjous ainchin que les Salmon.
Nou trouve étout l'ancien nom de Godel
Qui rime bein auv' le nom de Rondel:
Les La Cloche, les d'la Lande et Ricart
I' m'est avis sont devenus escars.
Nou-s-a peine à trouver un Le Veslet
Et un Le Roux, un Hue; mais des Becquet
Il y'a ocouo quique représentant,
Comme des Bauche et Sarre et Le Marquand,
Et des Le Sterc, des du Val, des Bailhache;
Mais i' n'y'a pus de Couochon ni d'Morfache;
Ni de Le Moigne, Hérault, Petit, Grossie,
Ni de Dirvault, de la Hougue ou Périer,
Ni de Fondan, ni d'Anfrie, ni Gervaise,
Ni des Augrès, Fallu ou Béchervaise.
De Simon, Jean, Larbalestier, Robin,
Desprès et Ph'lippe il y'a étout tchique brin,
Et des Le Lièvre et Sébire et Malzard,
Des de la Cour et Martel et Giffart.
J'avais quasi oublié les Clément
Et les Billot et Corbel et Vinchent,
Et les Orenge et Valpy et Janvrin;
Depis des chents ans i' n'y'a pas un Morin.
Je sai bein que la liste est incompliète,
Vouos pllaira-t-i' la rendre pus parfaite?
No comments:
Post a Comment