Légende de St.-Hélier

Né v'chîn l'texte d'aniet d'not' auteu du mais, Ph'lippe Langliais:

Here's today's text by our author of the month, Philippe Langlois:

Légende de St.-Hélier

Nou prétend que le vier Jerri
Dans l's anciens temps t'nait à la France,
Et que l'Esvêque de Coutance
Pouvait nouos visiter à pi:
Comme il y-avait de banque à banque
Un large dout à traverser,
Nouz y mettait brav'ment une pllanque,
Car i' n'pouvait pas l'engamber;
De chut' mangnere
Le bouan prélât,
Auve un bréviaire
Paqui souos l'bras,
Sans dangi de s'mouoillir l's orteis
V'nait confirmer les p'tits Jerriais.

Ch'était d'vant chu temps là ou d'pis,
(Car là d'sus vrainment notre histouaire,
Qui partout ailleurs est si cllaire,
Parait douteuse, i m'est avis),
Il arrivit qu'un jeane garçon,
Ou pour mûx dire un tout jeane homme,
S'êprint, sans rime ni raison,
D'amour pour une belle petite nonne,
Tant et si bein
Que d'gré ou d'forche,
Trouvant moyen
De veir sa douoche,
Il eurent le sort, hélas! je l'dis,
D'Adam et d'Eve en paradis.

La hardell' fut bétôt happèe,
Comme il arrive assez souvent,
Et par ses gens dans un couvent
Ou fut bein vite renfrumêe.
Mais qu' est qu' advint du pouor jeane homme?
I fut prins d'un si grand dêpièt
D'aver perdu sa jolie nonne,
Qu'il en eut l'esprit viscasiè;
Et de msespé,
Pour sauver s'n âme,
Comme un avé,
Qui craint la fllamme,
Sus un roqui i s'fit hermite
Pour mûx plleurer sa Marguerite.

I restit là une bouanne volèe,
Il y perdit quasi l'esprit,
Tout engroutè, tout affligi,
L'admiration de la contrèe;
I se nouorissait, le pouor corps,
De vlicots, d'chervettes, et d'bainnis;
Vla qui ne l'engraissait pas fort;
De pain i n'avait pas une mie.
Faites attention,
I n'faut pas rire,
I-où la passion
Peut nos condire.
Et ne vla comme, ah! que je le pllains,
I dvint un saint, ni pus ni mains.

Contre les vents, contre la pllie,
Un ptit cottin dans le roqui
Etait creusè pour de l'abri,
I n'y mnait pas joyeuse vie.
Le pllaisi est là ioù nou l'prend,
Ch'est une véritè bein rconnue,
Et chein qui malheureux iun rend
Un autre s'en trouve de mûx.
Pour tout chonna,
I faut qu'je l'dise,
Se faire du ma
Est une sottise;
Et je n'cré pon qu'tel êvredin
Veindra me prendre en temps à vnin.

I n'faut pon disputer des gouts;
"A pllie et douleur y-a un terme";
Chacun a quiq' sujet de lerme;
Y-a du drap au marchi pour tous.
Pour mettre fin à sa souffrance,
Dans sa charitè, le bouan Gui
Envyit des pirates par chance
Rôder à l'entou de Jerri:
A l'hermitage,
Ah! sans merci,
Comme un sauvage
I fut occi.

MORALE.

Bein qu'il en affole a tout âge,
I faut tâchir de rester sage;
Et pour se garantir d' l'enn'min
Dise ses prières ser et matin.