Eune poésie en Jèrriais par Elie (EJ Luce 1881-1918):
Lé Nouvel An
Pour tchi raison?
Je n'le sais pon!
Mais ch'est d'saison
De faithe un tas
D'êqualifias
Et d'embarras
Au Nouvel An!
Ch'est des souhaits,
Qui sont parfais
Pus ou mains vrais,
Un chatchun dit,
Tout autou' d'li,
"J'te souhaite, man vi:
La Bouanne Année."
Ch'est des saluts,
Au coin des rues,
Et même ès nues!
(En dirigeabl'ye).
Nou-z'est aimabl'ye,
Au Nouvel An.
Ch'est tout, enfin,
Autant d'gniolin
Sans bu ni fin!
Mais j'sis coumme vous
Et faut -j'l'avoue -
Que j'souhaite à tous
La Bouanne Année
No comments:
Post a Comment