Élie à la Bataille

Né v'chîn l'texte d'aniet d'not' auteu du mais, Elie:

Here's today's text by our author of the month, Elie:

Élie à la Bataille

J'en 'tais, mé, d'la Bataille ès Flieurs,
J'vis les tchéthiots et les couleurs;
J'ouï la musique et les hourrah.,
J'vos en asseuthe; i n'm'enn'yi pas!
Y'avait l'Bailli et l'Gouverneux
Et un tas d'dames et d'grands messieux.
Y'avait du monde à touos les coins
Et de tchi bé sus touos les points;
Et la musique, ah! qu'ou jouait bein
En s'proum'nant partout sus l'terrain.
Et qu'nos soudards avaient l'air bieaux
Ov la rouoge casaque sus lus dos.
Les p'tits avièrs dans lus carrosses
Boulés par ches belles petites noces.
Nou l'z'èthait, ma fingre! embrachies
Sinon d'peux d'en être ermertchis.
Touos les pais-flieurs et les fioûcheux
Vos décoraient-i' bein les reux!
Et les gérémienn's sus l's'ess'lets
Oh que ch'tait là de bieaux touffets!
Mais chein qui m'êtonnait bein pus
Ch'tait d'vaie autant d'commun lièrrus
Et un tas d'bruyèthe êpannie
Et d'la feûgièthe et d'l'entaill'yie
Des chents et chent tcherdons d'falaize. -
- Assis là d'sus est-n'on à s'n'aise?
Ch'èst ravissant qu'les flieurs sauvages
Aient arrangi si bein l's'att'lages.
J'en 'tais ravi, j'n'en r'venais pon:
Jusqu'à la sèrcl'ye qu'a du bon!
Le son d'la trompette annonci
Que la Bataille allait qu'menchi...
V'là qui cauffi dans un instant;
Ch'tait pique et pique et pique tout l'temps;
I fallait r'garder les hardelles
Jouôter les ga's ov' flieurs et fielles!
Y'avait l'Vicomte et l'Gouverneux
Qui lus fliantchaient d's'illiêts dans les yeux.
J'm'en mins ètou, du mus que j'pu
Pitchant partout, mais pas trop du.
J'fliantchi tant d'dahlias à une fille
Qu'oul' en 'tait rouge coumme une gradille.
Yavait des messieux en blianches braies,
Mon doux! à tchi qu'i' pathaissaient
S'ils avaient tchaie dans d'la peintuthe
I' 'n'néthaient pas yeu pus, je l'juthe.
Et pour les biaux bliancs cotillons
Ils 'taient d'toutes couleurs et faichons
La robe à Joseph n'eut jamais
Autant d'couleur dans touos ses plais.
Quand nou fut à but d'forche et d'flieurs
Et mié rôtis par la chaleur
Lady Vernon dounni les prix
Es d'moêselles qui l's'avaient gagnis.

Un chatchun alli baithe du thée
(Et changi d'robe, casaque ou braies).
Nou r'vint tous vaie l'feu d'artifice
Et ouï la musique d'la milice:
Vaie les gymnastes et l'confetti
Et prendre, en somme, un mio d'pliaisi...

A la d'moêselle ov' tchi que j'tais
J'dédie ichin mes vers Jerriais.