1977: D'èrtou en Améthique

En 1977, George d'La Forge dêcrivit san viage d'èrtou en Améthique:

In 1977 George F. Le Feuvre described his return journey to America:

Eh bein, bouannes gens, m'èrvélà dans un aut' monde! Ch'est vrai qu'la bliâse en Angliétèrre êprouvit à m'empêchi d'vouos tchitter mardi pâssé, mais ou n'fît qué m'èrtèrgi. V'là tchi m'donnit eune heuthe dé pus en Jèrri, car j'tchittînmes l'aéroport à St. Pièrre à neuv' heuthes chînq à la pliaiche dé huit heuthes chînq. Et jé n'sai pon combein d'temps qu'nouot' avion fut à faithe eune promenade cirtchulaithe en d'ssus des nuages lé tou d'l'aéroport "Heathrow" à Londres en attendant l'ordre d'attèrrer. D'aut' avions 'taient dans l'même embarras qué l'nouôtre, et fallait attendre san tou. Eune fais pâssés l's autorités d'înmigrâtion et d'la douanne il 'tait onze heuthes et d'mie, et j'tais supposé êt' assis à ch't' heuthe-là dans l'avion tchi s'en allait m'porter en Améthique! Heutheusement, j'dêcouvris qué ch'tî-là 'tait r'tèrgi étout et qu'l'heuthe du dêpart avait 'té r'mînse à douze heuthes et d'mie.

Nouos peines d'arrêt n'étaient pon 'couo finnies à douze heuthes et d'mie. Il 'tait eune heuthe pus tard quand j'tchittînmes Londres dans un "Jumbo" à réaction. J'tions quat' chents (à iun ou deux d'près) assis d'dans, et ch'est mèrveilleux, quand nou-s-y pense, comment qu'les "steward" et "stewardesses" peuvent assiéthe chu nombre d'pèrsonnes et vaie qu'lus cheintuthes s'saient êtreintes et blioutchies comme i' faut dévant qu'l'avion prenge san vol. Et pis sèrvi à baithe et à mangi à tout chu monde-là eune fais en c'mîn.

"Tch'est qu'nou fait our sé pâsser l'temps là-haut?" ou mé d'mandez. Eh bein, y'en a tchi liêsent des livres. D'aut' dorment ou dormillonnent. Un tas baillent dé lus becques, et ch'est embêtant d'en aver iun ou ieunne dé ches'-là à côté d'sé si nou veurt faithe un p'tit somme.

Dans les "Jumbos" tchi crouaîsent L'Atlantique i' montrent un film dé cinnéma sus un écran monté haut assez pour qué tout l'monde, assis, piêssent lé vaie. Mais i' fautlouer un p'tit tracas à êcouter, qué nou fouôrre dans l's ouies, si nou veurt ouï tch'est tchi s'pâsse dans l'film. Si ma mémouaithe né m'trompe pon, v'là tchi couôte chîn dollars, ou deux louis et d'mi. Quant à mé, jé n'dêpense pon d'sou pour vaie d'ité. J'sis trop Jèrriais dans l'âme. J'êprouve à dormi!

S'ou-s-allez "British Airways" à Detroit, Michigan, lé preunmié arrêt en Améthique est la capitale du pays - Washington - et v'là tchi prend sept heuthes et d'mie. Duthant chu temps-là i' vouos donnent un bouan r'pas à maintchi c'mîn et du thée ou café et eune bouochie d'vant v'nîn à Washington. Et pis y'a eune heuthe, tchiquefais pus, d'arrêt pour attèrrer les cheins tchi d'scendent là, et en embèrtchi pour Detroit et r'chèrgi l'avion d'pétrole, etc. Dé là à Detroit lé vol est à bein près eune heuthe et d'mie, ch'est en tchi lé viage dé Jèrri à Detroit prend dans les dgiex heuthes - à tchiquechose près.

" Et les baggages?" ou d'mandez. Eh bein, pour la preunmié fais dépis l'temps qué j'fais la travèrsée par avion, ieune dé mes "valises" 'tait mantchante quand j'arrivis à Detroit. Oulle avait 'té appathemment mînse à tèrre à Washington par mêprînse, car ou r'vînt dé là à Detroit mêcrédi au sé et ou m'fut délivrée à domicile à neuv heuthes chutte séthée-là.

Eh bein, mé r'vélà s'pathé d'mes bouans anmîns en Jèrri, mais rêuni auve ma fanmil'ye ichîn. J'pense en ieux, m's anmîns en Jèrri, tchi m'ont 'té si bouans quand j'tais dans l'vièr Ménage à St. Ouën. Et j'pense sustout ès cheins qu'j'ai veu pour la dreine fais et qu'j'ai sieu au chînm'tchiéthe. Et j'pense ès cheinne tchi sont dans la peine et qué j'n'ôse pon lus êcrithe pour lus dithe qué j'pense en ieux, dé peux d'lus ramémouaither pénibliément d'l'êpreuve tchi l's a accâbliées si cruellement.

Et j'vis en espéthance dé les r'vaie acouo l'année tchi veint, mes jannes et vièrs anmîns d'Jèrri. es cheins tch'ont, comme mé, dêjà dêpâssé l'temps voulu d'septante ans dépis beins d's années, j'lus dis: "I' faut vouos cramponner raide au rotchi d'la vie quand même qué l's années s'pâssent si vite, car j'conte vouos r'vaie en Jèrri quand j'y r'îthai!"

George d'La Forge