Here's today's text by our author of the month, Elie:
Notr' Mauvais Sujèt
Ou me d'mandèz, Missis, si j'ai d's'êfants?
Eh, mon Doux! Oui! Eche qu'ou n'le saviez pon?
J'avons un mousse. I' veint d'prendre sept ans
Ch'est un vrai Turc; nou l'dit par tout l'canton!
Les vaisins trouvent des balles dans lus gardin
Sus lus grand's portes, y'a des tchuthieux portraits
Et l'coupabl'ye est si souvent notr' gamin
Qu'ils aiment mus vaie ses talons qu'ses ortès!
J'avons notr' vièr Grison, ch'est l'pus pièrcheux des ca's;
I'bouoge à peine et ch'est à r'grèt qu'i' joue.
Mais j'vos asseuthe qu'il arroute à bouans pas
Quand l'mousse l'ya mins tchic castrole à la coue!
Ches S'tembre, un jour le nôtre et d'autres avièrs
Jouaient à la dgherre! 'Ah les mauvais sujets
Ils avaient prins - j'en eu' les lèrmes ès yièrs -
Nos "Chaumontel" pour lui servi' d'boulets!
Ch't'êtè, ma poule avait couè des canards,
Et quand les.p'tits qu'menchaient à prendre l'ieau,
Jemmin, un jour, l'attrapi dans l'hôgard
Et la pitchi dans l'dou' souentre ses p'tiots!
Le p'tit pendard fut l'autr' jour sièz l'barbi
L'lend'main, il 'tait, avec un vièr raseux,
A tigue-de-corps à râser notr' "Toby."
Mais une mordeuse l'y'apprins que ch'tait dang'geux.
San vièr grand'pèthe a l'malheur de l'gâter
Le jour de Noué, i' lis dounni tant d'tchi;-
Et l'mousse en prins p't'être ètou sans d'mander......
Qu'bétot fallit couorre siez l'apotitchi!
Tout l'jour, il est par les bels et les clios,
Grimpant partout sans s'gêner d'ses habits;
I' s'pliaît à pilvatchi dans les pitcheaux
Et à rentrer sans essuyer ses pids!
La couotuthiéthe est obl'yigie de v'nin
Deux jours la s'maine, - et ch'est à peine assez -
J'avons yeu bieau l'y faithe ses braies d'bâsin:
Dans un rein d'temps, fond et gno'rs sont usés!
Les tchièrpentchièrs étaient sièz nous drain'ment
Et un dîner, quand i' n'le viyaient pon,
Notr' corps-sans-r'pos s'n'alli bein carrêment
Scier deux-treis briques avec lus scie à t'non!
Les prumié fais, ch'tait bein à contre-tchoeu
Qu'i s'prépathait pour l'êcole, au matin.
Et bein souvent pus tard, je l'avons veu
Faisant l'école bissonniéthe dans l'gardin!
Nou-z'avait bieau lis rouoler de gros yeux:
Et dêhaller la badghette de d'sus l'ais
L'affaithe allait de charme un jour ou deux:
Bah! D'vant longtemps, ch'r'était pliéthe que jamais!
Mais un bieau jour, pour une affaithe de rein
Ov' un autr' mousse, notr' gamin s'quétill'yi
Et vos l'slindghi, pathaît-i', bel et bein:
D'pis chu jour-là, n'ya pas pus redghull'yi!
I' veurt tréjous devant l'heuthe être trimè
Il aime l'êcole et apprend ses leçons,
Mais r'veint souvent avec le nez grimè
Car touos les jours, i' s'bat ov' d'autres garçons!!
Notr' mousse est bein l'pus meutin du canton:
Un corps-sans-r'pos qu'est tréjous souos les pids!
Il est grimè du front jusqu'au menton;
Nou-z'a d'la peine à que ch'est san fils.
Il est tréjous là yoù qu'i' n'devthait pon
A tout moment, i' faut lis chanter ma'
Mais' las! A peine a-t-i promins d'êtr' bon
Que nou l'entend r'quémanchi san sabbat!
Notr' pouorre tchuisine est dev'nue un r'tchille-tout
Vingt fais par jour, i' l'y' apporte un tas d'tchi,
D'la salopp'thie, qu'i' pêque n'importe yoù.
Ch'est aussi vrai, j'n'ai pus l'tchoeu d'la netti!
Dans ses pouchettes, nou trouve un tas d'pêqu'thie
Du chocolat, d'la corde et des morcieaux d'crayon
Des clious, des marbres, du papi, sa toupie;
Ch'est un musée qu'la paute à man garçon!
J'avons tréjous tchic fénêtre dépichie
Toute la peintuthe est grimèe sus l'châchais
La carre d'la tabl'ye est bein mal briochie
Et nou-z'a honte de vaie nos tchaithes de bouais!
I'faut qu'il ait tchic chose de bon, pourtant;
Car les vaisins l'aiment tous, le p'tit grivouais;
Et quand i' fut malade aussi longtemps,
S'ou-z'aviez veu tout chein qui l'y'apportaient!
Et pour de nous, malgré tout san minchèt,
Ses dros, ses farces, - j'l'aimons par dessus tout! -
Je n'dounnaîmes pas chu p'tit mauvais sujet
S'ou nos offraites les trésors du Pérou!!
No comments:
Post a Comment