Here's today's text by our author of the month, Elie:
La fille qui nos faut
J'en connaît yunne qui sait l'all'mand,
L'latin, l'grec et l'hébreu.
Mais à tchi bon touos ches langages?
Ou n'sait pas d'battre un oeu!
Y'en a une autre qu'a un dos
- Ch'est vrais - comme un forgeux!
Tout l'jour ou fait d'la gymnastique...
Mon doux! j'en éthais peux!
Une certaine a une petite fache
Coumme une poupette en chithe;
Ou n'sé pon qu'souvent dans la vie
Faut travailli, pas rithe!
Y'en a une autre qu'êgalue
Tant ses habits sont biaux,
Mais qui n'veurt pon s'graissi les mains
A laver des vaissiaux!
Et pis chette chin qu'a tout pliain d'sous,
Pus qu'ou n'pouorrait compter,
J'lai ouie d'viser, hélas! j'sai bein
Coumme oul aime à qu'mander!
J'en connais d'autre qui font bouonne mine
- Quand i' n'sont pas siez yeux! -
En aver une telle pour sa femme
Ch'est d'la minzèthe, j'sis seux!
Mais la fille qui nos faut, man vieux,
Ch'est la sienne qui souorit
Pas seulement quand ou va s'proum'ner
Mais pus-à-co siez yi!
Ch'est la sienne qui veurt bein aidji
A s'n'homme en touos les temps,
Qui n'cherche pon à mettre les braies
Ni d'hors, ni par dédans!
Faut qu'une hardelle pour nos conv'nin
N'ait pas peux de r'trousser
Ses manches et d'faithe servi ses bras
Au matin comme au ser.
La sienne qu'est tréjous d'bouanne humeur,
Qui d'vise sans pâler haut,
Qu'aim'tha bein s'n'homme et ses êfants,
Ch'est là la fille qui m'faut!
No comments:
Post a Comment