Here's today's text by our author of the month, Elie:
Les Deux Patates
Une patate à sa vaisine
Disait l'autr' ser, toute chagrine;
"Nos v'la bein trimèes ach'teu!
Pour ma part, j'ai tréjous creu
D'être utile en fait de 'vivres'
Mais je n'soummes pus dans les livres."
Sa vaisine, une vieille géante,
Lis dis: "Bah! Tch'est qu'tu nos chantes?
J'avons tréjous notre valeur,
Et pus, même, ichin qu'ailleurs.
Et la preuve en est facile
Ch'est pour tchi, r'dréche-tai ma fille!"
Mais l'autre, en baissant ses fielles,
Lis réponnit: "Ma hardelle,
L'Baill'yi, l'autr' jour, ès Etats,
Nos mins diversément bas,
Disant que g'zettes et pommes de terre
N'dev'thaient pas être crues en temps d'ghèrre."
Mais la patate qu'avait bouanne mine
Se mins à rithe de sa vaisine.
"Ne t'gêne don pas, j'soummes en bouanes mains,
Lis fit-alle, ov' le Juge Payn,
I' dis au Baill'yi, qu'la patate
Sauv'thait les gens des pirates!"
I pathaît qu'en Angl'yéterre,
Tout l'monde font des pommes de terre,
Les messieux dans lus gardins
Y travaillent tous les matins.
N'y'a rein d'pus patriotique
Que d'craître des "Dates" ou "Moricqs".
L'autre en r'dréchant un mio la tête
Répondit: "Faut que je s'sais bête;
Le Baill'yi, je l'vai bein ach'teu,
N'voulait pon m'faithe mal au tchoeu,
I' pâlait, la conscienche nette,
Des siennes grosses comme des cordrettes!"
No comments:
Post a Comment