Ma vieille brioche

Né v'chîn l'texte d'aniet d'not' auteu du mais, Elie:

Here's today's text by our author of the month, Elie:

Ma vieille brioche

Ch'tait la servelle dé Noué, i'faisait biau temps,
J'tais tout janne garçon, j'avais d'jés neuf ans,
Pour un étchu j'l'acati, j'men r'souveins comme d'aniet,
Dans la rue d'drièthe siez l'bouonhomme Jean Aspiet,
Ma neuve Brioche.

Deux limelles ou'l avait et buon tithe bouchon,
Un p'tit épinoque-dents, et y'un qu'était raidde bon;
Et pis en cas q'tan j'va euss une pierre dans l'chabot,
Pour la r'hallé bein vite il y r'avait un cro,
A ma Brioche.

Ou'l avait une grosse melle étou, au bas du manche
Pour la pendre à un quiou qu'nou cachait dans une pianche;
Une petite piaque d'êtain, pour grimé sans nom d' sus,
Et un mot pour dé mé jamais j'né d'mand'dais mus,
Qu'ma vieille Brioche.

Quand j'men allais au vraic, d'vant sorti ded siez nous,
Dès qu'j'avais lièt l'hernais, dans ma pouchette tréjous.
Deux trais fais j'tâtais, pour m'asseûthé qué j'l'avais,
Car jamais ou savez, jé n'éthais voulu m'graie,
Sans ma Brioche.

Pour decrotté ses bottes, ou gratté des souiediches
Pour raccourchi la coue ès vaques ou bein ès g'niches.
Pour êcallé les îtres, des poules ou poulets tué
Pour faithe toutes sortes d'choses, lé miyeut ôti qu'yié
Ch'est ma Brioche.

Comment qu'jé m'graiethis sans, j'voudrais ma fingre savé.
J'la manq'this bein souvent, j'veur pas même la prêté,
Dé peue qué j'la perdrais et' qué j'n'la rvaie pus.
Man adresse et man nom j'ai fait êcrithe dessus,
Chutte vieille Brioche.