Monday 19 May 2014

La Saint Dunstan - Saint Dunstan's Day

Aniet, ch'est la Saint Dunstan. Connaîss'-ous la légende dé chu saint?

Today is the feast day of Saint Dunstan. Do you know the legend connected with this saint?

Lé dgiêx-neuf dé Mai est la Saint Dunstan, et né v'chîn l'explyicâtion dé chutte crianche-là. Avant dé dév'nîn Archêvêque dé Cantorbéry en 959, Dunstan 'tait forgeux dans lé p'tit village dé Mayfield dans l'Sussex en Angliétèrre.

Lé dgiâbl'ye avait mal ès pids en trotinnant 'chîn et là l'travèrs d'l'Angliétèrre à faithe san mauvaîtchi, et en pâssant par Mayfield i' décidit dé s'faithe féther. Il entrit dans la forge et Dunstan s'accordit à condition qué l'moussieu sait attatchi à la muthâle atout des chaînes duthant l'opéthâtion.

Mais Dunstan fit tant d'ma au Vièr Nic en m'ttant les m'nottes et les chaînes qué l'dgiâbl'ye piaillait pitchiâbliément et d'mandit à Dunstan d'l'èrlâchi. Dunstan, tchi n'tait pon un innouothant, fit l'dgiâbl'ye juther qu'i' n'entréthait pon dans eune maîson à tchi qu'i' y'avait un fé dé j'va sus la porte. Et l'Pid Froutchi juthit et fut libéthé. (...)

No comments: